Biblia lenda bomba munu?
Mvutu ya Biblia
Ee. (Baroma 15:4) Tala ndambu ya baverse ya Biblia yina bombaka bantu mingi yina kena kukutana na mambu ya mpasi mpe bayina kena kutungisama na makanisi.
Na disolo yayi
Mikakatano
Nkunga 23:4: ‘Ata kana munu kena kutambula na lubuaku ya kitombe ya ngolo, munu kebangaka ata fioti ve kima ya yimbi, samu nge kele kintuadi na munu.’
Nsasulu: Kana nge kena kusambila Nzambi mpe nge kena kutudila Mpova na yandi Biblia ntima samu yatuadisa nge, nge lenda nunga mambu ya mpasi na kibakala nionso.
Bafilipi 4:13: ‘Samu na mambu nionso, munu kele na ngolo na nzila ya muntu yina kepesaka munu kilendo.’
Nsasulu: Nzambi lenda pesa nge ngolo samu na kununga konso diambu ya mpasi.
Lufua ya muntu yina beto kezolaka
Longi 9:10: ‘Kisalu, nzayilu, mpe nduenga kele ve na Diziami.’
Nsasulu: Bantu yina mekufuaka bakeniokuamaka ve, balenda sala beto mpasi ve. Bakezabaka kima mosi ve.
Bisalu 24:15: ‘Yakevuanda na mfutumukunu.’
Nsasulu: Nzambi lenda vutula na luzingu bantu yina beto vuandaka zola yina mekufuaka.
Kukipesa foti kuluta ndilu
Nkunga 86:5: ‘Samu nge, O Yehova, a nge kele mbote mpe pene ya kunlemvukila; nge kele na nzola ya kukuikama mingi samu na bantu nionso yina kebokilaka nge.’
Nsasulu: Nzambi kenlemvukilaka bantu yina kemonaka mpenza kiadi samu na banzimbala na bau yina bamesalaka mpe bayina kele na nzengolo ya kuvutukila yau ve.
Nkunga 103:12: ‘Mutindu kisika yina ntangu kebiminaka kele ntama na kisika yina ntangu kelekaka, mutindu mosi mpe, yandi metulaka mambu na beto ya yimbi ntama na beto.’
Nsasulu: Kana Nzambi menlemvukila, yandi ketulaka masumu na beto ntama mpenza na yandi. Yandi kekanisaka yau diaka ve samu na kupesa beto kitumbu.
Kiadi
Nkunga 31:7: ‘Nge monaka mpasi na munu; Nge mezaba mpasi na munu ya ngolo.’
Nsasulu: Nzambi mezaba mpenza mambu nionso ya mpasi yina nge kena kukutana na yau. Yandi kebakusaka banguilu na nge ya kati mpenza—ata kana bantu yankaka kena kubakusa yau ve.
Nkunga 34:18: ‘Yehova kele penepene ya bantu yina kele na bantima yina metoluka; Yandi kevukisaka bantu yina kena kuniokuama na makanisi.’
Nsasulu: Nzambi melaka ti yandi kesadisa nge ntangu nge kele na kiadi. Yandi lenda pesa nge ngolo samu nge nunga mpasi na nge.
Maladi
Nkunga 41:3: ‘Yehova kesadisa yandi na mfulu na yandi ya maladi.’
Nsasulu: Nzambi lenda sadisa nge ntangu nge kele na maladi ya ngolo na kupesaka nge kiyenge ya ntima, kikadulu ya kukanga ntima, mpe nduenga samu nge baka banzengolo ya mbote.
Yezaya 33:24: ‘Ata muntu mosi ve yina kena kuzinga kuna ketuba: “Munu kena kubela.”’
Nsasulu: Nzambi melaka ti na bilumbu kena kuiza, bantu nionso kesepela kuvuanda na mavimpi ya mbote.
Kutungisama na makanisi
Nkunga 94:19: ‘Ntangu mitungisi kumaka mingi na kati na munu, nge bombaka munu mpe nge kitisaka munu ntima.’
Nsasulu: Kana beto mesosa lusadusu ya Nzambi ntangu beto kena kutungisama na makanisi, yandi lenda sadisa beto samu beto tatamana kuvuanda na kiyenge.
1 Piere 5:7: ‘Beno . . . loza mitungisi na beno nionso na yandi samu yandi ketudilaka beno dikebi.’
Nsasulu: Nzambi kemonaka bampasi yina beto kena kukutana na yau. Yandi kena kulomba beto beto sambila yandi samu na mitungisi na beto.
Bamvita
Nkunga 46:9: ‘Yandi kena kumanisa bamvita na ntoto ya mvimba.’
Nsasulu: Ntama mingi ve Kimfumu ya Nzambi kekatula bamvita nionso.
Nkunga 37:11, 29: ‘Bantu ya kumikitisa kebaka ntoto, mpe bakemona mpenza kiese na kiyenge mingi. . . . Bantu ya lunungu kebaka ntoto, mpe bakezinga mvula na mvula na zulu na yau.’
Nsasulu: Bisadi ya Nzambe kevuanda na kiyenge na ntoto samu na mvimbamvimba.
Kukitungisa samu na bilumbu kena kuiza
Yeremia 29:11: “‘Munu mezaba mbote makanisi yina munu kena kukanisa samu na beno,’ Yehova muntu metuba, makanisi ya kiyenge, kasi ya mpasi ve, samu na kupesa beno luzingu ya mbote na bilumbu kena kuiza mpe kivuvu.”
Nsasulu: Nzambi melaka ti bisadi na yandi kevuanda na luzingu ya mbote na bilumbu kena kuiza.
Kusonga 21:4: ‘Yandi kepangusa mansanga nionso na meso na bau, lufua kevuanda diaka ve, kiadi, bidilu mpe mpasi kevuanda diaka ve. Mambu ya ntama meluta.’
Nsasulu: Nzambi melaka ti yandi kekatula mambu nionso ya yimbi yina nge kena kumona mpe yina kena kukumina nge bubu yayi.
a Yehova kele nkumbu ya Nzambi. (Nkunga 83:18) Tala disolo “Yehova azali nani?”
Tala diaka...
MALONGI YA BIBLIA
Meka ndongokolo na beto ya Biblia
Banda ndongokolo ya Biblia ya ofele na wola mpe kisika yina nge kepona.