Yinki Biblia metuba samu na bansatu yayi kele bubu yayi?
“Nsatu kemanisa.” Yayi kele bampova yina bantuadisi ya yinza tubaka samu na kumonisa lukanu na bau na diambu metadila kumanisa mosi ya mpasi yina meluta nene ya bantu, yina kele kupesa konso muntu na ntoto a madia. Kasi kilumbu kele yina nsatu kevuanda diaka ve na ntoto? Yinki Biblia metuba?
Biblia tubilaka banda ntama bansatu yayi kele bubu yayi
Biblia samunaka ti bansatu kevuanda na bilumbu na beto, kilokola yina yakebokidilaka “bilumbu ya nsuka.” (2 Timoteo 3:1) Nzambi ve muntu kebimisaka bansatu yango, kasi yandi meluengisaka beto samu na bansatu yango. (Yakobo 1:13) Beto tadila bambikudulu zole ya Biblia.
‘Nsatu kevuanda . . . na bisika ya mutindu na mutindu.’ (Matayo 24:7) Biblia samunaka na ntuala ti nsatu kevuanda na bisika mingi. Lapolo mosi ya bantu yina longukaka mutindu ya kusala mpe kukabula madia metuba ti: “Mambu yina metadila nsatu na ntoto mpe kukondua madia ya mbote mpe ya kufuana kena kutatamana kubeba.” b Bamilion ya bantu na babuala mingi kebakaka ve madia yina bakele na yau nsatu. Diambu ya kiadi kele ti, bantu mingi kati na bau kekufuaka.
‘Tala! Mpunda mosi ya ndombe, mpe muntu yina vuandaka na zulu na yau vuandaka na balanse na diboko na yandi.’ (Kusonga 6:5) Na mbikudulu yango, mpunda ya kifuani mpe muntu yina kena kutuadisa yau kena kumonisa nsatu na bilumbu ya nsuka. c Balanse yina kele na diboko ya muntu yina kena kutuadisa mpunda kele samu na kupeze madia. Ntangu muntu yango kena kutambula na zulu ya mpunda na yandi, ndinga mosi metuba ti ntalu ya bima ya kudia kemonte ngolo mpe yakena kuluengisa bantu ti balunda bima ya mfunu ya kudia. (Kusonga 6:6) Diambu yango kena kumonisa mpenza kukondua madia yina beto kena kumona bubu yayi, ntangu bamilion ya bantu kena kukoka ve kubaka madia yina bakele na yau nsatu mpe yina mefuana.
Yinki mutindu nsatu kemanisa
Bantu ya mayele metuba ti planeti na beto kebimisaka madia mingi samu na kudikila konso muntu yina kezingaka na ntoto. Na yau, yinki mambu kesalaka ti bansatu vuanda? Mpe na kutadila Biblia, yinki Mvangi na beto Yehova d kesala samu na kumanisa bampasi yango?
Diambu ya mpasi: Baguvernema lenda manisa ve kimputu mpe mambu ya yimbi yina kesalaka ti bantu kufua nsatu.
Solision: Kimfumu ya Nzambi yina kele guvernema ya kukoka kebaka kisika ya baguvernema ya bantu. (Daniele 2:44; Matayo 6:10) Bubu yayi, Bamputu mingi kena koka ve kubaka madia ya kufuana, kasi na Kimfumu ya Nzambi mambu kesoba. Biblia metuba samu na Yesu Klisto, yina kele Ntinu ya Kimfumu ya Nzambi ti: ‘Yandi kevukisa mputu yina kena kudila samu na kulomba lusadusu, mpe muntu yina mekondua mfunu mpe konso muntu yina mekondua nsadisi. . . . Mbuma kevuanda mingi mpenza na ntoto; yakefuluka na nsongi ya bamongo.’—Nkunga 72:12, 16.
Diambu ya mpasi: Bamvita kebebisaka bima mpe yakesalaka ti mbongo kuma mpasi; diambu yango kesalaka ti yakuma mpasi samu na bantu na kubaka madia yina bakele na yau nsatu.
Solision: ‘[Yehova] kena kumanisa bamvita na ntoto ya mvimba. Yandi kena kutolula litimbo mpe kuzengazenga dikonga; yandi kena kuyoka bapusupusu ya mvita na tiya.’ (Nkunga 46:9) Nzambi kebebisa binuanunu ya mvita mpe bantu yina kebimisaka bamvita. Yau kesala ti, konso muntu baka kima ya kudia kondua kivonza mpe kuniokuama. Biblia melaka ti: ‘Bantu ya lunungu kekula lokola matiti ya yimpa.’—Nkunga 72:7.
