‘Mona kiese mingi mpenza na Yehova, mpe yandi kekokisa bansatu ya ntima na nge.’—Nkunga 37:4, Mbalula ya Nsi-Ntoto ya Mpa.

 ‘Mona kiese na MFUMU NZAMBI, yandi kepesa nge kima yina nge zola.’—Nkunga 37:4, Bible en Kituba.

 Nsoniki ya nkunga kena kukindisa bisadi ya Nzambi bamona kiese ya kuvuanda na nguizani ya ngolo na Nzambi. Bantu nionso yina kele na nguizani ya mutindu yina lenda kukindimisa ti Yehova a kekokisa bansatu na bau yina mebonga.

 ‘Mona kiese mingi mpenza na Yehova.’ Bampova yango lenda bangulua diaka na “baka kiese mingi mpenza na Yehova,” “mona kiese mingi na kusadila MFUMU,” to “mona kiese mingi na mambu yina MFUMU melaka nge.” Na bampova yankaka, beto fueti “mona kiese mingi mpenza” na kusambila Nzambi ya kedika. (Nkunga 37:4, noti na yinsi ya paje) Samu na yinki yakele mutindu yina?

 Bantu yina kesambilaka Yehova ketadilaka mambu mutindu yandi ketadilaka yau, mutindu Biblia memonisa yau. Bakesukaka kaka ve na kuzaba Nzambi kasi bakevuandaka diaka na nduenga ya kuzitisa yandi. Yau yina bakevuandaka na kikansasa ya mbote mpe baketinaka mambu mingi yina lenda nata kivonza na luzingu. (Bingana 3:5, 6) Na kifuani, bakevuandaka ve na nganzi to kimpala kana yakena kumonana ti bantu ya lulendo to bantu yina mekondua kukuikama kele na luzingu ya mbote. (Nkunga 37:1, 7-9) Bisadi ya Nzambi kevuandaka na kiese na kuzaba ti ntama mingi ve Nzambi kemanisa mambu nionso ya kukondua lunungu mpe yandi kepesa bantu ya kukuikama n’sendo samu na ntambudulu na bau ya mbote. (Nkunga 37:34) Bakevuandaka diaka na kiese na kuzaba ti bakendimamaka na Tata na bau ya dizulu.—Nkunga 5:12; Bingana 27:11.

 ‘Yandi kekokisa bansatu ya ntima na nge.’ Bampova yango lenda bangulua diaka na “yandi kepesa mvutu na bisambu na nge” to “yandi kepesa nge yina nge kele mpenza na yau nsatu.” Ya kedika, Yehova kepesa nge ve mbala mosi konso kima yina nge kena kulomba. Mutindu mosi kaka na kibuti ya mbote, Yehova mezaba yina meluta mbote samu na bana na Yandi. Diaka, mambu yina beto kena kulomba, ata mpe yina beto kesalaka fueti vuanda na nguizani na bansikudukusu na yandi mpe luzolo na yandi. (Bingana 28:9; Yakobo 4:3; 1 Yoane 5:14) Kana yakele plina, beto lenda sambila ‘Muntu yina kekuwaka kisambu’ na kivuvu ti yandi kekuwa beto.—Nkunga 65:2; Matayo 21:22.

 Davidi Ntinu ya Yisaele ya ntama nde sonikaka Nkunga 37. Yandi sonikaka yau na kulanda alfabe b.

 Davidi kutanaka na mambu mingi ya kukondua lunungu. Ntinu Saulo mpe bantu yankaka vuandaka landa yandi samu na kufua yandi. (2 Samuele 22:1) Kasi, Davidi vuandaka tudila Nzambi na yandi ntima ya mvimba. Davidi zabaka ti nsukansuka, Yehova kepesa bantu ya yimbi kitumbu. (Nkunga 37:10, 11) Ata kana bavuandaka monana lokola bakele na luzingu ya mbote, mutindu mosi kaka na ‘matiti ya yimpa ya nkunzu’ nsukansuka bakekufua.—Nkunga 37:2, 20, 35, 36.

 Nkunga 37 kena kumonisa lusuasanu yina kele kati na nsuka ya bantu yina kezitisaka bansikudukusu ya Nzambi mpe nsuka ya bantu yina kezitisaka yau ve. (Nkunga 37:16, 17, 21, 22, 27, 28) Na yau, nkunga yango kesadisaka beto beto vuanda na nduenga mpe beto vuanda mutindu ya bantu yina Nzambi kendimaka.

 Tala video ya nkufi yina kena kutubila mambu yina kele na mukanda ya Nkunga.