Na bilumbu yayi ya nsuka, beto fueti kukivingila ‘kuwa bamvita mpe bansangu ya bamvita.’ (Matayo 24:6) Kasi, kana bampangi na beto kena kumona mpasi samu na mambu yango, bakebakaka lusadusu yina bakevuandaka na yau nsatu. Lapolo ya Kimvuka ya Ntuadisi No 3 ya 2022 monisaka bansangu ya kukindisa samu na bisalu ya kupesa lusadusu na Europe de l’Est samu na bantu yina kena kukutana na mpasi ya mvita na Ukraine. Yinki mutindu lusadusu yango bongisamaka atako mvita kena kusalama? Yinki lusadusu yango kena kusala na bampangi na beto na Ukraine?

 Na kilumbu ya 24 Février 2022, kilumbu yina mvita bandaka na Ukraine, komite ya bantuadisi ndimaka mbongo bimisama samu na kubongisa bisalu ya kupesa lusadusu na bampangi na beto na Ukraine. Filiale ya Ukraine salaka bakomite 27 ya kupesa lusadusu yina bandaka mbala mosi kusumba bima kaka na buala yango mpe kukabula yau.

 Samu na yau, bampangi ya biro ya nene ya Bambangi ya Yehova bandaka mbala mosi kukanisa mambu yankaka yina lenda salama samu na kupesa lusadusu. Komite ya bantuadisi mpe komite ya kubimisa mikanda, yina kele bakomite ya Kimvuka ya Ntuadisi lombaka na departema ya yinza ya mvimba ya kusumba bima basala kintuadi na bamonisi ya filiale ya Ukraine mpe ya Pologne samu na kukokisa mambu yango mpe kubongisa mutindu ya kusala yau. Bampangi ya departema ya kusumba bima, ya departema ya kutinda bima, ya departema ya mambu metadila kusamba ya konso filiale, mpangi mosi ya komite ya filiale ya Ukraine, mpe bampangi ya departema ya yinza ya mvimba ya kusumba bima vuandaka kutakana konso kilumbu samu na kutuadisa bisalu yango.

 Mpangi Jay Swinney ya departema ya yinza ya mvimba ya kusumba bima metuba, “Ya ntete, yalombaka beto zaba yinki vuandaka nsatu, beto vuandaka na nsatu ya kupesa bima ya kudia mpe bima ya kutudila bunkete yina bampangi mesanaka na yau. Kasi, kuzaba yina bavuandaka na yau nsatu vuandaka kaka mosi ya mambu. Yalombaka diaka beto zaba mutindu ya kutinda bima yango na Ukraine na yinsi ya mvita, na mutindu ya mbote mpe na nsualu.”

 Na kilumbu ya 9 Mars 2022, bampangi zabaka yina bampangi na beto ya Ukraine vuandaka na yau mpenza nsatu. Bakoli yina vuandaka na bima ya kudia, na kifuani babuati ya misuni mpe ya bambizi, bambuma, loso, mpe madezo, buela diaka bima ya bunkete na kifuani basavon, mpe bapapie ya tualeti. Na ntangu yango, yamonanaka ti samu na kukokisa bansatu ya muntu mosi samu na basabala yiya, bima yango kelomba badolare kana 65. Lokola diambu yango tadilaka mafunda ya bampangi, komite ya bantuadisi ndimaka mbongo ya ntalu ya mingi bima samu na kupesa lusadusu. Kasi yinki mutindu kutinda bima yango kondua ti bampangi na beto vuanda na kivonza?

 Na kilumbu ya 13 Mars bampangi zole ya Pologne mekaka kutinda bima kukatuka na filiale ya Pologne tii na depo mosi pene ya mbanza ya Lviv, na Ukraine. Kilumbu mosi tekila bakuenda, bampangi ya dibuta ya betele ya filiale ya Pologne mpe ya Ukraine sadisaka bau samu babongisa vuayaje na bau. Filiale fulusaka formilere mosi samu bampangi yango luta frontiere samu na kukuenda pesa lusadusu ya bima ya kudia, bakamion vuandaka na bidimbu ya puelele yina vuandaka monisa ti bamekuenda kaka kupesa lusadusu ya bima ya kudia, mpe basalaka kintuadi na bampangi ya buala ya Ukraine samu na kuzaba nzila ya mbote kukatuka na frontiere. Na nzila ya kubongama mbote mpe na lusakumunu ya Yehova, lusadusu yango kumaka na bakomite ya kupesa lusadusu na bawola 24 na manima ya kukumisa yau na mbanza ya Lviv, mpe bampangi vutukaka na Pologne kondua kivonza.

 Atako banungaka kusala vuayaje ya ntete, bampangi nataka kaka bima ya kudia yina kokaka ve tone mosi. Yavuandaka lomba diaka batone 200 tindama! Yinki mutindu kitezo ya mingi ya mutindu yina lendaka tindama mpe kukabulua na nsualu?

