Yakevuanda na kilumbu yina diambu metadila mumbongo ya bantu nionso kevuanda mutindu mosi?
Na babuala mingi, bantu bimaka na babalabala mpe batombokaka samu bakena kumona ti mambu metadila mumbongo kena kusalama na lunungu ve. Mambu yango ya mpasi kumaka diaka ngolo na ntangu ya maladi ya COVID-19, yina salaka ti bantu bika vuanda na kiese, babima diaka ve na bayinzo na bau, bakondua bima yankaka ya mfunu, mpe babika baka lusadusu ya munganga. Yau kena kumonisa ti lusuasanu ya ngolo kele kati na bamvuama mpe bamputu.
Mambu metadila mumbongo yina kena kusala bantu mingi mpasi, yakemanisa kilumbu yankaka? Ee. Biblia memonisa mambu yina Nzambi kesala samu na kumanisa mambu yina kena kusala beto mpasi bubu yayi.
Mambu metadila mumbongo yina Nzambi kemanisa
Diambu ya mpasi: Bantu nunga ve kutula mumbongo yina kena kukokisa bansatu ya bantu nionso.
Solision: Nzambi kekatula baguvernema ya bantu mpe yandi ketula guvernema na yandi na kisika na yau, nkumbu na yau Kimfumu ya Nzambi. Yakeyadila dizulu mpe ntoto ya mvimba.—Daniele 2:44; Matayo 6:10.
Mambote: Lokola Kimfumu ya Nzambi keyadila ntoto ya mvimba, yaketuadisa mambu metadila ntoto na mutindu ya kukoka mpenza. Bamputu kevuanda diaka ve mpe bantu kekukitungisa diaka ve samu na mambu ya mpasi yina metadila mumbongo. (Nkunga 9:7-9, 18) Kutu, bakesepela na kisalu na bau mpe bakevuanda na luzingu mosi ya kiese kintuadi na mabuta na bau. Biblia mepesa nsilulu yayi: ‘Baketunga bayinzo mpe bakezinga kuna, bakekuna bilanga ya vinu mpe bakekudia mbuma na yau. Baketunga ve samu muntu yankaka zinga kuna, bakekuna mpe ve samu bantu yankaka kudia.’—Yezaya 65:21, 22.
Diambu ya mpasi: Bantu lenda pekisa mambu yina kenatinaka bau bampasi mpe yina kesalaka ti bazanga bima yina bakele na yau nsatu samu na luzingu.
Solision: Na nzila ya Kimfumu ya Nzambi, Nzambi kekatula mambu nionso yina kesalaka ti bantu banga mpe bakondua luvuvamu.
Mambote: Na yinsi ya lutanunu ya Nzambi, bantu kemona diaka ve mambu yina kesalaka ti bazimbisa bima na bau mpe yina mabuta na bau kele na yau nsatu samu na kuzinga. Na kifuani, bamvita, kukondua madia, mpe bamaladi ya yimbi kevuanda diaka ve. (Nkunga 46:9; 72:16; Yezaya 33:24) Nzambi metuba: ‘Bantu na munu kezinga na kisika ya kiyenge, na bisika ya lutanunu mpe na bisika ya kupema yina mekondua mitungisi.’—Yezaya 32:18.
Diambu ya mpasi: Mbala mingi bantu yina kesosaka kaka mambote na bau mosi mpe bantu ya lokoso kesadilaka bantu yankaka mambu ya kukondua lunungu.
Solision: Bantu yina kevuanda na yinsi ya Kimfumu ya Nzambi, bakelonguka mutindu ya kumonisina bantu yankaka nzola na kisika ya kutula mambote na bau mosi na kisika ya ntete.—Matayo 22:37-39.
Mambote: Na yinsi ya lutuadusu ya Kimfumu ya Nzambi, muntu nionso kemonisa nzola yina Nzambi kevuandaka na yau, yina ‘kesosaka ve mambote na yau mosi.’ (1 Bakorinto 13:4, 5) Biblia metuba: ‘Bakesala ata yimbi mosi ve mpe bakebebisa ata kima mosi ve na mongo na munu ya nlongo, samu ntoto kefuluka mpenza na nzayilu ya Yehova a mutindu bamaza mefulusa nzadi ya mungua.’—Yezaya 11:9.
Biblia memonisa ti beto kena kuzinga na bilumbu ya nsuka ya mambu ya ntangu yayi mpe ntama mingi ve Nzambi kekokisa nsilulu na yandi ya kumanisa bampasi nionso na diambu metadila mumbongo. b (Nkunga 12:5) Tekila mambu yango salama, bansikudukusu ya Biblia lenda sadisa nge nge nungu bampasi metadila mumbongo banda bubu yayi. Na kifuani, tala masolo “Okosala nini soki ozali lisusu na mbongo mingi te?” mpe “Kotalela mbongo na ndenge ebongi.”
a Yehova kele nkumbu ya Nzambi na Biblia.—Nkunga 83:18.
b Samu na kuzaba mfunu yina beto lenda tudila Biblia ntima, tala disolo “Biblia—Buku oyo ebongi kotyela motema.”
Tala diaka...
MUTINDU BAMESASILA BAVERSE YA BIBLIA
Matai 6:34—‘Beno kukitungisa ve samu na mambu yina kekuiza mbazi’
Yesu zolaka tuba ve ti beto fueti bika bongisa mambu samu na bilumbu kena kuiza.
