Na ngonda ya Juillet mpe Aout 2020 samu na mbala ya ntete, bampangi na yinza ya mvimba ketala nzila mosi badiskur ya lukatakanu ya nene na kilokola mosi. Samu yasalama mutindu yina, ya lombamaka ti anrejistrema ya badiskur yango salama na bandinga kuluta 500. Mbala mingi kubongisa kisalu yango ya kuanrejistre badiskur, kubangula yau mpe kutula yau na bavideo kebakaka mvula mosi to kuluta. Kasi samu na maladi ya yimbi ya coronavirus, yalombaka bampangi manisa kubangula badiskur ya Lukutakanu ya nene ya 2020 yina kele na yintu ya diambu ‘Beno sepelaka ntangu nionso’! na yinsi ya bangonda yiya.

 Badepartema yina ketadilaka mambu ya kubangula mpe departema yina ketadilaka mambu ya kusumba bima kintuadi na biro ya nene ya Bambangi ya Yehova pesaka maboko na kisalu yango ya nene. Departema yina ketadilaka mambu ya kubangula monaka ti baekipi mingi ya mbangudulu vuandaka na nsatu ya bisadulu samu na kusala mbote kisalu na bau, mingi mingi bamikro ya mbote kuluta. Departema yina ketadilaka mambu ya kusumba bima, bongisaka mbongo samu na kusumba bamikro 1000 mpe kutinda yau na babuala 200.

 Samu na kusadila mbongo na mutindu ya mbote, departema yina ketadilaka mambu ya kusumba bima sumbaka bamikro mingi mbala mosi. Bamikro yango tindamaka ntete kisika mosi mpe na manima batinda yau na bambangudi ya yinza na mvimba. Lokola beto sumbaka bamikro mingi, yau salaka ti batekila beto na mikro mosi na ntalu ya dollard 170, beto sumbaka yau na ntalu ya yinsi mpenza kuluta kana beto sumbaka yau mosi mosi.

 Yalombaka ti departema yina ketadilaka mambu ya kusumba bima, basumba mpe batinda bisadulu yango na ngonda ya Avrile mpe Mai 2020—yavuandaka ntangu mosi yina bantu yina ketekaka vuandaka teka ve mutindu bakesadilaka yau samu na maladi ya yimbi ya coronavirus. Kasi, na nsuka ya ngonda ya Mai, mingi ya baekipi ya mbangudulu, bafiliale, mpe bisika yankaka yina kisalu ya kubangula kesalamaka vuandaka na nsatu ya bisadulu.

 Jay Swinney yina kele mpangi ya departema ya kusumba bima metuba “Nguizani vuandaka ya mbote kati na badepartema ya betele mpe bantu yina ketekaka bima yango. Mpeve ya nlongo ya Yehova nde sadisaka beto samu beto sala mambu malumalu mpe beto sadila mbongo ya makabu na mutindu ya mbote samu na kusadisa bampangi.”

 Mpangi Nicholas Ahladis, yina kesalaka na departema ya mbangudulu, metuba: “Bambangudi yina vuandaka bima diaka ve, babakaka lukindusu ntangu babakaka bisadulu yango. Atako bavuandaka sangana diaka ve kisika mosi na bampangi yankaka ya baekipi na bau, kasi basala kintuadi samu na kubangula mpe kuanrejistre badiskur, badrame, mpe miyimbu na bandinga kuluta 500.”

 Yayi kele mosi ya bisalu kati na mingi yina salamaka samu bampangi na yinza ya mvimba landa Lukutakanu ya nene ya 2020 yina kele na yintu ya diambu ‘Beno sepelaka ntangu nionso’! Makabu na beno ya luzolo ya mbote yina beno kepesaka na nzila ya donate.pr418.com mpe na mitundu yankaka nde salaka beto koka kusumba bima yango ya mfunu.