Bankuelani mingi kezingaka kintuadi tekila bakuelana. Bayankaka kesalaka mutindu yina samu bazaba kana bamebonga mpenza kuvuanda kisika mosi mpe bakekanisaka ti kana bamesala plina yakevuanda pete samu dikuela na bau nunga. Yakele dikanisi ya mbote kuzinga kisika mosi tekila kukuelana?

Na disolo yayi

•  Yinki Biblia metuba?

•  Kuzinga kisika mosi kesala ti beno vuanda ya kubongama samu na dikuela?

•  Kuzinga kisika mosi kesala ti beno nunga kulunda mbongo?

•  Kuzinga kisika mosi kesala ti nge bika kuela muntu ya yimbi?

•  Yakele na mutindu yankaka yina meluta mbote?

•   Biblia mepekisa kusangisa nzutu tekila kukuelana. Na kifuani, yametuba: “Beno manga pite.” (1 Batesaloniki 4:3; 1 Bakorinti 6:18) Yamesangisa diaka bantu zole yina kena kuzinga kisika mosi, ata kana bakele na makanisi ya kukuelana. a Bansikudukusu ya Biblia ketaninaka bantu zole yina mezolana na kubaka ve buemba kondua kukuelana mpe babika kukutana na mambu yankaka ya mpasi yina kebimaka kana bantu zole kena kuzinga kisika mosi kondua kukuelana.

•   Dikuela kele nkubukulu yina mekatuka na Nzambi. Ntangu yandi bandisaka yau, yandi tubaka: “Bakala kebika tata na yandi mpe mama na yandi mpe yandi kekangama na nketo na yandi mpe bakekuma nsuni mosi.” (Ebandeli 2:24) Kana bakala mpe nketo mesala ndefi ya dikuela, yakevuanda pete samu basala dibuta mosi ya nzola mpe ya ngolo.

 Bantu yankaka ketubaka ee. Bakekanisaka ti bantu zole yina kena kuzinga kisika mosi kezabaka mambu mingi na kusalaka bisalu ya yinzo kintuadi mpe na kuzabanaka bikadulu. Kasi, kuzitisa ndefi ya dikuela nde kele sekele samu na kuvuanda na dikuela ya kiese.

 Yinki mutindu bankuelani lenda longuka kukangama na muninga yavuanda na ntangu ya mbote to ya mpasi? Yakele ve na kubandaka ntete “na mua ntangu mosi ya kumeka” ntangu yina mosimosi na bau kena kumona ti yandi lenda zenga nguizani yango. Kutu, nguizani ya bantu zole kenungaka kana bakena kumona ti bakele na ndefi mosi ya ngolo bamesalaka mpe kusala kintuadi samu na kununga mambu ya mpasi.

 Diambu ya kulunda: Bantu yina keponaka kuzinga ntete kisika mosi tekila kukuelana, fueti zaba ti bakebongisaka nde kuvambana na bau na kisika ya kubongisa kukuelana na bau.

 Nsikudukusu ya Biblia: “Nionso yina muntu kena kukuna, yau nde yandi kebuka.”​—Bagalatia 6:7.

 Bantu yankaka ketubaka ee. Kusosasosa mosi salamaka na États-Unis monisaka ti 40% ya bantu yina ponaka kuzinga kisika mosi tekila kukuelana bakaka nzengolo yango samu yasadisa bau na kulunda mbongo. Nzokande, na manima ya kulutisa mua ntangu ya kuzinga kisika mosi, bantu yango tubaka ti bavuandaka ve na dikoki ya kukuelana samu na kukondua mbongo.

 Kuzinga kisika mosi tekila kukuelana lenda nata mambu yankaka ya mpasi, mingimingi samu na nketo. Na kifuani, kana bamezenga nguizani yango, mbala mingi nketo nde kebakaka kiyekua ya kuyundula bana.

 Diambu ya kulunda: Mambu ya mpasi yina kebimaka na kuzinga kisika mosi kondua kukuelana kevuandaka mingi kuluta mambu ya mbote yina bakanisaka kubaka.

 Nsikudukusu ya Biblia: “Munu, Yehova, munu kele Nzambi na nge, Muntu yina kena kulonga nge samu na mambote na nge.”​—Yisaya 48:17.

 Bantu yankaka ketubaka ee. Kasi, mukanda mosi Fighting for Your Marriage metuba, “mbala mingi bantu yina kezingaka kisika mosi tekila bakuelana kezabaka ve ti kuzinga kisika mosi kesalaka ti yavuanda mpasi samu na kuzenga nguizani yango.” Samu na yinki? Bantu yankaka yina kezingaka kisika mosi kondua kukuelana kekuizaka bakusa ti yakele na mambu mingi yina mesuasikisa bau. Kasi lokola bakele na kibulu mosi yina bakeyundulaka kintuadi, bakefutilaka yinzo kintuadi to nketo mebaka buemba yina kanamaka ve, yakesalaka ti bavuanda na guinzani yina bakebokidilaka “inertie de la cohabitation.” b Na bampova yankaka, Mukanda Fighting for Your Marriage mebuela, “bantu yankaka yina vuandaka mona ti bafueti zenga nguizani, bakuelanaka kaka samu yau nde vuandaka solision ya pete ya kubaka.”

 Diambu ya kulunda: Na kisika ya kukisosa kubaka nzengolo ya mbote, kuzinga kintuadi lenda sala ti nsukansuka yavuanda mpasi kuzenga nguizani mosi.

 Nsikudukusu ya Biblia: “Muntu ya kukenga kemonaka kivonza mpe yandi kesuamaka, kasi muntu yina mekondua mayele ketatamanaka kukuenda mpe yandi kekutanaka na bampasi.”​—Masese 22:3.

 Nge lenda tina mambu ya mpasi yina kebimaka na kuzinga kisika mosi kondua kukuelana mpe kundimisama ti nge kebaka dikuela yina kele ya kiese. Na yinki mutindu? Na kuzitisaka mpenza bansikudukusu ya Biblia yina metadila dikuela. Baka ntangu ya kusosa kuzaba muntu yina nge kele na nsatu ya kukuela tekila nge banda kuzinga na yandi kisika mosi. Yakele mbote kubaka nkuelani yina beno ketadilaka mambu mutindu mosi, beno kele na bindimeli mosi, na kisika ya kusosa kuzinga na muntu na kutadila kaka mutindu yandi kena kumonana na nzutu.

 Biblia kele na malongi yina lenda sadisa nge na kuvuanda na dikuela mosi ya kiese mpe ya ngolo. c Na kifuani, Biblia kele na bansikudukusu yina lenda sadisa nge na . . .

•   kumanga kuvuanda muntu yina mekondua kukuikama

•   kukuma mutindu ya muntu yina kevuanda nkuelani ya mbote

•   kuzaba mambu yina kemonisa ti muntu yango bonga ve samu na nge

 Samu na kuzaba mambu yankaka samu na disolo yayi, tala kitini “Dikuela mpe dibuta” na jw.org.

 Nsikudukusu ya Biblia: ‘Masonukua nionso kele ya kupemama na Nzambi mpe yakele na mfunu samu na kulonga.’​—2 Timote 3:16.