BAVERSE YA BIBLIA YINA BAMESASILA
Yeremia 29:11—‘Munu mezaba mbote mabanza yina munu kena kubanza samu na beno’
‘‘Samu munu mezaba mbote mabanza yina munu kena kubanza samu na beno,’ Yehova muntu metuba, a ‘mabanza ya kiyenge, kasi ya mpasi ve, samu na kupesa beno luzingu ya mbote na bilumbu kena kuiza mpe kivuvu.’’—Yeremia 29:11, Mbalula ya Nsi-Ntoto ya Mpa.
‘Samu munu Yawe munu mezaba mambu munu mekana samu na beno: yakevuanda mambu ya kiadi ve kasi ya kiese. Munu ketanina beno mpe munu kepesa beno mambote yina beno kena kusosa. Munu Yawe muntu metuba mutindu yina.’—Jeremya 29:11, Bible na lingala ya lelo.
Nsasulu ya Yeremia 29:11
Yehova pesaka nsilulu na bansambidi na yandi ti yandi kepesa bau kiyenge na bilumbu kena kuiza. Atako yasonamaka samu na bantu ya ntangu ya ntama, bampova yango kena kumonisa kaka mabanza ya Nzambi bubu yayi. Yandi kele ‘Nzambi yina kepesaka kivuvu.’ (Baroma 15:13) Yau yina, yandi salaka ti bansilulu lokola yina sonama na Biblia samu ‘beto vuanda na kivuvu’ ti mambu kevuanda mbote na bilumbu kena kuiza.—Baroma 15:4.
Mambu yina bakena kutubila na Yeremia 29:11
Bampova yina sonamaka na mukanda yina batindilaka Bayisaele yina kuendaka na kinanga katuka na Yisaele tii na Babiloni. b (Yeremia 29:1) Nzambi zabisaka bantu yango yina kuendaka na kinanga ti bakebikana na kinanga bamvula mingi mpe yalombaka batunga bayinzo, kuzenga bilanga mpe kutanina mabuta na bau. (Yeremia 29:4-9) Kasi, Nzambi buelaka diaka mutindu yayi: “Ntangu bamvula 70 kefuana na Babiloni, munu ketudila beno dikebi, mpe munu kevutula beno na kisika yayi na [Yerusaleme] samu na kukokisa mambu yina munu tubaka.” (Yeremia 29:10) Na yau, Nzambi ndimisaka bau ti yandi kesundola bau ve mpe kivuvu na bau ya kuvutuka na buala na bau kekokisama.—Yeremia 31:16, 17.
Nzambi kokisaka nsilulu na yandi yina yandi pesaka Bayisaele. Mutindu yandi samunaka yau, Ntinu Sirisi nungaka Babiloni. (Yezaya 45:1, 2; Yeremia 51:30-32) Na manima, Sirisi salaka ti Bayisaele vutuka na buala na bau. Na manima ya bamvula 70 ya kinanga, bavutukaka na Yerusaleme.—2 Bansangu 36:20-23; Esdrasi 3:1.
Kukokisama ya nsilulu yina kele na Yeremia 29:11 kekitisaka ntima ya bayina ketudilaka bansilulu ya Nzambi ntima bubu yayi. Bansilulu yango mesangisa kiyenge na ntoto ya mvimba na nzila ya Kimfumu ya Nzambi na nzila ya Klisto Yesu.—Nkunga 37:10, 11, 29; Yezaya 55:11; Matayo 6:10.
Dibanza ya luvunu samu na Yeremia 29:11
Dibanza ya luvunu: Nzambi kele na mambu ya sikisiki yina “yandi mebongisaka” samu na konso muntu.
Dibanza ya kedika: Nzambi kebikaka bantu bapona bau mosi mambu yina bakesala na luzingu. Bampova na yandi yina kele na Yeremia 29:11 yandi zabisaka yau na Bayisaele yina vuandaka lokola kimvuka na Babiloni, mpe yandi vuandaka na makanisi yina samu na kimvuka yango; yazola tuba yandi zolaka bavuanda na kiyenge na bilumbu kena kuiza. (Yeremia 29:4) Kasi, Nzambi bikaka nzila na konso muntu yandi pona kana yandi kebaka balusakumunu to ve na nsilulu na yandi. (Kulonga 30:19, 20; Yeremia 29:32) Bantu yina ponaka kusosa Nzambi basalaka mutindu yina ntangu baponaka kusambila yandi na ntima ya mvimba.—Yeremia 29:12, 13.
Dibanza ya luvunu: Nzambi kepesa bansambidi na yandi kimvuama.
Dibanza ya kedika: Bampova “luzingu ya mbote” yina kele na Babiblia yankaka na Yeremia 29:11 mebangulua na mpova mosi ya Ebre yina memonisa “kiyenge, mavimpi, mpe mambote”. Na kutadila mambu yina bakena kutubila, Nzambi pesaka nsilulu ya kupesa Bayisaele yina vuandaka na kinanga kimvuama ve kasi kiyenge mpe luzingu ya mbote. Baketatamana kuvuanda na luzingu mpe kilumbu yankaka bakevutuka na Yerusaleme.—Yeremia 29:4-10.
Tanga Kuyantika kikapu 29 na noti na yinsi ya paje, mpe nsasulu ya bampova yina nge zaba mbote ve.
a Yehova kele nkumbu ya Nzambi na Biblia.—Nkunga 83:18.
b Samu na Yeremia 29:11, mukanda Expositor’s Bible Commentary metuba: “Yayi kele mosi ya bansilulu ya mbote beto mebaka na Biblia yina memonisa ntima ya kiadi ya Yawe [Yehova] samu na bananga yina mpe nsuka nsuka yandi pesaka bau mfunu yina bafueti vuanda na makanisi ya mbote mpe kivuvu.”—Volimi 7, paje 360.
Tala diaka...
BAMVUTU NA BIUVU YA BIBLIA
Biblia lenda bomba munu?
Baverse ya Biblia yina bombaka bantu mingi yina kena kukutana na mambu ya mpasi mpe bayina kena kutungisama na makanisi.
MALONGI YA BIBLIA
Bisadulu samu na kulonguka Biblia
Pona bisadulu ya ndongokolo ya Biblia yina kesala ti ndongokolo na nge vuanda ya mbote mpe yina kekuenda na ntuala.
MALONGI YA BIBLIA
Meka ndongokolo na beto ya Biblia
Banda ndongokolo ya Biblia ya ofele na wola mpe kisika yina nge kepona.
