Konso ngonda, beto kevingilaka na ntima ya mvimba madia ya kimpeve mpe bavideo yina kebimaka na TV JW. Nzokande na Afrique, bampangi mingi kelandaka ve baprogame yango yina kebimaka na nzila ya Internet. Samu na yinki?

 Bisika mingi na Afrique, Internet kele ve. Mpe na bisika yina Internet kele, mbala mingi yakesalaka malembe mpenza mpe yakevuandaka ntalu mingi. Na kifuani, na Madagascar, nkengi ya kizungidila mosi kuendaka na cyber café mosi samu na kubaka emision ya TV JW ya ngonda mosi. Yandi futaka badolare 16 samu na kubaka yau. Nzokande, na buala yango, badolare 16 meluta mbongo yina bantu mingi kebakaka na sabala mosi! a

 Atako bampasi yango, bamilion ya bantu na Afrique mekuma na dikoki ya kutala TV JW kondua kukota na Internet. Na yinki mutindu?

 Banda mvula 2017, bantu yina kevuandaka na Afrique, na babuala yina kele na sud ya desere ya Sahara ketalaka TV JW na batelevizion na bau na nzila ya shene ya satellite. Shene yango kele ofele, konso ntangu, konso kilumbu mpe na bandinga 16.

 Samu TV JW monisa mutindu yina, Bambangi ya Yehova kewizanaka na shene mosi ya televizion mpe bakepesaka bau mbongo samu balanda TV JW na nzila ya satelite. Babuala 35 ya sud ya Sahara na Afrique kesadilaka satellite yango. Bambangi ya Yehova kefutaka mbongo kuluta badolare 12 000 konso ngonda samu na yau. Na bantangu yankaka, beto kebuelaka mbongo yankaka samu balutisa bankinzi yankaka ya mfunu mingi na bashene yankaka. Yau kepesaka nzila na mafunda ya bantu balanda balukutakanu to baprograme ya mfunu mingi yina kesalamaka kana Kimvuka ya Ntuadisi mekuiza tala Betele.

 Bantu mingi, ata bayina kele Bambangi ya Yehova ve, ketalaka shene ya satelite ya JW na batelevizion na bayinzo na bau. Kasi, bantu mingi kele na dikoki ve ya kusumba bisadulu yina mefuana samu na kutala shene ya satelite yango. Samu na kusadisa bau, beto metulaka mua baapareyi yankaka na Bayinzo ya Kimfumu kuluta 3 670 samu yabaka mambu ya satellite samu bampangi talaka TV JW. Kana Yinzo ya Kimfumu mosi kele na televizion to na projektere, yakelomba kana badolare 70 samu na kusumba mpe kutula bisadulu yango na Yinzo ya Kimfumu. Kasi, kana yakele na televizion to projektere ve, samu na kutula bisadulu nionso yina, yakelomba badolare 530.

 Bampangi na beto kena kusepela mpenza na bashene yango. Nkulutu mosi na Cameroun metuba mutindu yayi: “Samu na dibuta na beto, shene yango kele lokola mana yina kena kukita na desere.” Odebode, mpangi mosi na Nigeria, metuba mutindu yayi: “Na dibuta na beto, beto ketalaka shene yango mbala tatu na sabala. Bana na munu kevingilaka yau na kiese mpenza. Kutu, bakelombaka beto tulaka mpe shene ya JW bantangu yankaka.” Rose, mpangi ya nketo kaka na Nigeria metuba: “Munu kele na kiese ya kutuba ti, mumekumaka na nsatu ya ngolo ya kutala shene ya satelite ya JW na kisika ya kutala bashene ya bazulunalo. Ntangu muvuandaka landa bansangu ya televizion, mambu yina muvuandaka landa vuandaka pesa munu mpenza nganzi. Kasi TV JW kepesaka munu ngolo mpe kiyenge! Yakele shene yina mukezolaka mingi mpenza. Yakele mpenza kado ya mbote yina mekatuka na Yehova.”

 Nkengi ya kizungidila mosi na Mozambique metuba ti na kizungidila na yandi, Bayinzo ya Kimfumu kele na bisadulu yango yina bametulaka samu yabaka shene ya satelite. Bampangi ya bimvuka yango, kekuizaka na Bayinzo ya Kimfumu na wola mosi to kuluta tekila lukutakanu banda samu batala TV JW na nzila ya satelite.

 Na mvula 2019, na lukutakanu ya nene yina sangisaka babuala mingi na Johannesbourg, na Afrique du Sud, basadilaka nkubukulu yango samu na kumonisa na bisika 9 badiskur ya mfunu mingi, buela diaka badiskur yina mpangi ya Kimvuka ya Ntuadisi salaka. Mpangi Sphumelele, yina kesalaka na Departema ya audio/video na Betele ya Afrique du Sud, metuba mutindu yayi: “Ntete ntete, beto vuandaka lutisa badiskur ya mutindu yayi na nzila ya Internet. Yakelombaka kusumba bamega mpe Internet vuanda mbote mpenza. Shene ya satelite ya JW kena kusadisa samu beto lunda mbongo mpe yakele mbote mingi.”

 Na lusadusu ya makabu na nge yina nge kepesaka samu na kisalu ya Kimfumu na yinza ya mvimba, bampangi mingi na Afrique kele na dikoki ya kutala TV JW na nzila ya satelite. Bampangi, beto mepesa beno matondo mingi na mutindu beno kena kupesa makabu na mayele ya mutindu na mutindu yina kele na donate.pr418.com.