Kati na bankama ya bamilion ya bantu yina kezingaka na Amerique latine, yakele na bamilion ya bantu yina kele na bandinga na bau mosi mpe nzingulu na bau. Mingi kati na bau kele bampangi na beto Baklisto, mpe bakesepelaka na nzingulu na bau. Samu na kusadisa bantu bazaba kedika ya Biblia, bakebangulaka mpe bakekabulaka mikanda na bandinga kuluta 130 yina ketubamaka na Amerique latine. a Kasi, ndambu ya bampangi na beto kekutanaka na kumekama samu bameponaka kusadila Yehova mpe bakemangaka kusala mimeseno ya buala yina kele ve na nguizani na Biblia, yina kele mingi na buala na bau. Yinki mutindu makabu na beno saduluaka samu na kusadisa bau?

 Na Mexique, bampangi na beto ya dikanda ya huilchol b, na bamongo ya Jalisco mangaka kukota na mimeseno ya mabundu yina vuandaka zitisa kikansasa na bau ve. Kasi, yasalaka ti bantu yankaka ya buala na bau fuemina bau. Na kilumbu ya 4 Décembre 2017, kimvuka mosi ya bantu kuendaka nuanisa mua kimvuka ya Bambangi ya Yehova mpe bantu yankaka yina vuandaka kintuadi na bau. Bakukaka bau na buala, babebisaka bayinzo na bau mpe bima na bau mpe batubilaka bau ti bakekufua bau kana bamevutuka.

 Bambangi ya Yehova ya bambanza ya pembeni pesaka lusadusu na nsualu na bampangi na beto. Kasi yinki yalombaka samu bavutuka na bayinzo na bau? Mpangi mosi na nkumbu ya Agustin metuba: “Beto kele ve na dikoki ya kubaka avoka mpe beto kele ve na muntu yina lenda sadisa beto na diambu metadila minsiku ya buala.”

 Lokola kimpuanza ya bampangi na beto kumaka na kumekama, filiale ya Amerique centrale bakaka nzengolo kondua kuvingila. Ntete ntete, balombaka na bamfumu ya Leta ya buala yango basala anketi. Na manima, komite ya bantuadisi ya Kimvuka ya Ntuadisi pesaka bau nzila basala kintuadi na Departema yina ketadilaka mambu ya minsiku ya biro ya nene samu na kunata mambu ya bampangi na beto na tribinale. Nsuka nsuka mambu kumaka na tribinale ya nene ya buala ya Mexique.

 Kimvuka mosi ya baavoka ya babuala mingi bongisaka mambu mbotembote samu na kukotila bampangi na beto, batubaka ti lokola nzingulu ya makanda fueti zitusua, bantu ya makanda mpe fueti zitisa mpe kutanina kimpuanza ya konso muntu. Yinsua ya muntu kele na frontiere ve.

 Na kilumbu ya 8 Juillet 2020, tribinale ya nene zengaka mambu yango mpe Bambangi ya Yehova nungaka. Tribinale yango tubaka ti bampangi nionso yina bakukaka kele na yinsua ya kuvutuka na makanda na bau. Agustín yina beto tubilaka na ebandeli, kintuadi na bampangi yankaka monisaka butondi na bau na bampova yayi: “Beto kele mpenza na butondi mpe na kiese samu na yina bampangi mesala samu na beto! Kana basadisaka beto ve, beto zolaka sala kima mosi ve.”

 Bampangi na beto ya San Juan de Ilumán, buala mosi na Équateur, kisika bantu ya Otavalo kezingaka, bau diaka bateleminaka bau. Na 2014, na manima ya kubaka yinsua nionso, babandaka kutunga Yinzo ya Kimfumu. Kasi, mfumu ya dibundu mosi tindaka bantu kuluta 100 bakuenda tubila Bambangi ya Yehova na kingolo balemba kutunga Yinzo ya Kimfumu. Bantu yankaka ya buala yango mpe pekisaka nsambudulu na bau.

 Departema ketadilaka mambu ya minsiku ya filiale ya Équateur salaka kintuadi na biro ya nene samu na kukotila bampangi na beto babaka kimpuanza ya nsambudulu. Bantu ya buala lembaka kutelemina bampangi na beto mpe bapesaka bau yinsua ya kutatamana mpe kumanisa kutunga Yinzo ya Kimfumu na bau. Kasi samu na kutanina yinsua ya bampangi na beto na bilumbu kena kuiza, baavoka na beto lombaka na tribinale ya nene yabaka nzengolo samu na diambu mosi ya mfunu: Bantu yina kezingaka na babuala fueti zitisa yinsua ya bantu nionso na ntoto ya mvimba?

 Na kilumbu ya 16 Juillet 2020, bampangi na beto yina kele baavoka na buala ya Équateur nataka mambu na tribinale yina ketadilaka mambu ya kuzitisa bayinsua ya bantu samu na kukotila kimvuka. Yakele Tribinale ya nene ya yinsi. Katula yau, bampangi yiya yina kele baavoka ya mambu metadila yinsua ya ntoto ya mvimba bakaka ndinga na tribinale yango. Samu na maladi ya COVID-19, bavuandaka na bayinsi ya kusuasana mpe basololaka na tribinale na nzila ya videoconference. Yavuandaka mbala ya ntete tribinale pesa yinsua na ekipe ya baavoka yina kena kukotila Bambangi ya Yehova batuba mutindu yina c. Ekipi yango tubilaka mambu yina bamfumu yina ketadilaka mambu ya minsiku tubaka samu na kumonisa ti konso muntu ya buala kele na bayinsua na yandi.

 Bampangi na beto ya Otavalo kena kuvingila na nsatu nionso nzengolo ya tribinale. Lusadusu yina bamebaka mesimba mpenza bantima na bau. César, yina kele nkulutu ya kimvuka ya quechua d’Ilumán metuba: “Na nzila ya nkubukulu na yandi, Yehova kaka nde kena kusala mambu ya nene samu na bantu fioti.”

 Baavoka nionso yina landilaka mambu yango kele Bambangi ya Yehova, mpe bakele na kiese yakupesa lusadusu na bau kondua bafuta bau. Kasi, kutadila mambu yango, kubongisa yau mpe kukuenda samba na tribinale lombaka ntangu mpe mbongo. Baavoka mpe bampangi na beto yankaka lutisaka bantangu 380 mpe bantangu kana 240 samu na kubangula badokima samu na kukuenda samba na Mexique. Baavoka 40 yina katukaka na bayinsi ya mutindu na mutindu lutisaka bankama ya bantangu samu na mambu ya Équateur. Yinki mutindu badepanse nionso salamaka? Na nzila ya makabu na beno na kulandaka mayele ya mutindu na mutindu yina kele na donate.pr418.com. Matondo samu na kikadulu na beno ya kukaba.