Bambangi ya Yehova ketudilaka mpenza bampangi na bau Baklisto dikebi. (1 Piere 2:17) Mingi kati na beto kekukimonaka mutindu Tannis mpangi mosi ya nketo na Kenya kekukimonaka. Yandi metuba, “Munu kevuandaka na nsatu ya kuzaba mambu yina kena kukumina bampangi na munu ya banketo mpe ya babakala na yinza ya mvimba.” Yinki mutindu Tannis mpe bamilion ya Bambangi ya Yehova yankaka kezabaka mambu yina kena kuluta na yinza? Banda 2013, beto kumaka na dikoki ya kusala yau na nzila ya kitini Bansangu ya site na beto jw.org.

 Kitini Bansangu kevuandaka na balapolo ya kutudila ntima yina metadila Bambangi ya Yehova na mambu lokola kubimisama ya Biblia, kisalu ya kupesa lusadusu na ntangu ya bisumbula, baproje ya kutunga, mpe mambu yankaka ya mfunu. Yakepesaka beto bansangu ya bampangi ya babakala mpe ya banketo yina kekotaka buloko samu na kiminu na bau. Kitini Bansangu kele diaka na masolo ya kukindisa ya bakampanye ya kisalu ya kusamuna mpe ya Mbambukulu. Banani kesosaka bansangu yango, mpe yinki mutindu bakebongisaka yau?

 Kitini Bansangu ketuadisuaka na Biro ya kubaka bansangu. Departeman yango kele na biro ya nene mpe yakesalaka na yinsi ya lutuadusu ya Komite ya bantuadisi ya Kimvuka ya Ntuadisi. Biro ya kubaka bansangu kele na bampangi ya babakala mpe ya banketo kuluta 100—mingi kati na bau kele bavolontere—yakele na bansoniki, bantu samu na kusosasosa, bantu kesalaka bifikula, mpe bambangudi. Bayankaka kesalaka kisalu ya kusolola na bamfumu ya Leta, banlongisi, mpe bamuangisi ya nsangu. Biro ya kubaka bansangu kebakaka lusadusu ya babiro 80 yina ketadila bansangu na Babetele ya yinza ya mvimba.

 Samu na kubongisa nsangu mosi, Biro ya kubaka bansangu kesalaka kintuadi na babiro yina ketadilaka bansangu. Kana kaka bampangi memona ti diambu mosi yina kele mbote samu na kuzabisa yau, bakesosaka disolo na yau mpe bekebongisaka bansangu yina bantu ketudila ntima. Yalenda sangisa kusala biuvu ya masolo mpe kusolola na bantu yina mebonga. Na manima ya kubaka bansangu nionso, bakesonikaka disolo yango, bakebongisaka yau, baketangaka yau, bakefuanikisaka yau na bafoto mpe baketindaka yau na Komite ya bantuadisi samu bandima yau.

 Yinki mutindu bampangi na beto Baklisto kekukimonaka samu na Bansangu yango? Cheryl, mpangi mosi ya nketo na buala ya Philippines metuba, “Munu kesepelaka mpenza kubanda kilumbu na munu na kutanga bansangu yina metadila nkubukulu ya Yehova mpe bisadi na yandi.”

 Bantu mingi yina ketangaka yau ketubilaka lusuasanu yina kele kati na Bansangu ya jw.org mpe bansangu ya basite, baradio mpe batelevizion yankaka. Tatiana, yina kevuandaka na buala ya Kazakhstan metuba: “Munu kele na butondi samu munu lenda tudila bansangu ya jw.org ntima. Yakele ya kutudila ntima mpe yakekokisaka lukanu na yau.” Alma mpangi mosi ya nketo na buala ya Mexique metuba: “Kana beto mefuanikisa yau na bansangu ya yimbi yina beto kekuwaka na Internet, radio, to televizion, kitini Bansangu kevuandaka ya kukindisa.”

 Kitini Bansangu kele kaka ve ya kutudila ntima; yakekumisaka diaka kiminu ngolo. Bernard, yina kevuandaka na buala ya Kenya metuba: “Kitini Bansangu sadisaka munu munu tadila bampangi na yinza ya mvimba lokola dibuta na munu, yavuanda yinki kisika bakele. Munu kele na dikoki ya kukotisa bankumbu mpe mambu yina metadila bau na bisambu na munu.” Mpangi mosi ya nketo na nkumbu ya Bybron, kaka na buala ya Kenya metuba: “Munu kevuandaka ntangu nionso na kiese ntangu munu kemonaka masolo yina metadila kubimisama ya Biblia na bandinga ya kusuasana! Masolo yango kebambulaka munu ti Yehova keponaka ve bilungi.”

 Ata bansangu yina metadila mikakatano yina bampangi kena kukutana na yau lenda kindisa beto. Jackline mpangi mosi ya nketo na buala ya Kenya metuba, “Kuyindula na zulu ya kibakala na bau kekindisaka mpenza kiminu na munu. Munu kesosaka ntangu nionso kuzaba mambu yina kesadisaka bau bakanga ntima. Munu longukaka mutindu mambu ya ‘pete’—lokola kisambu, kutanga Biblia, ata mpe kuyimbila—kevuandaka na mfunu samu bampangi na beto bikana ngolo.”

 Beatriz mpangi mosi ya nketo na Costa Rica kesepelaka na bansangu yina metadila bisumbula yina kebimaka yau mosi. Yandi metuba: “Kitini Bansangu kesadisaka munu munu mona mutindu nkubukulu na beto kepesaka lusadusu na bampangi na nsualu, na mutindu ya mbote, mpe na nzola. Yau kendimisaka munu ti yakele nkubukulu ya Yehova.”

 Beto kele mpenza na butondi na kubaka bansangu yina metadila bampangi na beto na yinza ya mvimba na ntangu yina mefuana! Diambu yango lendaka salama ve kondua makabu yina beno kepesaka samu na kisalu ya kusamuna na yinza ya mvimba, mingi kati na makabu yango kepesamaka na nzila ya donate.pr418.com. Matondo samu na makabu na beno yina beno kepesaka na ntima ya mvimba.