Lapolo mosi ya ONU metuba:

•   Kubanda kilumbu ya 7 octobre tii kilumbu ya 23 octobre 2023, mvita ya Gaza mpe Yisaele mekufua bantu kuluta 6 400 mpe bantu 15 200 meluala ngolo, mingi kati na bau kele bantu yina kele basoda ve. Buela diaka mafunda ya bantu yina metina bayinzo na bau.

•   Banda kilumbu ya 24 septembre 2023, mvita ya Russie mpe Ukraine mesala ti bantu 9 701 yina kele basoda ve kufua mpe bantu 17 748 meluala ngolo.

 Yinki kivuvu Biblia mepesa samu na bantu yina kena kuniokuama samu na bamvita?

 Biblia kesamunaka ti Nzambi ‘kemanisa bamvita na ntoto ya mvimba.’ (Nkunga 46:9) Yandi kesadila guvernema na yandi ya dizulu, to kimfumu samu yabaka kisika ya baguvernema ya bantu. (Daniele 2:44) Kimfumu ya Nzambi kenatina bantu kiyenge.

 Tala yina Yesu Klisto, Ntinu ya Kimfumu ya Nzambi kesala:

•   ‘Yandi kevukisa mputu yina kena kudila samu na kulomba lusadusu, buela diaka muntu mekondua mfunu mpe konso muntu yina mekondua nsadisi. Yandi kemonina muntu yina mekondua mfunu mpe mputu kiadi,mpe yandi kevukisa luzingu ya bamputu. Yandi kevukisa bau na bampasi mpe na kinkesi.’—Nkunga 72:12-14.

 Na nzila ya Kimfumu na yandi, Nzambi kemanisa samu na mvimbamvimba bampasi yina bamvita mpe kinkesi mebimisaka.

•   ‘Yandi kepangusa mansanga nionso na meso na bau, lufua kevuanda diaka ve, kiadi, bidilu mpe mpasi kevuanda diaka ve. Mambu ya ntama meluta.’—Kusonga 21:4.

 Ntama mingi ve Kimfumu ya Nzambi kenata nsobolo ya nene na ntoto. Biblia samunaka ‘bamvita mpe bansangu ya bamvita’ yina beto kena kumona bubu yayi. (Matayo 24:6) Mambu yayi mpe mambu yankaka yina kena kusalama memonisa ti beto kena kuzinga na “bilumbu ya nsuka” ya luyalu ya bantu.—2 Timoteo 3:1.