Linɔ́ngi ya Mosɛnzɛli ya 1 Juin 1912 metuba mutindu yayi: “Bantu mingi yina kesepelaka kutanga mikanda na beto, bakevuandaka kisika mosi na bantu ya kufua meso. Bantu yango lenda baka mikanda ofele. . . . Mikanda samu na bantu ya kufua meso kesonamaka na bisono ya bantu ya kufua meso samu bavuanda na dikoki ya kutanga yau.” Linɔ́ngi ya Mosɛnzɛli yango mebuela mutindu yayi: “Bantu mingi yina mekufuaka meso kesepelaka mingi kuwa ti balusakumunu ya kitoko kevuanda na yinza na bilumbu kena kuiza.”

 Ntangu bampova yango sonamaka, babuala mingi kisika bantu ketubaka Anglais vuandaka na mitindu ya kusuasana ya bisono ya bantu ya kufua meso. Kasi, Bambangi ya Yehova salaka ti malongi ya kedika ya Biblia vuanda deja na “bisono ya nene”—bisono ya bantu ya kufua meso (braille). Mpe beto kena kutatamana kusala yau tii bubu! Bubu yayi, beto kele na mikanda na bisono ya bantu ya kufua meso na bandinga kuluta 50. Yinki mutindu yakesalamaka?

 Diambu ya ntete kele kusonika na bisono ya bantu ya kufua meso. Michael Millen, yina kesalaka na Departema ya traitement du texte na Patterson, na New York, yandi metuba: “Na ntama, beto vuandaka sadila programe ya bantu ya mumbongo samu na kusonika na bisono ya bantu ya kufua meso, kasi yavuandaka sadisa ve samu na bandinga nionso yina beto vuandaka na yau nsatu. Bubu yayi beto kena kusadila programe ya mbangudulu ya Watchtower, yina kena kusadisa samu na kubangula mambu na bisono ya bantu ya kufua meso na bandinga mingi na yinza ya mvimba. Munu ndima ve ti programe ya mbangudulu ya mutindu yina kele kisika yankaka na yinza.”

 Mikanda na bisono ya bantu ya kufua meso kevuandaka kaka ve na bisono ya mikanda yango kasi yakevuandaka diaka na bampova yina kesasilaka bafoto yina kele na kati. Na kifuani, foto ya kuvertire ya mukanda Zinga mvula na mvula na kiese! na bisono ya bantu ya kufua meso kele na bampova yayi: “Bakala mosi kena kutambula na nzila ya mupepe yina kele na matiti ya kitoko, bakoline, mpe bamongo.” Jamshed, yina mekufuaka meso, mpe yandi kele nsadisi na kisalu mpe mpasudi nzila, yandi metuba: “Mutindu bamesasila foto yango kele na mfunu mingi samu na munu.”

 Na manima ya kusonika na bisono ya bantu ya kufua meso, baketindaka mikanda yango na babiro ya filiale yina kele na ba imprimerie yina kebimisaka mikanda na bisono ya bantu ya kufua meso. Kuna, bakebongisaka mikanda yango na papye ya ngolo yina ketoboka ve ntangu bakena kubongisa yau to yina kebeba ve ntangu bakena kusadila yau mbala na mbala. Na manima, bakesangisaka bapaje na yau kisika mosi, bakezingaka yau, mpe baketindaka yau na bimvuka mbala nionso yina baketindilaka bimvuka yango mikanda to baketindaka yau na baposte ya kutinda mikanda lokola “mikanda ya ofele ya kutanga samu na bantu ya kufua meso.” Kana yamelombama, bafiliale kebakaka bankubukulu samu na kutinda mikanda samu bampangi yina mekufuaka meso to bayina kemonaka mbote ve babaka mikanda yina bamebonga na yau samu na balukutakanu ya kimvuka.

 Bisalu nionso yina kelombaka ntangu mpe mbongo mingi. Kutu, ntalu ya bawola yina imprimerie na beto ya Wallkill, na New York, kesalaka samu na kubimisa bakopi 50 000 ya Babiblia ya bantu nionso mekokana na ntalu ya bawola yina kesalamaka samu na kubimisa Babiblia 2 na bisono ya bantu ya kufua meso. Konso Biblia yina bakekumisaka bampova na yau nkufi na bisono ya bantu ya kufua meso kele na bavolimi 25, mpe bisadulu yina kelombamaka samu na kubimisa bavolimi yango yakebakaka ntalu ya mbongo mbala 123 kuluta mbongo yina kelombamaka samu na kubimisa Biblia ya bantu nionso. a Kaka bakuvertire ya mpamba ya Biblia mosi ya volimi 25 kebakaka badolare 150!

