Ve, mabundu nionso kele ve mutindu mosi. Biblia kele na bifuani mingi ya mabundu yina kesepedisaka ve Nzambi. Beto lenda kabula mabundu yango na mitindu zole ya ngudi.

Mutindu 1: Mabundu yina kesambilaka banzambi ya luvunu

Biblia memonisa nsambudulu ya banzambi ya luvunu na bampova lokola “ndozi ya mpamba,” “kima ya mpamba,” mpe “yakepesaka ve mambote.” (Yirimia 10:3-5; 16:19, 20) Yehova a Nzambi pesaka dikanda ya Yisaele ya ntama ntumu: “Nge fueti vuanda ve na banzambi yankaka, katula kaka munu.” (Kobima 20:3, 23; 23:24) Ntangu Bayisaele vuandaka sambila banzambi yankaka, ‘Yehova vuandaka fuemina’ bau.​—Mitángo 25:3; Balevi 20:2; Basambisi 2:13, 14.

 Tii bubu yayi, Nzambi kekukimonaka kaka mutindu yina samu na bantu yina “bakebokidilaka banzambi.” (1 Bakorinti 8:5, 6; Bagalatia 4:8) Yandi kena kulomba bantu yina kele na nsatu ya kusambila yandi balemba kusangana na bantu yina kele na mabundu ya luvunu, yandi metuba: “Beno bima na kati na bau, mpe beno vambana.” (2 Bakorinti 6:14-17) Kana mabundu nionso vuandaka mutindu mosi mpe yakenataka bantu na Nzambi, samu na yinki Nzambi mepesa ntumu yayi?

Mutindu 2: Mabundu yina kesambilaka Nzambi ya kedika na mutindu yina yandi kendimaka ve

 Na bantangu yankaka, Bayisaele vuandaka sambila Nzambi na kusadilaka bindimeli mpe mimeseno ya bantu yina vuandaka sambila banzambi ya luvunu. Kasi Yehova vuandaka manga basangisa ata fioti nsambudulu ya kedika na ya luvunu. (Kobima 32:8; Kolimbola Mibeko 12:2-4) Yesu teminaka bamfumu ya mabundu ya ntangu na yandi samu na mutindu bavuandaka sambila Nzambi; bavuandaka kukimonisa lokola bavuandaka sambila Nzambi, nzokande bavuandaka bantu ya luvunu bavuandaka ‘zimbakana mambu yina meluta mfunu na kati ya Nsiku, yazola monisa lunungu, ntima kiadi mpe kukuikama.’​—Matai 23:23.

 Mutindu mosi bubu yayi, kaka dibundu yina kelongaka kedika nde kenataka bantu na Nzambi. Kedika yango kele na Biblia. (Yoane 4:24; 17:17; 2 Timote 3:16, 17) Mabundu yina malongi na yau kele ve na nguizani na Biblia, yakekabulaka bantu na Nzambi. Malongi mingi yina bantu kekanisaka ti yamekatuka na Biblia, na kifuani, butatu, muela kekufuaka ve, mpe bilungi ya tiya, yamekatukaka nde na nsambudulu ya banzambi ya luvunu. Mabundu yina kelongaka malongi yango nsambudulu na bau kele “mpamba,” to yakepesaka ve mambote, samu yakena kutula kinkulu ya mabundu na kisika ya bansiku ya Nzambi.​—Marko 7:7, 8.

 Nzambi keyinaka luvunu ya mabundu. (Tito 1:16) Samu dibundu sadisa bantu bapusana penepene ya Nzambi, malongi na yau fueti vuanda na bupusi na luzingu ya bantu konso kilumbu, kasi yafueti suka kaka ve na mimeseno mngimingi. Na kifuani, Biblia metuba: “Kana muntu kekanisaka ti yandi kesambilaka na mutindu yina mebonga kasi yandi kepekisaka ve ludimi na yandi, yandi kena kuvuna ntima na yandi mosi, mpe nsambudulu na yandi kele mpamba. Nsambudulu yina kele ya kuvedila mpe na mvindu ve na meso ya Nzambi na beto mpe Tata yau yayi: kusadisa bana yina mefuilaka bibuti mpe banketo yina mefuilaka babakala na mpasi na bau, mpe kukitanina mpe kuvuanda ve na mvindu ya yinza.” (Yakobo 1:26, 27 noti na yinsi ya paje) The King James Version mesadila mpova “dibundu ya kuvedila” samu na kutubila nsambudulu ya kuvedila, yina mekondua luvunu.