Lukutakanu ya nene ya bilumbu tatu ya 2020 vuandaka ya mfunu mingi—yavuandaka lukutakanu na beto ya nene ya ntete yina baanrejistreke mpe batulaka na Internet samu bantu na yinza ya mvimba landa! Nzokande, na Malawi mpe na Mozambique, bampangi na beto mingi landaka lukutakanu ya nene kondua kusadila Internet. Yinki mutindu yasalaminaka?

 Samu na buala ya Malawi mpe Mozambique, Komite ya bantuadisi mpe Komite ya malongi ya Kimvuka ya Ntuadisi pesaka nzila ti lukutakanu ya nene luta na TV mpe na radio. Samu na yinki yavuandaka mfunu kusala mutindu yina? Ntalu ya mbongo mingi bakefutaka na Malawi samu na Internet kuluta babuala mingi na yinza, na yau, Bambangi ya Yehova fioti kaka kevuandaka na dikoki ya kusadila Internet. William Chumbi, mpangi ya Komite ya filiale ya Malawi metuba ti: “Radio mpe televizion vuandaka mutindu kaka mosi ya kupesa bampangi madia ya kimpeve.” Luka Sibeko, mpangi yankaka ya Komite ya filiale ya Malawi, mebuela: “Kana beto lutisaka ve lukutakanu ya nene na nzila ya televizion mpe radio, bampangi fioti kaka ya terituare ya filiale na beto zolaka vuanda na dikoki ya kulanda yau.” Na Mozambique diaka, katula mpasi ya Internet, bampangi fioti kaka vuandaka na dikoki ya kubaka baapareyi ya mbote samu na kulanda lukutakanu ya nene.

 Samu na maladi ya yimbi ya COVID-19, balukutakanu ya kimvuka vuandaka luta na bashene yankaka ya televizion mpe ya radio. a Bampangi na beto kuendaka solola na bashene yango samu na kulomba diaka bawola yankaka samu na kulutisa lukutakanu ya nene.

 Na Malawi, bampangi na beto vuandaka na mukakatano mosi. Mbala mingi, bashene kekatulaka wola mosi na bakliyan na bau. Bashene kekukitungisaka samu mbala yankaka baprograme ya yinda kesepedisa ve bantu yina kelandaka bashene na bau. Kasi bampangi na beto sasilaka bau ti kisalu na beto kesadisaka bantu nionso. Ata na ntangu ya konfinema, beto kena kusadisa bantu bakuwa nsangu ya mbote ya Biblia ya kubomba, yina lenda sadisa bantu bavuanda bana ya buala ya mbote mpe bavuanda na luzingu ya mabuta yina kele na kiese. Ntangu bakuwaka mutindu yina, bashene yango ndimaka kubuedila bampangi bawola.

 Na Malawi, lukutakanu ya nene lutaka na shene mosi ya televizion mpe na shene mosi ya radio, buala ya mvimba kevuandaka na dikoki ya kulanda bashene yango nionso zole mpe bamilion ya bantu lendaka kuwa yau. Na Mozambique, lukutakanu ya nene lutaka na shene mosi ya televizion mpe na bashene 85 ya radio.

 Na babuala yango nionso zole, badolare 28 227 b bimisamaka samu na kulutisa lukutakanu ya nene na nzila ya televizion mpe kana badolare 20 000 samu na kulutisa yau na nzila ya radio. Ntalu ya radio kesobaka na badolare 15 samu na shene ya fioti tii na badolare 2 777 samu na shene yina buala ya mvimba kelandaka.

 Bampangi na beto salaka ngolo samu na kusadila na mutindu ya mbote makabu yina pesamaka. Na kifuani, na Malawi, bampangi nungaka kusolola na bantu yango samu bandima kubaka mbongo na ntalu ya kukita, bakitisaka yau na 30%. Yau salaka ti babikana na badolare 1 711. Na Mozambique, bashene yankaka vuandaka pene ya kukitisa ntalu na bau samu beto kefutaka mutindu beto mewizana mpe na ntangu yina mefuana.

 Bampangi na beto sepelaka mingi kutala mpe kuwa lukutakanu ya nene na bashene ya babuala na bau. Patrick, nkulutu mosi na Malawi, metuba: “Beto kena kutonda mingi bampangi ya Kimvuka ya Ntuadisi samu na dikebi bametudila beto na ntangu ya maladi yayi ya yimbi.” Isaac, diaka na Malawi, metuba: “Beto vuandaka ve na baapareyi yankaka, na yau, beto vuandaka mpenza na butondi mingi mutindu nkubukulu ya Yehova kubikaka mambu samu beto landa lukutakanu ya nene na nzila ya radio. Na nzila ya nkubukulu yango, dibuta na munu ya mvimba landaka lukutakanu ya nene. Beto tadilaka yau lokola nzola ya Yehova samu na bisadi na yandi.”

 Lukutakanu ya nene ya 2020 vuandaka lukutakanu ya nene ya ntete samu na nsamuni mosi na Mozambique. Yandi metuba: “Nkubukulu ya kutala lukutakanu ya nene na nzila ya TV mebambula munu ti Yehova kele Nzambi Nkua-Ngolo-Nionso. Maladi ya yimbi pekisaka yandi ve kupesa beto madia ya kimpeve mpe yandi pesaka munu yina munu vuandaka na yau nsatu samu na kukumisa kiminu na munu ngolo na yinzo na munu. Munu monaka mambu yina kena kumonisa ti bisadi ya Yehova kele na nzola. Munu mendimisama ti yakele dibundu ya kedika.”

 Nkulutu mosi na nkumbu ya Wyson metuba: “Munu kele na kiese ya kuvutula matondo samu na mutindu yina nanga ya kukuikama taninaka beto na ntangu ya maladi yayi ya yimbi. Nkubukulu yayi ya kulutisa lukutakanu ya nene na nzila ya radio mpe ya televizion sadisaka mingi kati na beto yina kele na mukakatano ya mbongo na buala na beto yayi kele mpenza na kimputu samu na kulanda programe.”

 Samu na lukutakanu ya nene ya 2021, Komite ya bantuadisi mpe Komite ya malongi bakaka diaka bankubukulu samu lukutakanu ya nene luta na nzila ya televizion mpe ya radio na bisika yankaka. Yinki mutindu beto kesala samu na badepanse ya lukutakanu yango ya nene? Na nzila ya makabu ya kisalu ya yinza ya mvimba, yina mingi na yau kepesamaka na nzila ya mitindu yina beto kekuta na donate.pr418.com. Matondo mingi samu na makabu na beno.