Biblia metubila mambu yina kemonisa ‘nsuka ya mambu ya ntangu yayi,’ to ‘nsuka ya yinza yayi.’ (Matayo 24:3; Bible en Kituba) Biblia kebokidilaka kilokola ya ntangu yango “bilumbu ya nsuka” mpe “ntangu ya nsuka,” to “nsuka.”—2 Timoteo 3:1; Daniele 8:19; Bible en Kituba.

 Biblia samunaka mambu mingi yina kana yakena kusalama nzila mosi, yakevuanda “kidimbu” samu na kuzaba bilumbu ya nsuka. (Luka 21:7) Beto tadila ndambu ya bifuani:

 Bamvita kevuanda na yinza ya mvimba. Yesu samunaka: ‘Yinsi mosi kenuanisa yinsi yankaka mpe kimfumu mosi kenuanisa kimfumu yankaka.’ (Matayo 24:7) Mutindu mosi, Kusonga 6:4 samunaka muntu mosi ya kifuani yina kena kunata mpunda yina kena kumonisa mvita yina kena ‘kukatula kiyenge na ntoto.’

 Bansatu. Yesu samunaka: ‘Nsatu kevuanda.’ (Matayo 24:7) Mukanda ya Kusonga samunaka diaka muntu yankaka ya kifuani yina kena kunata mpunda, kutambula na yau kesala ti nsatu vuanda na bisika mingi yina mesuasana.—Kusonga 6:5, 6.

 Kuningana ya ntoto ya ngolo. Yesu tubaka ti ‘ntoto keningana na bisika ya mutindu na mutindu.’ (Matayo 24:7; Luka 21:11) Kuningana yango ya ntoto ya ngolo na yinza ya mvimba kesala ti bantu mona mpasi mingi mpe kesala ti bantu kufua na mutindu yina mesalamaka ntete ve.

 Maladi. Yesu tubaka ti, ‘maladi ya yimbi’ to baepidemi kevuanda.—Luka 21:11, Bible en Kituba.

 Bakrime. Atako bakrime kevuandaka banda ntama mpenza, Yesu samunaka ti na bilumbu ya nsuka, ‘kikadulu ya kufua bansiku kekuma mingi.’—Matayo 24:12.

 Kubebisama ya ntoto. Kusonga 11:18 samunaka ti bantu ‘kebebisa ntoto.’ Bakesala yau na mitindu mingi, kaka ve na nzila ya kinkesi mpe na nzila ya kaniaka kasi diaka na mutindu bakebebisa mupepe mpe kisika yina bantu kezingaka.

 Kubeba ya bikadulu ya mbote. Na 2 Timoteo 3:1-4, Biblia samunaka ti bantu kevuanda bantu yina ‘mekondua butondi, bantu yina mekondua kukuikama, . . . bantu yina kezolaka ve kusala nguizani, bantu yina kevuninaka bantu mambu, bantu yina mekondua kukiyala, bantu ya nko, bantu yina kezolaka ve mambu ya mbote, bantu yina ketekaka bayankaka, bantu ya yintu ngolo, bantu yina mefuluka na lulendo.’ Bantu kena kumonisa mingi mpenza bikadulu yango yau yina beto lenda bokidila kilokola ya ntangu yango ‘bantangu ya mpasi mpe ya mikakatano.’

 Nguizani kevuanda diaka ve na mabuta. Na 2 Timoteo 3:2, 3, Biblia samunaka ti bantu mingi kevuanda bantu yina ‘kezolanaka ve’ na kati ya mabuta mpe bana kevuanda ‘bantu yina kezitisaka bibuti ve.’

 Bantu kezola diaka Nzambi mingi ve. Yesu samunaka ti: ‘Nzola ya bantu mingi kekita.’ (Matayo 24:12) Yesu monisaka ti bantu mingi kevuanda diaka ve na nzola samu na Nzambi. Mutindu mosi, 2 Timoteo 3:4 metuba ti na bilumbu ya nsuka, bantu ya mutindu yango kevuanda ‘bantu yina kezolaka minkembo na kisika ya kuzola Nzambi.’

 Luvunu ya mabundu. Na 2 Timoteo 3:5, Biblia samunaka ti bantu kemonisa lokola bakesambilaka Nzambi kasi bakezitisaka ve bansiku na yandi na luzingu na bau.

 Mbakusulu ya mbote ya bambikudulu ya Biblia. Mukanda ya Daniele samunaka ti “na ntangu ya nsuka,” bantu mingi kekuma na mbakusulu ya mbote ya bakedika ya Biblia, bakekuma mpe na mbakusulu ya sikisiki ya bambikudulu yayi.—Daniele 12:4, noti na yinsi ya paje.

 Kisalu ya kusamuna na yinza ya mvimba. Yesu samunaka: ‘Nsangu ya mbote yayi ya Kimfumu kesamunua na ntoto ya mvimba kisika bantu mevuanda.’—Matayo 24:14.

 Bantu mingi kekipe ve mpe kevueza banduengueso. Yesu samunaka ti bantu mingi ketula ve dikebi na mambu mingi yina kena kumonisa ti nsuka mekuma pene. (Matayo 24:37-39) Katula yau, 2 Piere 3:3, 4 samunaka ti bantu yankaka kevueza mambu yango yina kena kumonana puelele mpe baketuba ti yakele na nsasulu mosi ve.

 Kukokisama ya bambikudulu nionso. Yesu tubaka ti na bilumbu nionso ya nsuka, bambikudulu yango nionso kekokisama nzila mosi; kaka ndambu ve kasi nionso.—Matayo 24:33.

 Ee. Mambu yina kena kusalama na yinza mpe badati ya Biblia kena kumonisa ti bilumbu ya nsuka bandaka na mvula 1914, mvula yina Mvita ya ntete ya yinza ya mvimba bandaka. Samu na kumona mutindu mambu yina kena kusalama na yinza kena kumonisa ti beto kena kuzinga na bilumbu ya nsuka, tala video yayi melanda:

 Na 1914, Kimfumu ya Nzambi bandaka kuyala na dizulu, mpe mosi na kati ya mambu ya ntete yina yasalaka vuandaka kukuka Satana Diabulu mpe bademo na yandi na dizulu mpe kupesa bau nzila ya kusala mambu kaka na ntoto. (Kusonga 12:7-12) Beto lenda mona bupusi ya Satana na luzingu ya bantu na bikadulu mpe na mambu mingi ya yimbi yina bakena kusala yina kena kusala ti bilumbu ya nsuka vuanda ‘bantangu ya mpasi mpe ya mikakatano.’—2 Timoteo 3:1.

 Bantu mingi kena kuniokuama na bantangu yango ya mpasi. Bakena kukitungisa ti bantu kena kuzaba diaka ve mutindu ya kuzinga na bantu yankaka. Bantu yankaka kutu kena kubanga samu na luzingu yina bantu kevuanda na yau na bilumbu kena kuiza.

 Kaka na ntangu yango, bantu yankaka yina kena kuniokuama samu na mambu yina kena kusalama na yinza bakele na kivuvu samu na bilumbu kena kuiza. Bakendimaka ti ntama mingi ve Kimfumu ya Nzambi kesala diambu samu na kumanisa bampasi na yinza. (Daniele 2:44; Kusonga 21:3, 4) Bakena kuvingila na ntima yinda nionso ti Nzambi kokisa bansilulu na yandi, mpe bakebakaka lukindusu na bampova yayi ya Yesu: ‘Muntu yina kekanga ntima tii na nsuka kevuka.’—Matayo 24:13; Mika 7:7.