“Kimvuka ya Ntuadisi bakaka nzengolo ti, kana bipekiseli ya bamfumu ya Leta kele ve, bimvuka nionso mekindusua na kuvutukila kusala balukutakanu na Bayinzo ya Kimfumu kubanda na kilumbu ya 1 avril.” Batulaka luzayisu yango na jw.org na ebandeli ya ngonda ya mars 2022, yasepedisaka mpenza Bambangi ya Yehova ya yinza ya mvimba. Kasi maladi ya COVID-19 manisaka ntete ve. a Yinki bansobolo mpe bisadulu lombamaka samu na kutanina bantu yina mekutakana samu babika baka maladi yango? Bayinzo ya Kimfumu na beto kevuanda ya kubongama samu na kuyamba bantu, na manima ya kusala bamvula zole kondua kukutakana mbunzu na mbunzu?

 Ya kedika, bampangi na beto kukibongisaka bangonda mingi samu na kuvutukila balukutakanu na Bayinzo ya Kimfumu.

 Ngonda mosi na manima ya kulemba kukutakana na Bayinzo ya Kimfumu na 2020, Departema ya kusala baplan mpe kutunga na yinza ya mvimba (WDC), na Warwick, na New York, bandaka kutadila mutindu maladi ya COVID-19 kevuanda na bupusi na mutindu ya kusadila Bayinzo ya Kimfumu na beto mpe yina beto lenda sala samu na kutanina bisika na beto ya balukutakanu.

 Mbala mingi, bansatu ya bisika mingi na yinza vuandaka suasana na ya bisika yankaka. Matthew De Sanctis, yina kesalaka na Departema ya kusala baplan mpe kutunga na yinza ya mvimba (WDC), metuba: “Na babuala yankaka, diambu ya mpasi kele kukondua bisika yina mebongisama samu na kusukula maboko. Kana Bayinzo ya Kimfumu mekondua maza, yalombaka kusumba maza to kukuenda baka yau na yinto to na dibulu mosi. Na babuala yankaka, bamfumu ya Leta yankaka sobaka bansiku na bau na diambu metadila kusadila ba climatiseur, bima yina kepesaka madidi, mpe kutula bidimbu samu na mavimpi mpe bunkete.”

 Yinki bampangi na beto salaka samu na kuzitisa bansobolo yango? Mpangi Matthew metuba samu na Bayinzo ya Kimfumu mingi ti, “kusumba bima ya mindondo ve mpe ya ntalu ve kele mbote mingi mpenza.” Na kifuani, na Papouasie-Nouvelle-Guinée, batulaka bisika ya kusukula maboko na bakantini ya balitre 20 yina bametulaka barobine. Bampangi na beto vuandaka na dikoki ya kupesa bima yina lombamaka samu na kutula bisika ya kusukula maboko na Yinzo ya Kimfumu, nionso salaka kaka ntalu ya mbongo ya badolare 40. Basumbaka bisadulu ya kitoko ya kusukudila maboko kuluta 6 000 na Asie samu na Bayinzo ya Kimfumu na Afrique.

 Bansobolo yankaka yina salamaka vuandaka, kutula to kusoba bavantilatere mpe baapareyi yina ketulaka mupepe samu mupepe ya mbote vuanda na Yinzo ya Kimfumu. Bimvuka mingi sumbaka yinti yina baketudilaka mikro samu mikro bika simbama na maboko ya bantu. Bangolo salamaka samu kivonza ya kubaka maladi yango bika vuanda mingi, na kifuani kutula bunkete mbala na mbala na bisika yina bantu mingi kesimbaka, na kifuani na bikangulu ya baporte mpe na barobine. Na ba wc ya bimvuka yankaka, batulaka bisika ya kusukula maboko yina bantu lenda sadila kondua ti basimba robine na yau. Na Chili, bisadulu yina bavuandaka na yau nsatu pesaka mbongo ya badolare kana 1 400 samu na Yinzo ya Kimfumu mosimosi.

Ntangu bakena kusala ti Bayinzo ya Kimfumu tanunua mbote, bampangi na beto salaka diaka ngolo samu na kusadila makabu ya bampangi na mutindu ya mbote. Na kifuani, na babuala yankaka, lokola bavuandaka futisa ve mpaku, bampangi bakaka mambote na diluaku ya kusumba bisadulu ya kusukudila maboko mpe bayinti ya kutudila bamikro. Babiro ya bafiliale salaka kintuadi samu na kusumba bima mingi kuluta mutindu yakesalaminaka. Babiro ya bafiliale mpe departema ya kusumba bima na yinza ya mvimba bakaka bankubukulu samu na kusumba bima mbala mosi na bakompani, yau salaka ti ntalu ya bima kita fioti mpe beto baka yau na ntangu yina mebonga.

 Bankubukulu yina bakamaka samu Bayinzo ya Kimfumu vuanda bisika mosi yina mebonga, taninaka mpe kindisaka bantu yina bandaka kukutakana diaka na balukutakanu mbunzu na mbunzu. Dulcine, mpangi mosi ya nketo na Pérou, metuba ti yandi vuandaka na “mua kubanga” ntangu yandi kuwaka ti tozola vutukila diaka kusala balukutakanu na Yinzo ya Kimfumu. Yandi metuba, “Munu belaka maladi ya COVID-19 ntangu fioti kaka na manima ya kubanda na yau. Na yau, munu vuandaka kukimona mbote ve samu na kukuenda na Yinzo ya Kimfumu, samu munu vuandaka kanisa ti munu lendaka baka diaka maladi yango. Kasi ntangu munu kumaka na Yinzo ya Kimfumu, munu monaka ti bankulutu salaka mambu mingi samu beto kukimona ti beto kele na lutanunu, na kifuani batulaka bisika ya kusukula maboko mpe bayinti ya kutudila bamikro, mpe bankubuluku bakamaka samu na kutula bunkete tekila mpe na manima ya konso lukutakanu. Nionso yina salaka ti munu mona mutindu ya lutanunu yina munu vuandaka na nsatu na yau.” b

 Sara, mpangi mosi ya nketo yina kevuandaka na Zambie, kutanaka na mukakatano ya mutindu yankaka. Yandi metuba: “Yalutaka bangonda mingi, bakala na munu kufuaka na maladi ya COVID-19. Munu vuandaka kukitungisa samu na mutindu munu kekukimona ntangu munu kekuenda na Yinzo ya Kimfumu samu na mbala ya ntete kondua ti yandi vuanda kintuadi na munu.” Yinki mutindu yandi kena kukimona bubu yayi na diambu metadila kukuenda na Yinzo ya Kimfumu? Yandi metuba: “Kukuenda na Yinzo ya Kimfumu ndimisaka munu ti Yehova kele kintuadi na beto na bilumbu yayi ya nsuka. Bubu yayi, kuluta mutindu yavuandaka, munu kena kumona ti munu kena kubaka balukindusu ya bampangi, bakezolaka munu, mpe munu kena kubaka lusadusu ya bankulutu mpe ya bampangi na munu yankaka.”

 Bampangi na beto Baklisto na yinza ya mvimba kele na butondi mingi na diluaku ya kuvutukila kukuenda na Bayinzo ya Kimfumu. matondo mingi samu na makabu na beno, yina mingi na yau kepesamaka na nzila ya donate.pr418.com. Makabu yango sadisaka beto samu na kukumisa bisika ya nsambudulu ya kuvedila kitoko mpe yasalaka ti yavuanda bisika ya lutanunu samu na bantu yina kekutakana kintuadi.