Na ngonda ya Juillet 2022, kinkesi na diambu metadila kubula bantu minduki bimisaka na yinza ya mvimba:

•   “Lufua ya muntu ya politiki ya buala ya Japon yina zabanaka mingi [Shinzo Abe, Premier ministre ya ntama ya Japon] diambu yango tulaka mobulu mpe yakamuisaka bantu na yinza, mingimingi lokola mobula na diambu metadila kubula minduki kevuandaka mingi ve na buala ya Japon mpe buala metulaka ve minsiku mingi na diambu metadila kusimba minduki.”—10 Juillet 2022, The Japan Times.

•   “Buala ya Danemark vuandaka na kiadi mingi samu muntu mosi yina vuandaka na munduki kufuaka bantu tatu na kati ya wenze ya Copenhagen.”—4 Juillet 2022, Reuters.

•   “Afrique du Sud: Bantu yina vuandaka na minduki bandaka kubula yau mpe bakufuaka bantu 15 na bar mosi na mbanza ya Soweto.”—10 Juillet 2022, The Guardian.

•   “Bantu kuluta 220 kufuaka na minduki na États-Unis na kilumbu ya konje ya 4 Juillet.”—5 Juillet 2022, CBS News.

 Beto lenda vuanda na kivuvu ti kilumbu yankaka kinkesi ya mutindu yina kemanisa? Yinki Biblia metuba?

 Biblia metuba ti ntangu yayi beto kena kuzinga na yau kele “bilumbu ya nsuka,” kilokola yina bantu kesala mambu na kinkesi mpe na mobulu. (2 Timoteo 3:1, 3) Mambu ya kinkesi ya mutindu yina kena kusala ti bantu zinga na kubanga. (Luka 21:11) Kasi, Biblia melaka ti yakele na ntangu yina kinkesi kemanisa mpe ‘bantu kezinga na kisika ya kiyenge, na bisika ya kuzinga ya lutanunu mpe na bisika ya kupema yina mekondua mitungisi.’ (Yezaya 32:18) Yinki mutindu kinkesi kemanisa?

 Nzambi kekufua bantu ya yimbi mpe yandi kebebisa minduki nionso.

•   ‘Kasi bantu ya yimbi, bakekatula bau na ntoto.’—Bingana 2:22.

•   ‘[Nzambi] kena kumanisa bamvita na ntoto ya mvimba. Yandi kena kutolula litimbo mpe kuzengazenga dikonga; Yandi kena kuyoka bapusupusu ya mvita na tiya.’—Nkunga 46:9.

 Nzambi kekatula mambu yina kesalaka ti kinkesi vuanda na kulongaka bantu kuzinga na kiyenge.

•   ‘Bakesala ata yimbi mosi ve mpe bakebebisa ata kima mosi ve na mongo na munu ya nlongo, samu ntoto kefuluka mpenza na nzayilu ya Yehova mutindu bamaza mefulusa nzadi ya mungua.’—Yezaya 11:9.

•   Ata bubu yayi, Nzambi kena kulonga bantu na yinza ya mvimba babika kinkesi mpe babika kusadila minduki, ‘bakumisa mipanga na bau bima ya kubaludila ntoto mpe bakumisa makonga na bau bakupikupi.’—Mika 4:3.

 Samu na kulonguka mambu yankaka samu na bansilulu ya Biblia yina metadila kuzinga na yinza yina mekondua kubanga, tanga disolo “Affranchis de la peur: est-ce possible?”

 Samu na kulonguka mambu yankaka samu na solision yina Nzambi kebaka samu na kumanisa kinkesi mvimbamvimba, tanga disolo “Enfin la paix sur la terre!”