Baekipi na beto mingi ya bambangudi (kuluta 60%) kesadilaka ve na bafiliale kasi nde na babiro yankaka ya mbangudulu. Samu na yinki nkubukulu yango kele mbote? Yinki bima bambangudi kevuandaka na yau nsatu samu basala kisalu na bau mbote na babiro yango? Mpe na yinki mutindu kisika yina ekipi ya bambangudi kele kesalaka ti kisalu na bau vuanda mbote?

 Biro ya mbangudulu kesadisaka bambangudi bavuanda kisika yina bantu mingi ketubaka ndinga yina bakena kubangudila. Karin, yina kele mbangudi na Bas-Allemand, metuba: “Banda beto mekuendaka na biro ya mbangudulu na Cuauhtémoc, na Chihuahua, na Mexique, beto ketubaka ntangu nionso ndinga ya Bas-Allemand—na bambangudi yankaka mpe na kisalu ya kusamuna, ata kana beto mekuenda sumba bima. Beto mekukikotisaka mpenza na ndinga na beto. Beto kekuwaka ntubulu ya ngolo yina beto mekuwaka ntama mpenza, mpe beto kena kulanda vokabilere yina bantu kena kusadila mpenza.”

 James, yina kesalaka na ekipi ya mbangudulu ya Frafra na Ghana, metuba ti ntangu yankaka yandi kekanisaka bampangi yina bavuandaka na bau na Betele. Kasi yandi mebuela ti: “Mukesepelaka mpenza kusala na biro ya mbangudulu. Kusamuna na ndinga ya buala mpe kumona mutindu bantu kena kusepela na nsangu ya mbote kesimbaka ntima na munu.”

 Yinki mutindu bampangi keponaka kisika yina baketula biro ya mbangudulu? Joseph yina kesalaka na biro ya nene, na Warwick, na New York, na Etats-Unis na departema ya kusala baplan mpe kutunga na yinza ya mvimba, metuba ti: “Mosi ya mambu ya mpasi beto kekutanaka na yau kele ti, na babuala yankaka, kuran ya mbote kele ve, maza kele ve, Internet yina mefuana samu na kubaka mambu ya kubangula kele ve. Na yau, ntangu beto kena kusosa kisika ya kutula biro ya mbangudulu, beto ketadilaka bisika mingi yina baketubaka ndinga yango.”

 Mbala mingi, beto kemonaka mbote kutula biro ya mbangudulu na Yinzo ya Balukutakanu ya nene, na Yinzo ya Kimfumu, to na yinzo ya bamisionere samu beto bimisa mbongo mingi ve, kuna nde bambangudi kebanda kukuenda kusadila. Kana yinzo ata mosi ya mutindu yina kele ve, balenda pesa bampangi nzila ya kusumba bayinzo mpe bisika ya kutula babiro yina bambangudi lenda banda kusadila mpe kuleka. Kana nsobolo mosi mesalama samu na ekipi ya mbangudulu, balenda teka bayinzo yango mpe kusadila mbongo yango kisika yina nsatu ya ngolo kele.

 Na mvula ya kisalu ya 2020, beto sadilaka badolare milion 13 samu na kusadisa babiro ya mbangudulu yatatamana kusala. Baekipi na babiro ya mbangudulu fueti vuanda na baordinatere, baprograme ya mbote, bima ya kusadila baanrejistrema, Internet, mpe bima yankaka ya mfunu. Na kifuani, ordinatere yina muntu mosi kesadila lenda vuanda na ntalu ya badolare 750. Baordinatere yango kele na baprograme yina bakesumbaka, buela diaka programe ya WTS (Watchtower Translation System) yina kesadisaka bambangudi babongisa kisalu na bau mpe babaka mikanda yina bakele na yau nsatu samu na kusadila.

 Bambangudi kevuandaka diaka na bisadulu yankaka yina kesadisaka bau samu na kusala baanrejistrema. Bisadulu yango monanaka ti yakele na mfunu na ntangu maladi ya COVID-19 bandaka, samu bambangudi mingi vuandaka vutuka na bayinzo na bau samu na kutatamana kusala baanrejistrema ya mambu yina bafueti sonika mpe bavideo.

 Mbala mingi bavolontere kepesaka maboko samu na kutanga mikanda mpe kusala bisalu yankaka samu na kutanina babiro. Cirstin, yina kesalaka na biro ya mbangudulu ya ndinga Afrikaans na Cape Town, na Afrique du Sud, metuba ti: “Bansamuni mingi mpe bampasudi nzila ya ntangu nionso kebakaka diluaku ya kusala awa.”

 Bampangi yango yina mekukipesa na nzola na bau mosi, bakesepelaka na diluaku yango ya mbote. Mpangi mosi yina kepesaka maboko na biro mosi ya mbangudulu metuba ti kusala kuna kele lokola “maza madidi yina kena kukitisa ntima.” Bampangi yankaka diaka kena kupesa maboko samu na kusala baanrejistrema. Juana, yina kele mbangudi na ndinga ya Totonaque na kizunga ya Veracruz, na Mexique, metuba: “Ntangu yayi lokola beto kele na babuala yina baketubaka ndinga na beto, yakele mpasi ve samu na bampangi mingi bakuiza kusala baanrenjistrema ya mikanda mpe bavideo.”

 Kasi babiro ya mbangudulu mesadisa samu kisalu ya mbangudulu salama mbote? Bamilion ya bantu yina ketangaka mikanda na beto mendima diambu yango. Cédric, yina kele mbangudi na ndinga ya Kongo na République Démocratique du Congo, metuba: “Bampangi yankaka vuandaka bokidila mutindu na beto ya kubangula mikanda na ndinga ya Kongo ti ‘Kongo ya mikanda ya Watch Tower,’ samu yavuandaka sonama ve mutindu bantu ketubilaka ndinga ya Kongo. Kasi bubu yayi, baketubaka ti mikanda na beto kena kubangulua na ndinga ya Kongo ya bilumbu yayi, mutindu bantu ketubilaka yau konso kilumbu.”

 Andile, yina kele mbangudi na ekipi ya Xhosa, yandi diaka mekuwaka mambu ya mutindu yina na Afrique du Sud. Yandi metuba ti: “Bantu mingi kena kutubila beto ti bakena kumona nsobolo na mutindu ya kubangula mikanda. Ata bana yina vuandaka tanga Yinzo’a zulu ya Nkengi na Anglais, bubu yayi bakena kutanga yau na Xhosa. Bakena kusepela mpenza na Biblia Mbangudulu ya Yinza ya Yimpa samu yamebangulua na mutindu yina baketubilaka.”

 Mbongo nionso yina bimaka samu na kusosa bisika ya kutula babiro ya mbangudulu, kubongisa, mpe kutanina yau, yakatukaka na makabu yina kepesamaka samu na kisalu ya kusamuna na yinza ya mvimba, mpe yina bakepesaka na nzila ya donate.pr418.com.