Mvuama mpe Lazare vuandaka bantu yina Yesu tubilaka na masolo na yandi. (Luka 16:19-31) Na disolo yango, babakala vuandaka monisa grupe mosi ya bantu: (1) bamfumu ya mabundu ya Bayuda ya lulendo ya ntangu ya Yesu mpe (2) bantu ya mpamba kasi ya kukuikama yina yambaka nsangu ya Yesu.

Na disolo yayi

•  Yinki Yesu tubaka na yina metadila mvuama mpe Lazare?

•  Disolo yango salamaka mpenza?

•  Disolo yango kekindisaka dilongi ya bilungi ya tiya?

•  Yinki zola monisa disolo ya mvuama mpe Lazare?

 Na Luka kikapu 16, Yesu kena kutubila babakala zole yina kutanaka na nsobolo mosi ya nene na luzingu na bau.

 Tala bunkufi ya disolo yango ya Yesu: Bakala mosi ya mvuama vuandaka na luzingu mosi ya kitoko. Bakala mosi ya mputu na nkumbu ya Lazare vuandaka na ntuala ya porte ya yinzo ya mvuama; yandi vuandaka na kivuvu ti bakepesa yandi madia yina vuandaka kubua na yinsi ya meza ya mvuama. Na manima, Lazare kufuaka mpe bambasi nataka yandi na dizulu pembeni ya Abrahami. Mvuama diaka kufuaka mpe bazikaka yandi. Disolo yango buelaka diaka ti, babakala yango zole tatamanaka kuzinga na manima ya kufua. Mvuama yina kufuaka vuandaka niokuama na tiya ya ngolo mpe yandi lombaka Abrahami yandi tinda Lazare yandi tula nsongi ya musapi na yandi na maza mpe yandi kumisa ludimi na yandi madidi. Abrahami tulaka ve dikebi na ndombolo ya mvuama mpe yandi tubaka ti banzingulu ya babakala yango zole sobaka mpenza mpe dibulu mosi ya nene vuandaka kabula babakala yango zole yina salaka ti muntu mosi ve kati na bau zole vuanda na dikoki ya kuzengisa dibulu yango.

 Ve. Yakele kifuanusu yina Yesu sadilaka samu na kulonga dilongi mosi. Bantu ya mayele kendima ti disolo yango kele kifuani. Na kifuani, na paje ya ebandeli ya Biblia mbangudulu ya Luther yina bimaka na 1912 ketubaka ti yakele kifuani. Mpe Bible de Jérusalem ya Catholique, na noti na yinsi ya paje, metuba ti yakele “kifuani yina bamesadila lokola disolo ya muntu mosi yina salaka zinga ata fioti ve.”

 Yesu vuandaka longa malongi ti muntu ketatamanaka kuzinga na manima ya lufua? Yandi zolaka tuba ti bantu keniokuamaka na bilungi ya tiya na manima ya lufua mpe Abrahami na Lazare vuandaka na dizulu? Mambu mingi kena monisa ti yakele ve mutindu yina.

 Na kifuani:

•   Kana mvuama vuandaka na kisika mosi ya kedika, yina vuandaka na tiya mosi ya ngolo, tiya yango zolaka yumisa ve maza yina vuandaka na musapi ya Lazare?

•   Ata kana yau yumaka ve, ditanga mosi ya maza zolaka pesa muntu ya mvuama lusadusu yina kezingila samu yandi bika yokana na tiya ya kedika?

•   Yinki mutindu Abrahami zolaka vuanda na luzingu na dizulu, nzokande ntangu Yesu vuandaka bula disolo yango, mutindu yandi tubaka yau puelele, ata muntu mosi ve kuendaka deja na dizulu?—Yoane 3:13.

 Ve. Atako yakele ve disolo ya kedika, bantu yankaka ketubaka ti yakemonisaka dibanza ti bantu ya mbote kekuendaka na dizulu mpe bantu ya yimbi kekuendaka na bilungu ya tiya. a

 Dibanza yango kele mbote? Ve.

 Dilongi ya bilungi ya tiya kele ve na nguizani na dilongi ya Biblia na yina metadila yina kekuminaka muntu kana yandi mekufua. Na kifuani, yaketubaka ve ti bantu nionso ya mbote yina kekufuaka ketatamanaka kuzinga na luzingu mosi ya kitoko to bantu ya yimbi kekuendaka niokuama na bilungi ya tiya. Kasi, Biblia metuba puelele ti: ‘Bantu yina kele na luzingu mezaba ti bakekufua, kasi bantu ya kufua zaba ata kima mosi ve.’—Longi 9:5.

 Disolo yango kena kumonisa ti grupe zole ya bantu vuandaka pene ya kukutana na bansobolo ya nene na luzingu na bau.

 Mvuama vuandaka monisa na puelele nionso bamfumu ya mabundu ya Bayuda, ‘yina vuandaka zola mbongo.’ (Luka 16:14) Bavuandaka kuwa Yesu ntangu yandi vuandaka longa, kasi bateleminaka nsangu na yandi. Bamfumu ya mabundu yango vuandaka tadila mingi ya bantu lokola bantu ya mpamba.—Yoane 7:49.

 Lazare vuandaka monisa bantu mingi yina ndimaka nsangu ya Yesu mpe yina bayinaka na bamfumu ya mabundu ya Yuda.

 Kusoba ya luzingu vuandaka mpenza ya nene samu na bagrupe ya bantu yango zole.

•   Bamfumu ya mabundu ya Yuda kanisaka ti Nzambi vuandaka ndima bau. Kasi bavuandaka bantu ya kufua na meso na yandi, ntangu Nzambi lozaka bau mpe nsambudulu na bau samu bamangaka kundima nsangu ya Yesu. Mpe nsangu yina Yesu mpe banlonguki na yandi vuandaka longa vuandaka niokola bau.—Matayo 23:29, 30; Bisalu 5:29-33.

•   Mingi ya bantu—yina vuandaka ya kusundolama na bamfumu ya mabundu—bandimamaka na Nzambi. Bantu mingu ndimaka nsangu yina Yesu longaka mpe babakilaka yau mambote. Bakumaka na diluaku ya kundimama na Nzambi samu na mvimbamvimba.—Yoane 17:3.