 Yinki mutindu bampangi yina kepesaka maboko samu na kubimisa mikanda na bisono ya bantu ya kufua meso kekukimonaka samu na kisalu na bau? Nadia, yina kesalaka na filiale ya Afrique du Sud metuba: “Bampangi na beto yina mekufuaka meso to bayina kemonaka mbote ve bakele na luzingu yina kele pete ve, yau yina munu kemonaka yau lokola lusakumunu samu na kusala diambu mosi samu na kusadisa bau. Yau memonisa ti Yehova kezolaka bau mingi mpenza.”

 Kasi yinki beto ketuba kana muntu mosi yina mekufuaka meso kena lenda ve kutanga na bisono ya bantu ya kufua meso? Yameluta mua bamvula, beto bimisaka mua mukanda Longuka kutanga na bisono ya bantu ya kufua meso na Anglais, na kati na yau nge kekuta bisono ya bantu ya kufua meso mpe bisono yina mebimisama na mashini. Yamebongisama samu na bantu yina kemonaka mbote ve to bantu yina mekufuaka meso samu basadila yau kintuadi. Mua mukanda yango kele na bisadulu yina bantu ya kufua meso lenda sadila samu na kusonika na bisono ya bantu ya kufua meso. Muntu yina kelongukaka bisono ya bantu ya kufua meso yandi kesadilaka bisadulu yango samu na kubimisa baletre na bisono ya bantu ya kufua meso samu na yandi mosi. Badevuare ya kusonika na bisono ya bantu ya kufua meso kesadisaka nlonguki samu yandi zimbakana ve kisono mosi mpe yakesadisaka yandi yandi zaba yau na kusimba kaka.

 Yinki mutindu bampangi yina mekufuaka meso to yina kemonaka mbote ve kebakilaka mikanda yango mambote? Ernst, yina kevuandaka na Haiti, vuandaka sangana na balukutakanu ya kimvuka, kasi yandi vuandaka ve na mikanda na bisono ya bantu ya kufua meso. Yau yina, yavuandaka lomba yandi kanga na yintu mambu nionso yina yandi ketuba na disolo na yandi na lukutakanu mpe kupesa bamvutu na masolo ya biuvu mpe bamvutu. Yandi metuba: “Kasi bubu yayi, mulenda zangula diboko na munu mpe kupesa bamvutu konso ntangu. Ntangu yayi munu kena kukimona ti mukele na bumosi na bampangi na munu. Beto nionso beto kena baka malongi ya Nzambi!”

 Mpangi Jan yina kele nkulutu mpe yandi kemonaka mbote ve, yandi ketuadisaka ndongokolo ya Yinzo’a zulu ya Nkengi mpe ndongokolo ya Biblia na kimvuka, yandi metuba: “Mikanda na beto kevuandaka puelele kuluta mikanda yankaka nionso ya bisono ya bantu ya kufua meso yina munu metangaka. Na kifuani, beto kele na banimero ya paje, banoti na yinsi ya paje yina kele pete samu na kusosa, mpe yakena kumonisa bampova yina kesasilaka bafoto.”

 Mpangi mosi ya nketo na nkumbu ya Seon-ok, yina kele mpasudi nzila na Corée du Sud, yandi kele na meso mpe makutu ya kufua. Na ntama, yandi vuandaka landa balukutakanu na ndinga ya mababa, kasi bubu yayi yandi kele na dikoki ya kutanga yandi mosi ndongokolo ya Biblia na bisono ya bantu ya kufua meso. Yandi metuba: “Mikanda yankaka na bisono ya bantu ya kufua meso lenda vuanda mpasi samu na kutanga samu madodimadodi kele ve, milongo ya kuvenga, mpe papye kele fioti. Kasi Bambangi ya Yehova kesadilaka bapapye ya kitoko mpenza mpe yakesalaka ti madodimadodi wakana, yakesadisaka munu munu tanga na pete nionso.” Yandi mebuela: “Na ntama muvuandaka longuka mikanda yina kesasilaka Biblia kaka na lusadusu ya bantu yankaka. Kasi, bubu yayi, munu lenda longuka munu mosi. Yakepesaka munu kiese ntangu munu kekukibongisaka samu na balukutakanu ya Buklisto ya konso sabala mpe kusangana mpenza na yau. Munu ketangaka mikanda na beto nionso ya bisono ya bantu ya kufua meso. Munu lenda tuba ti munu lenda bika ve ‘kutanga yau.’”

 Mutindu mosi na mikanda na beto nionso, mikanda na beto na bisono ya bantu ya kufua meso kevuandaka na bampovo yayi: “Mukanda yayi kele ya kutekisa ve. Yau mebimisama samu na kulonga bantu Biblia na yinza ya mvimba, mpe mbongo samu na kusala kisalu yango kekatukaka na makabu yina bantu kepesaka na luzolo ya bau mosi.” Matondo mingi samu na makabu na beno yina beno kepesaka na nzila ya mayele yina kele na donate.pr418.com. Beno kena kupesa maboko na ntima ya mvimba samu bantu nionso vuanda na dikoki ya kubaka madia ya kimpeve, na kati na bau bantu ya kufua meso mpe bantu yina kemonaka mbote ve.