‘Beno kukitungisa ve ata fioti samu na kilumbu yina kelanda, samu kilumbu yina kelanda kevuanda na basusi na yau. Konso kilumbu kevuanda na bampasi na yau’—Matayo 6:34, Biblia Mbalula ya Nsi-Ntoto ya Mpa.

 ‘Beno kukitungisa ve samu na mambu yina kekuiza mbazi; mbazi kevuanda na mambu na yau. Kilumbu na kilumbu kele na mpasi yina mefuana na yau.’—Matayo 6:34, Biblia na Lingala ya lelo oyo.

 Yesu, muntu yina tubaka bampova yango, kitisaka banlonguki na yandi ntima ti bafueti kukitungisa ve kuluta ndilu, to kukitungisa na mutindu ya yimbi samu na mikakatanu yina kekuiza. Kutu, yalombaka nde babaka mambote kana bamenuanisa mikakatanu ya kilumbu na kilumbu.

 Yesu zolaka tuba ve ti beto fueti kanisa ve mambu ya mbazi to beto fueti bika bongisa mambu samu na bilumbu kena kuiza. (Bingana 21:5) Kutu, yandi vuandaka sadisa beto nde samu beto bika kukitungisa kuluta ndilu, samu na mambu yina lenda kumina beto mbazi. Mitungisi ya mutindu yina lenda sala ti beto bika vuanda na kiese mpe beto bika kukokisa biyekua na beto ya mfunu. Beto lenda koka ve kumanisa mikakatanu yina salama ntete ve kana beto kena kukitungisa samu na yau bubu yayi. Mpe mbala mingi mambu yina beto kekukitungisaka samu na yau kesalamaka ve, to kana yamekumina beto yakevuandaka yimbi ve mutindu beto kanisaka.

 Bampova yina ya Yesu kele na kati ya disolo na zulu ya mongo, yina kele na Matayo kikapu 5-7. Na disolo na yandi na zulu ya mongo, Yesu sasilaka ti kukitungisa kuluta ndilu lenda soba ve mambu to kubuela kima na luzingu na beto. (Matayo 6:27) Yandi tubaka diaka ti ntangu beto kena kutula Nzambi na kisika ya ntete na luzingu na beto, beto fueti kukitungisa ve kuluta ndilu samu na mambu yina kesalama mbazi. Nzambi kekipeke bambutu mpe bibulu, mpe yandi kekondua ve kukipe bantu yina kesadilaka yandi.—Matayo 6:25, 26, 28-33.