 Na manima ya kutala na jw.org mutindu bampangi na beto vuandaka na mpasi samu na mambu yina kena kusalama na Ukraine, bantu na yinza ya mvimba vuandaka na nsatu ya kupesa lusadusu. Mingi kati na bau kevuandaka ntama, bamonaka mbote kutula makabu samu na kisalu ya Bambangi ya Yehova na yinza ya mvimba, na kuzabaka ti mbongo yango kesadulua mbote. Bayankaka yina kevuandaka pembeni pesaka ntangu na bau, ngolo na bau, mpe bima na bau ya kuvukila samu na kupesa lusadusu. Tala ndambu ya bifuani.

 Na Pologne, bavolontere bongisaka mafunda ya bakoli samu na kupesa lusadusu, mpe bana salaka badesen na maboko. Mpangi Bartosz Kościelniak yina kele na departema ya kusumba bima na filiale ya Pologne metuba, “Na maluaku mingi, munu vuandaka tanga Nkunga 110:3 yina metuba, ‘bantu ya [Yehova] kekukipesa na luzolo na bau mosi.’ Kasi na kutala bankama ya bampangi ya bavolontere yina kele pene samu na kukuiza pesa lusadusu, munu monaka kedika ya bampova yango.”

 Mbangi ya Yehova mosi yina kele mfumu na kompani mosi ya transpore na yinza ya mvimba, pesaka bakamion na yandi mpe karbiran mingi samu na bakamion, yandi metuba: “Samu na munu, yakele diluaku samu na kumonisa ti munu kezolaka bampangi na munu mpe Yehova. Munu kele mpenza na kiese mutindu munu pesaka lusadusu yango.” Yamemonana ti kana balitre kuluta 7 700 ya karbiran pesamaka, mpe bampangi sadilaka ntangu na bau, ngolo na bau, samu na kutambula na bakilometre kana 48 000 samu na kukuenda pesa bima ya lusadusu!

 Na nzila ya kikadulu ya kukipesa mpe nzola ya bampangi ya banketo mpe ya babakala, na kilumbu ya 28 Mars—bilumbu 15 kaka na manima ya vuayaje ya ntete samu na kukuenda bika bima—batone 100 ya bima ya kudia, ya bima samu na bunkete, mpe ya bilongo tindamaka na Ukraine! Diaka, lokola Bambangi ya Yehova pesaka makabu ya bima na bau mpe makabu ya bakompani yina ketekilaka beto bima, ntalu ya mbongo yina bongisamaka samu na bima ya kutinda kuna kitaka mpenza. Tii bubu yayi, Bambangi ya Yehova metinda batone kuluta 190 samu na kutinda lusadusu ya bima na Ukraine. Yinki lusadusu yango salaka na bampangi na beto?

 Ntangu kaka bakoli yango kumaka na mbanza ya Lviv, bakomite ya kupesa lusadusu ya buala ya Ukraine kabulaka yau na bantu yina vuandaka na nsatu ya lusadusu. Bakoli yango tindamaka na bambanza ya mutindu na mutindu, bambanza yango yankaka vuandaka na bakilometre 1 300 kukatuka na mbanza ya Lviv. Ata kana bampangi na beto vuandaka na makoki, bisalu yango lombaka ntangu. a

 Markus Reinhardt, yina kele mpangi ya komite ya filiale ya Ukraine metuba: “Na ntangu yayi ya mpasi, bampangi mingi monaka na meso na bau mosi nzola ya Yehova mpe mambote ya kulanda ntangu nionso lutuadusu ya nkubukulu na yandi—ata kana diambu ya mpasi bima ntete ve. Na kifuani, bakekindisaka beto nionso beto lundaka na bayinzo na beto mua maza mpe bima ya kudia yina lenda sadisa samu na basabala mingi. Na diambu metadila lutuadusu yango, Anton nkulutu na mbanza ya Kiev tubaka: ‘Nkubukulu ya Yehova bongisaka beto samu na mambu ya mpasi, mpe beto kele na butondi samu na yau. Kuvuanda na bima ya kudia mpe maza yina melundamaka mpe kuvuanda na radio taninaka mpenza luzingu na beto.’ Beto kele na butondi mutindu bampangi lundaka lutuadusu yango na ntima, samu yapesaka filiale ntangu samu na kubongisa bisalu ya kupesa lusadusu.”

