‘Munu pesaka nge ve nsiku? Vuanda na kibakala mpe ngolo. Kuzakama ve mpe kubanga ve, samu Yehova Nzambi na nge kele na nge konso kisika yina nge kekuenda.’—Yozue 1:9, Biblia Mbalula ya Nsi-Ntoto ya Mpa.

 ‘Zaba ti munu pesaka nge malako ya kuvuanda ngolo mpe kutula ntima. Kubanga ve. Kulemba ve samu Mfumu Nzambi na nge kele na nge, kisika nionso nge kekuenda.’—Yozue 1:9, La Bible, par Pierre de Beaumont.

 Na verse yayi, Yehova a Nzambi kena kutuba na Yosua, mosi ya bisadi na yandi ya kukuikama ti yandi lenda vuanda na kibakala mpe ngolo ntangu yandi kena kukutana na mambu ya mpasi to na ntuala ya mambu yina kena kumonana lokola kaka yandi kenunga yau ve. Na yau, kana yandi mezitisa minsiku ya Nzambi, Yosua kevuanda na mfunu mosi ve ya kubanga mambu kele na ntuala. Yehova kevuanda pene na yandi samu na kupesa yandi lusadusu yina yandi kevuanda na yau nsatu. Mpe Nzambi sadisaka yandi na kupesaka yandi malako mpe na kusalaka ti yandi nunga bambeni na yandi.

 Yinki mutindu Yosua lendaka ‘vuanda na kibakala mpe ngolo’? Yandi lendaka baka ngolo mpe kibakala na masonukua yina mepemama na Yehova yina yandi vuandaka na yau na mbandu na yandi. Na kati na yau beto lenda tanga “nsiku yina Mose pesaka Yosua na mvimba na yau.” b (Yozue 1:7) Yehova zabisaka Yosua yandi ‘tanga yau na ndinga ya yinsi [‘yindula yau na mpinda,’ Nouvelle français courant] mpipa mpe muini.’ (Yozue 1:8) Kutanga mpe kuyindula na mpinda masonukua yango kindisaka nzengolo ya Yosua ya kusala lukanu ya Nzambi. Yalombaka Yosua zitisa mbote mbote nionso yina sonamaka, na bampova yankaka kusadila mambu yina yandi vuandaka longuka. Mutindu yina nde yandi kesala mambu na nduenga mpe yandi kenunga nionso yina yandi kesala. Mpe yau mpenza salamaka. Yosua kutanaka na mambu ya mpasi, kasi yandi vuandaka na luzingu mosi yina mefuluka na kiese na kisalu ya Yehova.—Yozue 23:14; 24:15.

 Mambu yina Yehova tubilaka Yosua kena kutatamana kukindisa bantu bubu yayi. Bampova yango kena kumonisa ti yandi ketudilaka bisadi na yandi dikebi mpenza, mingi mingi ntangu bakena kukutana na mambu ya mpasi. Yandi zola ti lokola Yosua, banunga na luzingu. Lokola Yosua, balenda vuanda na kibakala mpe ngolo kana bakena kutanga mpe kuyindula na mpinda Mpova ya Nzambi, Biblia mbala na mbala, mpe kusadila mambu yina yakena kutuba.

 Na manima ya lufua ya Mose, Yehova pesaka Yosua kiyekua ya kutuadisa dibuta ya Yisaele. (Yozue 1:1, 2) Na ntangu yango, Bayisaele vuandaka pene ya kukota na yinsi ya Kanana, ntoto ya nsilulu. Kasi yalombaka banunga bambeni ya ngolo. Na kifuani, yalombaka na Yosua yandi nuana na Bakanana, bantu yina vuandaka yimbi kuluta. c (Kulonga 9:5; 20:17, 18) Bakanana vuandaka mingi kuluta Bayisaele mpe bavuandaka na binuanunu ya mvita ya mbote kuluta. (Yozue 9:1, 2; 17:18) Kasi yau pekisaka ve Yosua na kulanda na kibala nionso malako ya Yehova. Mpe Nzambi monisaka ti yandi vuandaka na yandi na mutindu Bayisaele nungaka bambeni na bau mingi, kaka na bamvula 6.—Yozue 21:43, 44.