Na ngonda ya Janvier 2021, Kimvuka ya Ntuadisi pesaka nsangu ti kisadulu mosi ya yimpa samu na ndongokolo ya Biblia mebimisama, mukanda Zinga mvula na mvula na kiese! a Yinki mutindu nsangu yango salaka nge? Matthieu, yina kezingaka na Canada metuba: “Munu vuandaka na kiese! Mpe kiese na munu buelamaka ntangu munu kuwaka badiskur mpe munu talaka bavideo yina sasilaka mfunu yina mukanda yango bimisaka mpe mutindu bamekaka yau. Munu vuandaka vingila na nsatu ya ngolo kumona yau mpe kusadila yau.”

 Mukanda Zinga mvula na mvula na kiese! kena kumonisa mayele ya yimpa ya kutuadisa bandongokolo ya Biblia. Kasi, yau kaka ve kele lusuasanu yina kele kati na mukanda yango ya yimpa mpe bisadulu samu na ndongokolo yina vuandaka na ntuala na yau. Kana nge kena kusadilaka mukanda Zinga mvula na mvula! ya papie nge lenda mona ti mukanda yango kena kumonisa mpenza lusuasanu. Samu na kubakusa yau, beto tubila mbotembote diaka mutindu mukanda yango salamaka.

 Papie mosi ya ngolo. Samu na yinki yakele na mfunu? Mukanda Zinga mvula na mvula na kiese! kele na bafoto ya bakulere kuluta 600, kana mbala 10 kuluta mukanda Kelongaka! Mukanda yango ya yimpa kele diaka na bisika yina kele mpamba—bisika yina mekondua bisono to bafoto—na bapaje na yau. Mukakatano vuandaka na mambu zole yayi: Kana papie kele mpenza pete, nge lenda mona bafoto yina kele na paje yina yankaka. Samu na kununga diambu yango, bampangi ya departema ya kubimisa mikanda na yinza ya mvimba (IPD), na Wallkill, na mbanza ya New York, na États Unis, mekaka mitindu yiya (4) ya bapapie yina bakena kusadila bubu yayi na bamashini na beto ya kubimisa mikanda. Komite ya kusonika ya Kimvuka ya Ntuadisi tadilaka konso mutindu ya papie, mpe yaponaka papie yina kele pete mingi ve. Atako papie yango kele na 16 % ya ntalu kuluta yina beto memesanaka kusadila na mikanda na beto, yakena kusadisa banlonguki ya Biblia batanga konso paje ya mukanda Zinga mvula na mvula na kiese! kondua kumona bafoto yina kele na paje ya manima samu yakatula ve dikebi na yandi.

 Kuvertire yina mesuasana. Kuvertire ya mukanda na beto ya yimpa kele ya kusuasana na bakuvertire ya mikanda yina beto mesadilaka samu yamesangisa bima mingi yina kena kutanina yau. Na kisika ya kusangisa bima yina beto kesangisaka samu na kusala bakuvertire ya mikanda, mukanda yango ya yimpa kele na kuvertire yina kena kusala ti foto na yau monana mbote. Mutindu bamesadila kuvertire yango kena kusala ti mukanda yango bika beba ata kana bakena kusadila yau mbala na mbala. Kasi, kuvertire yango lenda vuanda na ntalu mbala tanu (5) kuluta kuvertire yina beto kesadilaka ntete. Yau yina bafiliale mingi salaka kintuadi samu na kubaka bisadulu yango na ntalu ya fioti.

 Samu na yinki beto ponaka bisadulu yina kele ntalu mpenza? Mpangi mosi ya departema ya kubimisa mikanda na yinza ya mvimba metuba: “Beto mebanza ti mukanda yango kesadulua mingi, na yau beto kele na nsatu yatatamana kumonana mbote atako bakesadila yau mbala na mbala.” Eduardo, mpangi mosi ya departema ya kubimisa mikanda na filiale ya Brésil metuba: “Beto kele na kiese kumona mutindu nkubukulu ya Yehova sadilaka bisadulu ya mbote samu mukanda yango vuanda kitoko, yina kezingila, mpe yina kele mobte na kusimba, na kusadilaka mpe mbote makabu yina beto kebakaka.”

