Na mvula ya kisalu ya 2021, a yinza tatamanaka kuniokuama samu na maladi ya yimbi ya COVID-19. Mutindu disolo “Lusadusu yina kena kupesama na yinza ya mvimba samu na Covid-19 yina kele na yinza ya mvimba” sasilaka yau, beto bimisaka bamilion ya badolare samu na kupesa lusadusu samu na maladi yayi ya yimbi b mpe beto salaka Bakomite ya kupesa lusadusu 950.

 Na yau, ntangu maladi yayi ya yimbi vuandaka bimisa kaka bampasi, bisumbula yankaka yina bantu kebimisaka tungisaka bampangi na beto ya yinza ya mvimba. Samu na kupesa lusadusu na bisumbula yango kuluta 200, komite ya bantuadisi ya Kimvuka ya Ntuadisi ndimaka kubimisa bamilion 8 ya badolare samu na kupesa lusadusu na mambu ya mpasi yina COVID-19 bimisaka. Beto tadila mutindu makabu yina nge kepesaka saduluaka samu na kusadisa bampangi yina kutanaka na bisumbula zole ntama mingi ve.

 Na kilumbu ya 22 Mai 2021, volkan salamaka na mongo ya Nyiragongo, na République Démocratique du Congo. Tiya yina bakebokidilaka lave buisaka bayinzo, bakalasi, mpe bisika yina bakelundilaka maza. Kasi tiya yango vuandaka kaka ve kivonza mosi. Na manima ya bilumbu ya volkan, mipepe ya yimbi ya volkan muanganaka na mbanza ya Goma mpe yasalaka ti na bisika mingi ntoto ningana. Yasalaka ti kuluta katikati ya bantu ya mbanza yango tina. Bankama ya mafunda ya bantu tinaka, bayankaka tinaka na buala ya Rwanda.

 Bambangi ya Yehova kana 5 000 vuandaka kati na bantu yango yina tinaka. Bayinzo ya bampangi yankaka kubuaka samu na volkan yango; miyibi yibaka bima ya bampangi yankaka na bayinzo na bau na manima ya kutina. Bakomite ya kupesa lusadusu ya Rwanda mpe ya RDC salaka kintuadi samu na kupesa lusadusu. Na yina metadila Komite ya kupesa lusadusu mosi, filiale ya Congo (Kinshasa) metuba: “Atako mambu vuandaka ya kubeba na mbanza mpe tekila ya kubaka yinsua samu na kutina, Komite bandaka kukabula madia ya kudia, maza, bisika ya kuleka, mpe bilele ya kuvuata.” Na mbanza mosi yina vuandaka na bampangi na beto kuluta 2 000, Komite ya kupesa lusadusu tulaka batenta, kabulaka bamaske, mpe sasilaka mutindu ya kukitanina samu maladi ya COVID-19 mpe kolera bika tambakana.

 Na bangonda tatu yina landaka na manima ya volkan, bampangi na beto kabulaka batone kuluta 6 ya loso, batone 6 ya farine ya masangu, batone 3 ya mafuta ya kulambila, mpe batone 3 ya maza. Samu na kutanina mbongo, filiale bakaka nkubukulu ya kusumba bima ya kudia mingi kaka na kati ya buala na kisika ya kukuenda sumba yau na buala ya kinzenza.

 “Mpangi mosi ya nketo, yina yinzo na yandi ya yimpa kubuaka samu na volkan, metuba: “Beto lembaka mpenza nzutu mpe beto kumaka na kiadi.” Kasi na manima dibuta na yandi bakaka lusadusu na kinsuni mpe na kimpeve. Yandi metuba: “Na lusadusu ya Yehova, beto kena kubaka kaka bima yina beto kele na yau mfunu. Beto monaka ti Yehova kena kunata bakilo na beto mpe yandi kena kukumisa bakilo na beto pete na kunata.”

 Venezuela kena kukutana na mambu ya mpasi na yina metadila ekonomi banda bamvula mingi. Bampangi na beto kena kuzinga luzingu mosi ya mpasi, bakena kukitungisa samu na nsatu, mpe kinkesi kena kubuelama kaka. Kasi, nkubukulu ya Yehova sundolaka bau ve.

 Na mvula ya kisalu yina mekatuka luta, bamilion 1.5 ya badolare bimaka samu na kusumba mpe kunata bima ya kudia mpe basavon samu na mabuta yina vuandaka na nsatu ya lusadusu. Filiale ya Venezuela metuba: “Yakele pete ve kunata batone 130 ya bima ya kudia na buala ya mvimba konso ngonda mpe kundimisama ti bampangi yina kele na nsatu ya lusadusu baka bima yango.” Samu na kundimisama ti bima yango ya kudia kebola ve, mbala mingi bampangi ketindaka bima yina kezingilaka samu na kubola. Filiale mebuela: “Beto kesumbaka mbala mosi bima mingi ya kudia mpe beto kesumbaka yau na nsungi yina bima ya kudia kevuandaka mingi, samu ntalu ya bima yango kevuandaka ya kukita. Mpe beto kenataka bima yango na mutindu mosi ya mayele samu na kubimisa mbongo mingi ve.”

 Leonel, mosi ya bampangi ya Komite ya kupesa lusadusu na ntangu ya kisumbula na Venezuela, kezolaka kiyekua na yandi. Yandi metuba: “Kisalu samu na kupesa lusadusu kele mfunu mingi. Diluaku yango sadisaka munu munu baka diaka kibakala na manima ya lufua ya nketo na munu na maladi ya COVID-19. Munu kena kutatamana kuvuanda na mambu mingi ya kusala mpe kuvuanda mfunu samu na bampangi yina kele na nsatu ya lusadusu. Munu monaka munu mosi mutindu Yehova kena kutatamana kukokisa bansilulu na yandi na kusundolaka ve bisadi na yandi.”

 Mpangi mosi ya bakala yina bakaka lusadusu mpe yandi mosi diaka salaka lokola mosi ya bampangi na Komite ya kupesa lusadusu na ntama, metuba: “Ntangu yayi munu nde vuandaka na nsatu ya lusadusu. Beto bakaka kaka ve bima ya kinsuni. Bampangi sadisaka munu mpe nketo na munu samu beto bika mona wonga. Bataninaka beto, babombaka beto, mpe bakindisaka beto.”

 Bisumbula yankaka kebimaka kondua bantu zaba ti yakebima. Kasi, nkubukulu ya Yehova kele ntangu nionso na dikoki ya kusosa mpe kupesa balusadusu na mutindu mosi ya nsualu, matondo mingi samu na makabu na beno yina kena kupesama na yinza ya mvimba. Mayele ya mutindu na mutindu samu na kupesa makabu kele na donate.pr418.com. Beto kena kusepela na kikadulu na beno ya kukaba.