 Yinki mutindu bampangi kukimonaka ntangu lusadusu kuminaka bau? Mykola mpe Zinaida, yina kezingaka na Kharkiv, memonisa banguilu na bau na bampova yayi: “Nzola na beno mesimba mpenza ntima na beto. Matondo mingi samu na bima ya kudia mpe bilongo. Kondua ntembe, beto lenda mona diboko ya Yehova na nzila na yau.” Valentyna kezingaka kaka na kizunga yango. Yandi metuba: “Banda na ebandeli ya mvita, bantu vuandaka vingila ntangu ya yinda na ntuala ya bamagazen samu na kusumba bima ya kudia. Yavuandaka ntangu nionso pete ve samu na kusumba bima yina beto vuandaka na yau nsatu. Kasi Yehova zabaka mpe yandi vuandaka mona diambu yango. Yandi ponaka bampangi samu na kupesa lusadusu ya bima ya kudia na bayinzo na beto, mpe bakoli yango vuandaka na bima yina beto vuandaka mpenza na yau nsatu! Na bantangu ya mpasi mutindu yina, na ntangu yakena kumonana lokola kivuvu kele ve, beto kemonaka ti Yehova mpe nkubukulu na yandi kena kutanina beto na mutindu mosi ya spesiale. . . . Yakele mpenza kiese kubaka lusadusu na yandi na ntangu yina beto kele mpenza na nsatu na yau.”

 Yevhen, Iryna, mpe Mykyta, yina tinaka na Marioupol metuba: “Beto kele mpenza na butondi samu na lutanunu na beno mpe samu na lusadusu na beno na dibuta na beto. Beno ndimina beto ti, yakuizaka mpenza na ntangu yina mebonga. Beno mezaba, na ebandeli, beto vuandaka kanisa ti bakoli yango vuandaka kaka na mua bima beto lenda sadila samu na mua bilumbu, kasi ntangu beto zibulaka yau, beto bakusaka ti nzola na beno diaka vuandaka na kati!”

 Kondua ntembe, nge lenda mona mutindu mpeve ya Yehova mpe lutuadusu na yandi vuandaka mpenza na bupusi na diambu metadila kutinda lusadusu ya bima ya kudia na bisika ya ‘bamvita mpe bansangu ya bamvita.’ Makabu na beno samu na kisalu yina kena kusalama na yinza ya mvimba, yina mingi na yau pesamaka na nzila ya donate.pr418.com, vuandaka na mfunu samu mambu yango salama. Beto kele na butondi mingi samu na kikadulu na beno ya kukaba!

Kutinda lusadusu na nsualu mpe na lutanunu

1. Kilumbu ya 24 Février 2022: Komite ya bantuadisi mendima mbongo bima samu na kutinda lusadusu na Ukraine, yasadisaka samu filiale banda kupesa lusadusu

2. Kilumbu ya 24 Février tii ya 8 Mars 2022: Filiale ya Ukraine mesumba bima na kati ya buala mpe yamebanda kukabula yau na bakomite ya kupesa lusadusu. Filiale kubamaka diaka samu na kubaka mpe kukabula bakoli yina katukaka na buala ya Pologne

3. Kilumbu ya 9 Mars 2022: Komite ya bantuadisi mendima ti lusadusu ya bima ya kudia tindama na Ukraine

4. Kilumbu ya 10 tii ya 12 Mars 2022: Bamemeka kutinda bima ya kudia mpe bima yankaka kukatuka na filiale ya Pologne tii na Lviv, na Ukraine

5. Kilumbu ya 13 Mars 2022: Bamenunga kusala vuayaje ya ntete samu na kumeka kutinda bima ya kudia kukatuka na Pologne tii na Lviv, na Ukraine

6. Kilumbu ya 14 tii ya 16 Mars 2022: Na kati ya Yinzo ya balukutakanu ya nene pene ya Poznan, na Pologne, bavolontere ya Departema ya kisalu ya kutunga kena kubongisa bakoli ya kupesa lusadusu, yina kele na bima ya kudia mpe bima ya bunkete

7. Kilumbu ya 17 Mars 2022: Bilumbu yiya (4) na manima ya kununga kusala vuayaje ya ntete samu na kumeka kutinda bima ya kudia, batone 13 ya bakoli metindama na frontiere ya buala ya Ukraine

8. Kilumbu ya 21 tii ya 27 Mars 2022: Bamesala kaka mutindu yina samu bakoli yankaka ya kupesa lusadusu sangana kisika mosi na Pologne mpe kutinda yau na Ukraine mpe na manima kukabula yau na bizunga yina kele na nsatu ya lusadusu na yinsi ya bawola 24

9. Kilumbu ya 28 Mars 2022: Bilumbu 20 na manima ya nzengolo ya komite ya bantuadisi, batone 100 ya bima ya kudia, ya bima ya bunkete, mpe ya bilongo samu na lusadusu tindamaka na Ukraine

 Tii bubu yayi, Bambangi ya Yehova metinda batone kuluta 190 ya bima samu na kupesa lusadusu na Ukraine.