“Ntima yinda ya bakala mpe nketo kemekamaka konso kilumbu. Ntima yinda kemonanaka lokola kaka kikadulu mosi yina kele na mfunu ve kana muntu kele ntete mpupa, kasi yakele na mfunu mingi samu dikuela nunga.”—John.

•  Samu na yinki nge fueti vuanda na ntima yinda?

•  Yinki mutindu nge lenda monisa ntima yinda?

•  “Ntima yinda kele na mfunu mingi”

•   Kana nge mekuela nge lenda banda kumona banzimbala ya nkuelani na nge.

   “Kaka na manima ya kukuelana, yakevuandaka pete samu na kubanda kumona bikadulu ya nkuelani na nge yina kesepedisaka nge ve. Kana muntu mekuma na makanisi ya yimbi ya mutindu yina, yekevuandaka pete samu muntu kondua ntima yinda.”—Jessena.

•   Kukondua ntima yinda lenda tinda nge nge tuba kondua kukanisa.

   “Munu kezingilaka ve samu na kutuba mambu yina munu kena kukanisa, mpe mbala yankaka munu ketubaka mambu yina bongaka ve mutuba. Kana muvuandaka na ntima yinda, mulendaka kanisa kana mambu muzola tuba kele na mfunu mpenza mpe kusala mambu yankaka kondua kutuba ata diambu mosi.”—Carmen.

   Biblia metuba: “Nzola kele na ntima yinda mpe na kimpombo.” (1 Bakorinti 13:4) Yamemonana ti yakele mbote bantu zole yina kena kuzolana bamonasana ntima yinda. Kasi yakevuandaka ntangu nionso mutindu yina ve. John yina beto tubilaka ntete metuba, “Mutindu mosi kaka na bikadulu nionso ya mbote, yakevuandaka pete kukondua ntima yinda na kisika ya kumonisa yau. Yakelombaka kusala ngolo samu na kutatamana kumonisa ntima yinda.”

•   Kana diambu mosi ya kintulumukina mebima.

   Kifuani: Nkuelani na nge metubila nge diambu mosi ya kukondua kimpombo. Mbala mingi nge diaka nge kevuandaka na nsatu ya kuvutudila yandi diambu ya kukondua kimpombo.

   Nsikudukusu ya Biblia: “Kufuemaka ve nsualunsualu, samu bazoba nde kefuemaka mpambampamba.”—Mosakoli 7:9.

   Mutindu ya kumonisa ntima yinda: Vingila fioti. Tekila nge pesa mvutu, meka ntete kuzaba kana nkuelani na nge zolaka mpenza kuluadisa nge to ve to yandi zolaka mpenza kufinga nge na bampova yina yandi mebimisa. Mukanda Fighting for Your Marriage metuba: “Mbala mingi beto kevutudilaka nkuelani na beto bampova na kulanda mutindu beto mekanisa na diambu yina nkuelani na beto metuba kondua kuzaba kana yinki mpenza yandi zolaka tuba to yinki mpenza yandi vuandaka tuba.”

   Ata kana nkuelani na nge vuandaka sosa kuntota nge, monisa ntima yinda mpe kuvutudila yandi ve, kusala plina kesala ti nge kufua tiya na kisika ya kupedisa yau diaka. Biblia metuba: “Kisika nkuni kele ve, tiya kekufuaka.”—Masese 26:20.

   “Kana nge mebanda kutadila nketo na nge lokola mbeni, meka kukanisa diambu yina tindaka nge nge zola yandi mpe meka kusadila yandi mbala mosi diambu ya mbote.”—Ethan.

   Biuvu samu na kukanisa:

  •  Yinki nge kesalaka kana nkuelani na nge metuba to mesala diambu mosi kondua kimpombo?

  •  Yinki mutindu nge lenda monisa ntima yinda mingi diaka kuluta kana diambu ya mutindu yina mebima?

•   Kana nkuelani na nge kena kuvutukila mbala na mbala diambu yina kefuemisaka nge.

   Kifuani: Nkuelani na nge kevuandaka kaka na retare, yakelombaka nge vingila yandi kaka, mpe yakefuemisaka nge.

   Nsikudukusu ya Biblia: “Beno tatamana kukanga ntima muntu na muntu na mambu ya muntu yankaka mpe beno nlemvukilanaka na ntima ya mvimba.”—Bakolose 3:13.

   Mutindu ya kumonisa ntima yinda: Tula mambu metadila dikuela na beno na kisika ya ntete na kisika ya kutula bansatu na nge mosi na kisika ya ntete. Kukiyuvusa, ‘Kana mekumisa diambu mosi grave, yakebongisa dikuela na beto to yakebebisa diaka mambu?’ Diaka, kuzimbakana ve ti “beto nionso beto kebulaka dibaku.” (Yakobo 3:2) Yazola monisa, nge diaka nge kele na mambu ya kusala samu mambu tambula mbote.

   “Na bantangu yankaka, munu kemonisaka ntima yinda mingi na nkundi na munu na kisika ya kumonisa yau na bakala na munu. Munu mekanisa ti yakele samu munu kelutisaka ntangu mingi na bakala na munu mpe munu kemonaka banzimbala na yandi. Kasi ntima yinda kele mosi ya bikadulu ya nzola, kutu yakele kidimbu yina kemonisaka luzitu—na yau yakele na mfunu na dikuela na munu.”—Nia.

   Biuvu samu na kukanisa:

  •  Nge kevuandaka na ntima yinda na nkuelani na nge?

  •  Yinki mutindu nge lenda monisa diaka ntima yinda mingi na bilumbu kena kuiza?