Bampova ya kuyina, kuyinana yina ketindaka na kufua bantu, kinkesi kati na makanda, mpe bamvita kena kutubama mingi na bansangu.

•   “Bubu yayi na basite ya Internet ya kusolola na bantu, beto kekuta bampova mingi ya kuyinana samu na mvita yina kena kusalama kati na Israël mpe Gaza mpe samu na babuala yina kena kukindisa bamvita mpe kuyinana.”​—The New York Times, 15 novembre 2023.

•   “Kubanda kilumbu ya 7 octobre, kuyinana, bampova ya kuyinana, mpe kufua bantu mekuma mingi na yinza.”​—Dennis Francis, président de l’Assemblée générale des Nations Unies, 3 novembre 2023.

 Bampova ya kuyinana, kinkesi, mpe bamvita kele mambu ya yimpa ve. Kutu, Biblia metubila bantu ya ntama yina ‘[vuandaka] bimisa bampova na bau ya yimbi lokola batolotolo’ mpe bavuandaka kindisa mvita mpe kinkesi. (Nkunga 64:3; 120:7; 140:1) Biblia memonisa ti kuyinana yina beto kena kumona bubu yayi kele mpamba ve.

 Biblia kena kumonisa bamfunu zole yina kena kusala ti kuyinana vuanda mingi bubu yayi.

1.  1. Yasamunaka ntangu mosi yina ‘nzola ya bantu mingi kemanisa.’ (Matayo 24:12) Na kisika ya kuvuanda na nzola, bantu mingi kekuma na kikadulu ya kuyinana.​—2 Timoteo 3:1-5.

2.  2. Kubuelama ya kuyinana kena kumonisa mayele ya yimbi mpe bupusi ya yimbi ya Satana Diabulu. Biblia metuba ti ‘yinza ya mvimba kele na yinsi ya kilendo ya muntu ya yimbi.’​—1 Yoane 5:19; Kusonga 12:9, 12.

 Kasi, Biblia kena kumonisa ti ntama mingi ve Nzambi kekatula mambu nionso yina kebimisaka kuyinana. Katula yau, yandi kekatula diaka mambu nionso ya mpasi yina kuyinana mebimisaka. Biblia melaka:

•   Nzambi ‘kepangusa mansanga nionso na meso na bau, lufua kevuanda diaka ve, kiadi, bidilu mpe mpasi kevuanda diaka ve. Mambu ya ntama meluta.’​—Kusonga 21:4.