BAVERSE YA BIBLIA YINA BAMESASILA
Yezaya 41:10—‘Kumona wonga ve, samu munu kele na nge’
‘Kumona wonga ve, samu munu kele na nge. Kukitungisa ve, samu munu kele Nzambi na nge. Munu kepesa nge kibakala, Ee, munu kesadisa nge. Munu kesimba nge mpenza ngolo na diboko na munu ya kitata ya lunungu.’—Yezaya 41:10, Mbalula ya Nsi-Ntoto ya Mpa.
‘Kubanga ve, mpamba ve munu kele na nge; kumona somo ve samu ti munu kele Nzambi na nge. Munu kekembisa nge, munu kesadisa nge, munu kezangula nge na diboko na munu ya lunungu.’—Yizaya 41:10, Biblia haut fleuve.
Nsasulu ya Yezaya 41:10
Yehova a Nzambi kekitisaka ntima ya basambidi na yandi ya kukuikama mpe yandi kesadisaka bau, Yavuanda yinki mambu yina bakena kukutana na yau.
‘Munu kele na nge.’ Yehova memonisa basambidi na yandi mfunu yina bafueti banga ve—Yazola tuba bakele bau mosi ve. Lokola yandi kemonaka mambu yina kekuminaka bau mpe yandi kekuwaka bisambu na bau, bakele lokola nde yandi kele pene-pene na bau.—Nkunga 34:15; 1 Piere 3:12.
‘Munu kele Nzambi na nge.’ Yehova kekitisaka basambidi na yandi ntima ntangu yandi kebambulaka bau ti yandi kekukimonisa ti yandi kele Nzambi na bau ti yandi kendimaka bau lokola basambidi na yandi. Balenda tula ntima ti yakele ata na diambu mosi ve yina lenda pekisa Nzambi yandi sadisa bau.—Nkunga 118:6; Baroma 8:32; Baebreo 13:6.
‘Munu kekembisa nge, munu kesadisa nge, munu kezangula nge na diboko na munu ya lunungu.’ Yehova mevutukila dikanisi kaka mosi na bafraze tatu samu na kumonisa ti yandi kesadisa mpenza bisadi na yandi. Yandi mesadila mpova ya kifuani samu na kumonisa mutindu yandi kesalaka mambu ntangu bisadi na yandi kele na nsatu ya lusadisu. Kana muntu mosi mekubua, Nzambi lenda tambila yandi diboko na yandi ya kibakala samu na kutelemisa yandi.—Yezaya 41:13.
Nzambi kepesaka ngolo mpe yandi kesadisaka bansambidi na yandi ntetentete na nzila ya Biblia, Mpova na yandi. (Yosua 1:8; Baebreo 4:12) Na kifuani, Mpova ya Nzambi mefuluka na dilongi yina kesadisaka bayina kena kunuana na mikakatanu, lokola kimputu, maladi, to kufuila muntu yina bakezolaka. (Bingana 2:6, 7) Nzambi lenda sadila diaka mpeve ya nlongo na yandi, to kilendo na yandi yina kesalaka kisalu, samu na kupesa bansambidi na yandi yina kena kutungisama na makanisi mpe na banguilu ngolo yina bamefuana na yau samu na kukanga ntima na kumekama.—Yezaya 40:29; Luka 11:13.
Mambu yina bakena kutubila na Yezaya 41:10
Bampova yina bombaka Bayuda ya kukuikama yina na manima kuendaka na kinanga na Babilone. Yehova samunaka ti na nsuka ya kinanga ya Bayuda, yakevuanda na mbeni mosi yina kekuiza bebisa mabuta yina kele zingazinga mpe kusokusa Babilone. (Yezaya 41:2-4; 44:1-4) Atako nsangu yango vuandaka zakamisa mpe kubangisa Babilone mpe mabuta ya zingazinga, yalombaka Bayuda banga ve, samu Yehova vuandaka tanina bau. Mbala tatu yandi kitisaka bau ntima na bampova yayi ‘kumona wonga ve.’—Yezaya 41:5, 6, 10, 13, 14.
Atako yandi salaka ti Bayuda ya kukuikama kuenda na kinanga na Babilone, Yehova Nzambi salaka ti bampova yina kele na Yezaya 41:10 taninua samu na kukindisa bisadi na yandi nionso. (Yezaya 40:8; Baroma 15:4) Yandi kesadisaka bau bubu yayi, mutindu kaka yandi sadisa bisadi na yandi na ntangu ya ntama.
Tanga Yezaya kikapu 41 na noti na yinsi ya paje, nsasulu ya bampova yina nge zaba mbote ve.
a Yehova kele nkumbu ya Nzambi yina kele na Biblia.—Nkunga 83:18.
Tala diaka...
MUTINDU BAMESASILA BAVERSE YA BIBLIA
Matai 6:34—‘Beno kukitungisa ve samu na mambu yina kekuiza mbazi’
Yesu zolaka tuba ve ti beto fueti bika bongisa mambu samu na bilumbu kena kuiza.
MALONGI YA BIBLIA
Bisadulu samu na kulonguka Biblia
Pona bisadulu ya ndongokolo ya Biblia yina kesala ti ndongokolo na nge vuanda ya mbote mpe yina kekuenda na ntuala.
MALONGI YA BIBLIA
Meka ndongokolo na beto ya Biblia
Banda ndongokolo ya Biblia ya ofele na wola mpe kisika yina nge kepona.
