Politiki kele yinto ya bukabuani yina kele na yinza ya mvimba. Na kutadila ankete mosi yina salamaka na mvula 2022, na Pew Research Center yina sangisaka babuala 17, bapursantaje 65 ya bambuta tubaka ti yakele na bukabuani ya ngolo na babuala na bau kati na bantu yina kepesaka maboko na bimvuka ya politiki yina mesuasana.”

 Nge kena kumona ti bukabuani ya politiki kena kubuelama ngolo na kisika yina nge kezingaka? Yinki kena kusala mutindu yina? Yakele na solision mosi? Beto tadila yina Biblia metuba.

 Biblia samunaka ti na bilumbu na beto, yina kele “Bilumbu ya nsuka,” bantu mingi kevuanda na kikadulu yina kepekisa bau kuvuanda na bumosi.

•   “Bilumbu ya nsuka kevuanda ntangu mosi ya mpasi mpenza mpe ya mikakatano. Samu bantu kevuanda bantu yina kekukizolaka, . . . yina kezolaka ve kusala nguizani.’—2 Timote 3:1-3.

 Atako bangolo yina bantu mingi mesala, baguvernema nunga ve kupesa solision. Bantu yina kele na mabanza mesuasana na ya bantu yankaka kemonaka ti kusala kintuadi samu na kumanisa bampasi kele diambu mosi ya mpasi, mpe yina lenda salama ve. Diambu ya mutindu yayi kena kundimisa yina Biblia metubaka deja yameluta bamvula mingi.

•   “Muntu meyadila muntu samu na kumonisa yandi mpasi.”—Mosakoli 8:9.

 Kasi, Biblia mepesa solision—guvernema mosi yina ketuadusua na muntu mosi yina kele na makoki ya kumanisa mambu ya mpasi yina kena kutungisa bantu bubu yayi.

 Biblia metubila beto mfumu mosi yina kele na makoki yina mefuana: Yesu Klisto. Yesu kele na kilendo, na kimfumu, mpe nsatu ya kutula bumosi mpe kiyenge na yinza ya mvimba.

•   “Na bilumbu na yandi, bantu ya lunungu kekula lokola matiti ya yimpa, mpe kiyenge kekuma mingi.”—Nzembo 72:7.

•   “Makanda nionso kesadila yandi.”—Nzembo 72:11.

 Yesu kele Mfumu yina meluta samu yandi ketudilaka bantu dikebi mpe yandi kele pene ya kusadisa bau, mingimingi bantu yina mekutanaka na mambu mekondua lunungu.

•   “Yandi kevukisa mputu yina kena kudila samu na kulomba lusadusu, mpe muntu ya mpamba mpe muntu nionso yina mekondua muntu kesadisa yandi. Yandi kemonina muntu ya mpamba mpe mputu kiadi, mpe yandi kevukisa luzingu ya bamputu. Mpe yandi kevukisa bau na bampasi mpe na mobulu.”—Nzembo 72:12-14.

 Beto kena kulomba nge nge longuka diaka mambu mingi yina metadila Kimfumu ya Nzambi, guvernema ya dizulu yina Yesu kena kutuadisa. Mona mambote yina guvernema yango kenatina nge mpe mutindu nge lenda pesila yau maboko.

•   Tala video Yinki kele Kimfumu ya Nzambi?

•   Tanga disolo “Bokonzi ya Nzambe—Guvɛrnema oyo ezangi kanyaka.”