‘Beno bika kunuana mpe beno zaba ti munu kele Nzambi. Bakekumisa munu na kati ya makanda; bakekumisa munu na ntoto.’—Nkunga 46:10, Mbalula ya Nsi-Ntoto ya Mpa.

 ‘Vuanda niee mpe zaba ti munu kele Nzambi; bakekumisa munu kati na makanda.’—Nkunga 46:10, haut fleuve.

 Nzambi kena kukindisa muntu nionso na kusambila yandi mpe yandi ndima yinsua na yandi ya kuyadila ntoto ya mvimba. Yandi kele na kilendo mpe kimfumu yina meluta nionso, ya kedika, muntu nionso yina zola kuzinga mvula na mvula fueti ndima diambu yango.—Kusonga 4:11.

 ‘Beno bika kunuana mpe beno zaba ti munu kele Nzambi.’ Babiblia yankaka mebangula kitini ya ntete ya verse yango na bampova “beno vuanda niee.” Yau metinda bantu kuma na dikanisi ya yimbi ti verse yango kena kukindisa kuvuanda niee na yinzo ya nzambi. Kasi fraze ya Ebreo yina bamebangula na ‘Beno bika kunuana mpe beno zaba ti munu kele Nzambi’ kele lukindusu yina Yehova a Nzambi yandi mosi mepesa na bantu ya makanda nionso, yandi melomba bantu babika kutelemina yandi mpe bazaba ti kaka yandi nde mebonga bantu sambila.

 Bampova ya mutindu yina kele diaka na Nkunga 2. Kuna, Nzambi melaka ti yandi kepesa kitumbu na bantu yina keteleminaka yandi. Na ndambu yankaka, bantu yina kendimaka kimfumu ya Nzambi, baketadilaka yandi samu na kulomba lutuadusu, ngolo, mpe nduenga. Lokola ‘baketinaka na yandi,’ bakevuandaka na kiese mpe lutanunu, mingimingi na ntangu ya mpasi.—Nkunga 2:9-12.

 ‘Bakekumisa munu na kati ya makanda.’ Na ntama, bantu kumisaka Yehova Nzambi ntangu yandi sadilaka ngolo na yandi ya nene samu na kutanina bisadi na yandi. (Kubasika 15:1-3) Na bilumbu kena kuiza, bantu kekumisa yandi diaka mingi ntangu muntu nionso na ntoto kendima kimfumu na yandi mpe kesambila yandi.—Nkunga 86:9, 10; Yezaya 2:11.

 Mukanda mosi kebokidilaka Nkunga 46 “muyimbu yina kekumisaka kilendo ya Nzambi, muntu ya ngolo yina kenuaninaka bisadi na yandi.” Ntangu bavuandaka yimbila Nkunga 46, bisadi ya Nzambi vuandaka monisa ti baketudilaka Yehova ntima ti yandi kele na dikoki ya kutanina mpe ya kusadisa bau. (Nkunga 46:1, 2) Bampova yango vuandaka bambula bau ti Yehova vuandaka ntangu nionso kintuadi na bau.—Nkunga 46:7, 11.

 Samu na kusadisa bau batula kivuvu ya ngolo na kilendo ya Yehova Nzambi ya kutanina, nkunga yango vuandaka kindisa bau bakanisa na mambu yina yandi salaka na kilendo na yandi. (Nkunga 46:8) Yamebenda dikebi mingimingi na dikoki na yandi ya kumanisa bamvita. (Nkunga 46:9) Beto lenda tuba ti Yehova manisaka bamvita na ntangu ya ntama na mutindu yandi taninaka bisadi na yandi na ntuala ya makanda yina vuandaka bambeni. Kasi, Biblia melaka ti ntama mingi ve, Nzambi kemanisa bamvita na ntoto ya mvimba.—Yezaya 2:4.

 Yehova ketaninaka kaka bisadi na yandi bubu yayi? Ee. Kutu, ntumua Paulo kindisaka ngolo Baklisto batula ntima ti Nzambi kesadisa bau. (Baebreo 13:6) Makanisi yina kele na Nkunga 46 kena kusala ti beto tula diaka ntima ya ngolo na kilendo ya Nzambi ya kutanina. Yakena kusadisa beto beto mona ti Nzambi kele ‘kitininu na beto mpe ngolo na beto.’—Nkunga 46:1.

 Tala video ya nkufi yina kena kutubila mambu yina kele na mukanda ya Nkunga.