Na mvula 2020, bantu mingi kutanaka na bivonza yina kebimaka yau mosi, mpe na manima, maladi ya COVID-19 bandaka na yinza ya mvimba. Yinki mutindu Bambangi ya Yehova sadisaka bantu yina kutanaka na bivonza?

 Na kuzingila na mvula ya kisalu ya 2020, a Komite ya bantuadisi ya Kimvuka ya Ntuadisi pesaka nzila ti basadila badolare milion 28 b samu na kusadisa bampangi kana kivonza mebima. Mbongo yango sadisaka bampangi yina kutanaka na bivonza kuluta 200 yina bimaka—na kati na yau, maladi ya COVID-19, mipepe ya ngolo, maza yina fulukaka na babuala na Afrique, kukondua madia na Venezuela, mpe kuyuma ya maza na Zimbabwe. Mbongo yina bapesaka sadisaka samu na kusumba bima ya kudia, maza, bisika ya kuleka, bilele, mpe bilongo, buela diaka bilongo ya kusukudila yinzo, bima ya kubongisila mpe kutungila bayinzo. Tala ndambu ya bifuani yina kisalu ya kupesa lusadusu salaka.

 COVID-19. Na yinza ya mvimba, maladi yango ya yimbi niokolaka bampangi na beto na nzutu, na makanisi, mpe yamekitisa ekonomi na bau. Samu na kusadisa bau, Bakomite ya kupesa lusadusu kana 800 salamaka na yinza ya mvimba. Bakomite yango vuandaka landela bansatu ya bampangi mpe bavuandaka pesa balapolo mbala mosi, balapolo yango vuandaka sadisa Komite ya bantuadisi yazaba mutindu ya mbote ya kutuadisa bisalu ya kupesa lusadusu.

 Na mvula yango, Bakomite ya kupesa lusadusu sadisaka bampangi babaka bima ya kudia, maza, bisadulu samu na kutula bunkete, mpe bilongo ya munganga. Na babuala yankaka, Bakomite yango salaka kintuadi na bankulutu samu na kusadisa bampangi babaka lusadusu ya Leta.

 Ata bantu yina kele Bambangi ya Yehova ve kemonaka mutindu beto kesadisaka bampangi. Na kifuani, Field Simwinga, komisere ya kizunga ya Nakonde, na Zambie, zabisaka bampangi ti: “Beno mekotisa beto mfuka na mutindu beno mepesa mabuta yina mekutana na bivonza bima yina bakele na yau nsatu na ntangu yina mefuana.”

 Bima ya kudia na Angola. Maladi ya yimbi ya COVID-19 manisaka bima ya kudia na Angola mpe mua ndambu yina bikanaka buelamaka ntalu. Yakumaka mpasi samu na bampangi na beto kusumba bima ya kudia.

 Beto lombaka filiale ya Brésil yatindila bampangi na beto ya Angola bima ya kudia. Samu na kusadila mbote mbongo yakupesa lusadusu, balongukaka mbote mambu metadila kusumba bima, mpe basumbaka bima mingi ya kudia na mbala mosi. Yau yina, kusumba mpe kutinda kitunga mosi ya bima ya kudia bakaka badolare 22, mpe konso kitunga vuandaka na bakilo 20 ya bima ya kudia, na kifuani: loso, madezo, mpe mafuta. Tii bubu yayi, bitunga 33 544 tindamaka—nionso mesala batone kana 654 ya bima (721 U.S. tons). Kana beto mebuela bima yina babakaka na Angola, yasadisaka bantu kuluta 50 000!

 Yinki mutindu bampangi na beto monaka samu na lusadusu yango? Alexandre, yina kevuandaka na kisika mosi ya mua ntama kuna na Angola, metuba: “Memona ti yayi kele kidimbu yina memonisa ti Yehova kezolaka munu mpe mukele munu mosi ve. Mukele na mfunu na nkubukulu ya Yehova!” Mariza, yina keyundulaka bana yandi mosi, metuba: “Yehova kuwaka kudila na munu. Munu kena kupesa yandi mpe nkubukulu na yandi matondo!”

 Lusadusu samu na kuyuma ya maza na Zimbabwe. Na mvula ya kisalu ya 2020, maza yumaka ngolo mpenza na Zimbabwe, mpe yau salaka ti bamilion ya bantu niokuama na nsatu. Mafunda ya Bambangi ya Yehova na Zimbabwe vuandaka ve na bima ya kudia.

 Bakomite ya kupesa lusadusu 5 salamaka samu na kupesa bampangi na beto bima ya kudia. Bankama ya bampangi pesaka maboko samu na kukanga bima yango, kunata yau, to kupesa bantomabilu na bau. c Na mvula ya kisalu ya 2020, tosadilaka badolare 691 561 samu na kusadisa bantu kuluta 22 700!

 Na bisika yankaka, ntangu bima ya kupesa lusadusu kumaka, yakutaka bampangi kele diaka na kima ya kudia ve. Ntangu bima ya kudia kumaka, bampangi na beto kumisaka Yehova. Bampangi yankaka kutu bandaka kuyimbila miyimbu ya Kimfumu.

 Na buala mosi, bampangi zole yina mefuilaka babakala bakuendaka na lukutakanu mosi salamaka na buala samu na kukabula bima yina ONG mosi pesaka. Kasi, lukutakanu yango kumaka kutubila mingi nde mambu ya politiki. Na yau, bampangi na beto bakaka nzengolo ti bakendima ve mambu yina bamelomba bau basala samu na kubaka lusadusu. Ntangu bakatukaka na lukutakanu yango, basekaka bau mpe batubilaka bau ti, “Beno meka ve kukuiza lomba beto bima ya kudia!” Nzokande, na manima ya basabala zole kaka, bampangi na beto yina vuandaka kabula bima ya kudia, bakumaka na buala yango, mpe bapesaka bampangi na beto yina ya banketo lusadusu ya bima ya kudia—tekila kutu bima ya ONG kuma!

 Kupesa lusadusu na Zimbabwe pesaka diaka kimbangi ya mbote. Na kifuani, tala diambu yina kuminaka Prisca, yina kevuandaka na buala mosi ya fioti. Atako kuyuma ya maza bimisaka mambu mingi ya mpasi, Prisca bikaka kilumbu ya tatu mpe kilumbu ya tanu samu na kisalu ya kusamuna, ata na ntangu ya kubalula ntoto ya bilanga. Bantu ya buala vuandaka vueza yandi ti: “Nge kekufua dibuta na nge na nsatu samu kaka na kusamuna.” Prisca vuandaka vutudila bau ti: “Yehova kesundolaka ata fioti ve bisadi na yandi.” Ntangu fioti kaka na manima, yandi bakaka lusadusu yina nkubukulu pesaka. Yakamuisaka bantu yankaka yina kevuandaka pene na yandi, mpe batubilaka Prisca ti: “Nzambi sundolaka nge ve, yau yina tokele na nsatu ya kuzaba mambu na yandi.” Bubu yayi, bantu 7 kati na bantu yina kevuandaka pene na yandi kena kulanda balukutakanu ya kimvuka na radio.

 Lokola beto mekuma pene ya nsuka, beto ketatamana kukutana na bivonza yina kebimaka yau mosi. (Matayo 24:3, 7) Matondo mingi na mutindu beno kena kupesa makabu na kulanda mayele ya mutindu na mutindu yina kele na donate.pr418.com. Yakesadilua samu na kusadisa na ntangu yina mefuana bantu yina kele na nsatu ya lusadusu.