Diambu ya mpasi: Bamvula ya ngolo, bamuini ya ngolo mpe bisumbula yina kebimaka yau mosi kebebisaka bima yina bantu kekunaka mpe yakekufuaka bibulu.
Solision: Nzambi keyala kilendo nionso ya luyalanganu, mpe yandi kesala ti mambu vuanda mbote samu bima yunduka na mutindu ya mbote. Biblia metuba ti: ‘[Yehova] kekitisaka mupepe ya ngolo; bavage ya nzadi-mungua kekumaka niee. . . . Yandi kekumisaka dezere na dizanga yina mefuluka na matiti, mpe ntoto ya kuyuma bayinto ya maza. Yandi kesalaka ti bantu yina kele na nsatu zinga kuna . . . Bakesala bilanga mpe bakekuna bilanga ya vinu yina kebutaka bambuma mingi.’—Nkunga 107:29, 35-37.
Diambu ya mpasi: Bantu ya buimi mpe bantu ya yimbi kesalaka bima ya kudia yina kele mbote ve na kudia to bakelundaka bima ya kudia samu yakumina ve bantu yina kele na nsatu na yau.
Solision: Kimfumu ya Nzambi kekufua bantu nionso yina kele ya kukuikama ve mpe bantu ya yimbi. (Nkunga 37:10, 11; Yezaya 61:8) Biblia memonisa ti Yehova Nzambi kele ‘Muntu yina kezengaka na lunungu mambu ya bantu yina bavunaka, Muntu yina kepesaka dimpa na bantu yina kele na nsatu.’—Nkunga 146:7.
Diambu ya mpasi: Konso mvula bantu kebebisaka to kezimbisaka madia mingi (1/3).
Solision: Ntangu Kimfumu ya Nzambi kebaka mambu na maboko, bantu kebebisa diaka ata fioti ve madia. Ntangu Yesu vuandaka awa na ntoto, yandi salaka nionso samu bantu bebisa madia ve. Na kifuani, yandi dikilaka na mutindu ya kimangu grupe mosi ya bantu kuluta 5 000. Na manima, yandi tubilaka banlonguki na yandi ti: ‘Beno sangisa bitini yina mebikana, samu ata kima mosi ve beba.’—Yoane 6:5-13.
Lokola Kimfumu ya Nzambi kekatula mambu nionso yina kenataka nsatu, bantu nionso kebaka madia mingi mpe ya mbote. (Yezaya 25:6) Samu na kuzaba yinki ntangu Kimfumu ya Nzambi kesala mambu yango, tala disolo “Ntango nini Bokonzi ya Nzambe ekoyangela mabele?”
a Manaka samu na kubongisa mambu ya babuala nionso yina kele na Nations Unies Ndimaka na 2015 Programme de développement durable à l’horizon 2030.
b Lapolo ya kimvuka ya Nations Unies yina ketalaka mambu ya kupesa madia mpe bisalu ya bilanga (Organisation des Nations Unies pour l’alimentation et l’agriculture) yina babimisaka kintuadi na Fonds des Nations Unies pour l’enfance, Fonds international de développement agricole, Organisation mondiale de la santé et le Programme alimentaire mondial des Nations Unies.
c Samu na kuzaba mambu mingi na yina metadila bantu yiya yina kena kutambula na zulu ya bampunda yina mukanda ya Kusonga metubila, tala disolo “Batambwisi-mpunda minei yango bazali banani?”
d Yehova kele nkumbu ya Nzambi. (Nkunga 83:18) Tala disolo “Yehova azali nani?”
Tala diaka...
BAMVUTU NA BIUVU YA BIBLIA
Yinki kele kidimbu ya “bilumbu ya nsuka” to ya “ntangu ya nsuka”?
Biblia samunaka mambu mingi yina kana yakena kusalama nzila mosi, yakevuanda “kidimbu” samu na kuzaba bilumbu ya nsuka.
MAMBU YANKAKA
Yakevuanda na kilumbu yina diambu metadila mumbongo ya bantu nionso kevuanda mutindu mosi?
Yakele na guvernema mosi yina lenda tuadisa mambu ya ntoto na mutindu ya kukoka, na kukatulaka kimputu mpe kukondua mumbongo samu na mvimbamvimba.
