Mvita na Ukraine, buela diaka mambu ya mpasi yina kusoba ya klima kena kunata, kena kutatamana kusla ti bantu na yinza ya mvimba vuanda ve na bima ya kudia yina mefuana. Diambu yango ya mpasi kena kukukumina mingimingi babuala yina kena kusosa kudevelope. Na babuala yango, yakele mpasi mingi samu bantu baka bima ya kudia yina mefuana.

•   “Kubimisa bima ya kudia mpe kupesa yau bantu mekuma mpasi mingi samu na bamvita, kusoba ya klima, mpe ntalu ya enerji mpe mambu yankaka.”—António Guterres, secrétaire général ya ONU, 17 juillet 2023.

•   “Bantu ya mayele metuba ti, lokola Russie mebima na luwawanu yina bamesalaka ya kutinda ba céréales na babuala yankaka, yakesala ti bima ya kudia kuma diaka mpasi na yinza mpe ntalu na yau buelama mingi na babuala yina kevuandaka ve na mbongo mingi, mingimingi na Afrique du Nord mpe na Europe de l’est.”—Atalayar.com, 23 juillet 2023.

 Beto tadila yina Biblia metuba samu na mpasi ya bima ya kudia mpe samu na bilumbu kena kuiza.

•   Yesu samunaka: ‘Yinsi mosi kenuanisa yinsi yankaka mpe kimfumu mosi kenuanisa kimfumu yankaka, mpe nsatu kevuanda.’—Matayo 24:7.

•   Mukanda ya Kusonga kena kutubila banati mpunda yiya ya kifuani. Mosi ya banati mpunda yango kena kumonisa mvita. Nati mpunda yina kena kulanda yandi na manima kena kumonisa nsatu, yazola monisa ntangu yina bima ya kudia kekuma mpasi mpe ntalu ya bima ya kudia kebuelama mpenza. Biblia ketubaka, “Munu monaka mpunda mosi ya ndombe. Muntu yina mevuanda na zulu na yau, yandi mesimba na diboko na yandi kima mosi ya kumekila kilo. Munu kuwaka lokola ndinga mosi . . . kena kutuba ti ‘Muntu yina mesala kilumbu ya mvimba, salere na yandi kele kilo mosi ya ble.’”—Kusonga 6:5, 6, Bible en Kituba.

 Bambikudulu yayi ya Biblia metubila mpasi ya bima ya kudia kena kukokisama bubu yayi, na ntangu yina Biblia kena kubokidila “bilumbu ya nsuka.” (2 Timoteo 3:1) Samu na kuzaba mambu yankaka samu na “bilumbu ya nsuka” mpe banati mpunda yiya ya mukanda ya Kusonga, tala video Mokili ebongwani banda na mobu 1914 mpe tanga disolo “Batambwisi-mpunda minei yango bazali banani?”

•   Biblia kele na malongi ya mfunu yina lenda sadisa beto samu beto kanga ntima na mambu ya mpasi, kubuelama ya ntalu ya bima ya kudia to nsatu. Tala ndambu ya bifuani na disolo “Okosala nini soki ozali lisusu na mbongo mingi te?.”

•   Biblia mepesa beto diaka kivuvu ti mambu kebonga. Yamelaka ntangu mosi yina ‘mbuma kevuanda mingi mpenza na ntoto’ mpe konso muntu kevuanda na bima mingi ya kudia. (Nkunga 72:16) Samu na kuzaba mambu yankaka samu na kivuvu na bilumbu kena kuiza mpe mfunu yina nge lenda tudila yau ntima, tanga disolo “Elikya ya solosolo mpo na mikolo ezali koya.”