Na ngonda ya Mars 2020, ntangu nkubukulu yina ketadilaka mambu ya mavimpi (OMS) pesaka nsangu ya maladi ya yimbi ya COVID-19, bantu mingi ndimaka ve ti maladi yango kemuangana na yinza ya mvimba na manima ya mvula mosi. Samu na maladi yango ya yimbi, bamilion ya bantu, buela diaka ndambu ya Bambangi ya Yehova, niokuamaka na kinsuni, na makanisi, mpe na mambu ya mbongo. Yinki mutindu Bambangi ya Yehova kubamaka mpe pesaka lusadusu na ntangu ya maladi yayi ya yimbi?

 Na lutuadusu ya Komite ya bantuadisi ya Kimvuka ya Ntuadisi ya Bambangi ya Yehova, Bakomite ya Kupesa Lusadusu kana 950 salamaka na yinza ya mvimba samu na maladi ya COVID-19. Na bisika mingi, Bambangi ya Yehova bakaka lusadusu yina pesamaka na bisika bakevuandaka, mpe na bisika yankaka babakaka balusadusu yina katukaka na guvernema. Komite ya Kupesa Lusadusu diaka bakaka bankubukulu samu na kupesa balusadusu na bisika mingi na yinza.

 Beto tadila kifuani ya buala ya Paraguay. Zulunalo mosi tubaka ti lokola maladi yayi ya yimbi sobaka ekonomi ya buala, “bantu ya Paraguay mingi kena kukondua madia ya kudia.” Kasi Komite ya Kupesa Lusadusu ya Paraguay bandaka kukabula bima ya lusadusu samu na basabala zole—bima ya kudia mingi, bankisi samu na kusukula bima mpe yinzo, mpe bima metadila mavimpi samu na dibuta yina kele na bantu yiya. Bima yina konso dibuta bakaka vuandaka na valere ya badolare 30.

 Yinki bampangi yina vuandaka pesa lusadusu salaka samu bakukitanina na maladi ya COVID-19? Bavuandaka vuata bamaske mpe bavuandaka zitisa badistanse yina lombamaka. Batalaka diaka kana bakompani yina bavuandaka sumbila bima vuandaka na bisika ya kusukula maboko mpe bankubukulu yankaka samu na kukitanina. Yalombaka diaka bakukindimisa ti konso muntu yina vuandaka simba bima yango, yandi vuata bima ya lutanunu, to kusukula mpe kudezenfekte bantomabilu na bau, mpe kulunda bima yango na kisika yina bamedezenfekte. Na yau, bampangi yina vuandaka kabula bima mpe bayina vuandaka baka yau, bataninaka badistanse yina lombamaka.

 Na Janvier 2021, Komite ya bantuadisi ndimaka kusadila badolare kana 25 milion samu na kusadisa bantu na ntangu ya maladi yayi ya yimbi ya COVID-19. Babiro ya filiale mpe bakomite ya kupesa lusadusu kesadilaka makabu yango na mutindu mosi ya mayele mpe bakesalaka nionso samu na kusumba bima na ntalu mosi ya mbote. Na kifuani, na buala ya Chili, bampangi yina vuandaka baka bankubukulu samu na kupesa lusadusu, bavuandaka na nsatu ya kusumba bakilo kana 750 ya bima ya kudia bakebokidilaka lentille. Kasi ntalu na yau buelamaka mbala zole kuluta, kaka na ngonda mosi! Na manima ya kusolola bawola zole samu na diambu yango, babakaka nzengolo ya kusumba ba lentille yina vuandaka na ntalu mingi, muntu yina vuandaka tekisila bau yau, tubaka ti yakele na muntu yankaka zolaka sumba ba lentille kasi yandi mevutula yau. Na yau, na kisika yandi tekisila bau yau na ntalu yina bawizanaka, yandi tekisilaka bau yau na ntalu ya ngonda yina lutaka!

 Kasi, ntangu bampangi na beto zolaka kuenda baka ba lentille yango, muntu yina tekisilaka bau yau, zolaka manga kutekisila bau, na kutubaka ti bampangi na beto kena kukabula madia na mutindu mosi ya yimbi, mutindu bankubukulu yankaka kesalaka yau. Na manima ya kusambila na yinsi ya ntima, mosi ya bampangi na beto tubilaka muntu yango ti konso kimvuka mezaba konso muntu yina kele na nsatu ya lusadusu. Bampangi sasilaka diaka ti nzingulu ya bampangi na beto yina kele na nsatu ya lusadusu kele ya kusuasana, konso dibuta kebaka bima ya lusadusu na kutadilaka nzingulu na bau. Nsuka nsuka, batubilaka muntu yango ti mbongo yina nkubukulu na beto kesadilaka kekatukaka na makabu yina bampangi na beto Bambangi ya Yehova kepesaka mpe bampangi yina kesalaka kisalu yango kele bavolontere. Yandi kamuaka. Muntu yango sukaka kaka ve na kukitisila bau ntalu, kasi yandi pesaka diaka makabu ya bakilo 400 ya ba lentille na bampangi ntangu bakuizaka sumba diaka samu na mbala yina landaka.

 Lusu, nketo mosi ya mbuta yina mefuilaka bakala, na buala ya Liberia, kezingaka na bantu 5 yankaka na dibuta na yandi. Ntangu bavuandaka kudia na sunka mpe kutanga kikapu ya kilumbu, ntekolo mosi ya Lusu ya bakala bakusaka ti bima ya kudia kele diaka ve na yinzo na bau. Yandi yuvusaka: “Yinki beto kekudia?” Lusu tubilaka yandi ti yandi salaka kisambu samu na kulomba lusadusu mpe yandi vuandaka na kivuvu ti Yehova kesadisa bau. Kaka na manima ya midi, bankulutu ya kimvuka bokilaka Lusu na telefone yandi kuenda baka bima ya kudia. Yandi metuba: “Ntekolo na munu ya bakala tubaka, yandi mebakusa ti Yehova lenda kuwa mpe kupesa mvutu na bisambu, samu yandi mepesa mvutu na kisambu na munu.”

 Nketo mosi na République Démocratique du Congo kezingaka pembeni ya dibuta mosi yina kele Bambangi ya Yehova. Ntangu nketo yango monaka dibuta yango mebaka bima ya kudia na bampangi na bau Baklisto, yandi tubaka: “Ntangu maladi yayi ya yimbi kemanisa, munu kekuma Mbangi ya Yehova, samu bakena kutanina bampangi na bau na ntangu yayi ya mpasi.” Bakala na yandi yuvusaka, nge zola kuma Mbangi ya Yehova samu kaka na saki ya loso?” Yandi vutusaka, “samu na yau ve, kasi saki ya loso yango kele kidimbu ya nzola ya kedika.”

 Bambangi ya Yehova vuandaka na dikoki ya kukokisa bansatu ya bampangi na bau kondua kuvingila na ntangu ya maladi yayi ya yimbi, na lusadusu ya makabu yina bampangi kepesaka na ntima na bau ya mvimba. Matondo mingi na mutindu beno kena kupesa makabu na beno na kusadilaka mayele yina kele na donate.pr418.com.