 Beto bandaka kubimisa na mashini mukanda Zinga mvula na mvula na kiese! na ngonda ya Mars 2021. Yavuandaka na ntangu ya maladi ya COVID-19, yavuandaka mpasi mpenza. Babetele vuandaka na confinement, dikoki vuandaka diaka ve samu bavolontere kuiza sala na bamashini na beto ya kubimisa mikanda, dikoki vuandaka mpe ve ya kubokidisa bantu samu bakuma bampangi ya dibuta ya betele. Yau salaka ti bamashini na beto yankaka ya kubimisa mikanda vuanda ve na bantu mingi yina kesadila yau, mpe bamashini yankaka kangamaka ntete samu na bipekiseli ya bamfumu ya Leta.

 Yinki mutindu beto nungaka mambu yango ya mpasi? Ntangu bamashini ya kubimisa mikanda bandaka diaka kusala, balombaka bampangi ya badepartema yankaka ya betele bakuenda pesa maboko samu na mua ntangu. Joel, yina kesalaka na departema ya kubimisa mikanda na yinza ya mvimba metuba, “Kikadulu na bau ya kukipesa mpe kikadulu na bau ya kuvuanda pene ya kulonguka bisalu yankaka vuandaka na mfunu samu na kukokisa bisalu yango.”

 Atako beto kutanaka na mambu nionso yina ya mpasi, beto bimisaka deja bamilion ya mukanda Zinga mvula na mvula! Kubimisama na yau vuandaka lomba bima mingi ya mutindu na mutindu, na kifuani plaques d’impression, film de pelliculage, papie, maza ya mashini (encre), mpe kole. Na bangonda 5 ya ntete, badolare kuluta bamilion 2,3 bimisamaka samu na kusumba kaka bima ya kusadila. Samu na kusadila mbongo mbote, beto kengaka samu beto bimisa ntete ntalu ya mikanda yina bimvuka kele mpenza na nsatu na yau.

 Yinki banlongisi ya Biblia mpe banlonguki na bau kena kutuba samu na mukanda yango ya yimpa? Paul, mpangi mosi yina kevuandaka na Australie metuba: “Mukanda Zinga mvula na mvula! kele kitoko na kusadila, munu kevingilaka na ntima ya zulu kutuadisa ndongokolo ya Biblia. Mukanda yango kele kitoko na kutala mpe yakesadisa samu na kusolola na bantu. Yakele na bansangu ya puelele, biuvu yina ketinda muntu na kukanisa, bavideo, bafoto, batablo, mpe balukanu samu na nlonguki. Kisadulu mosi ya mbote mpenza yina kena kupesa munu nsatu ya kubongisa diaka mutindu na munu ya kulonga.”

 Nlonguki mosi ya Biblia yina kevuandaka na États-Unis metuba: “Munu kezolaka mingi mukanda yango ya yimpa. Bafoto na yau kesadisaka munu samu munu bakusa mambu ya ngudi. Bavideo na yau kesimbaka ntima na munu mpe yakepusaka munu na kusala diambu mosi.” Nlonguki yango kelongukaka mbala zole na sabala mpe yandi kekuendaka na balukutakanu ya kimvuka mbala na mbala.

 Beto fueti bimisa diaka na mashini bamilion ya mukanda Zinga mvula na mvula na kiese! na bandinga mingi. Ya kedika, bubu yayi, Kimvuka ya Ntuadisi mendima mukanda yango bimisama na bandinga 710, kana ntalu ya 340 kuluta mukanda Kelongaka!

 Yinki mutindu beto kena kubaka mbongo samu na kubimisa mukanda yango na mashini? Na nzila ya makabu yina kekatukaka na yinza ya mvimba, mingi na yau kepesamaka na nzila ya donate.pr418.com. Beto kena kuvutula matondo samu na kikadulu na beno ya kukaba, yau kena kusala ti beto bimisa bisadulu samu na ndongokolo ya Biblia samu na bantu yina kele na nsatu ya kulonguka mambu metadila Yehova mpe ‘kuzinga mvula na mvula.’—Nkunga 22:26.