Lukutakanu yina ONU salá (COP27) samu na kuzonzila mambu ya kilima manisá na kilumbu ya 20 novembre 2022. Bamfumu ya baluyalu mpe bantu ya nkaka ya mayela yina vandá na lukutakanu yayi baká mukanu ya kupesa mbongo na bayinsi yina kele ve na mbongo mingi samu na kusadisa bawu na kuyidika mambu ya kilima yina ke na bebaka. Ata mutindu yina bantu mingi ke na zonzá ti mbongo yina ke yidika ve bamambu.

•   Na kilumbu ya 19 novembre 2022, António Guterres, Secretaire ya Nations-Unies, zonzaka: “Mu ke na kilengi mingi samu beto me baka mukanu ya kubumba mbongo samu na kusadisa bantu yina ke na talá mpasi samu na kubeba ya kilima. Kasi mambu ya tsyeleka ke ti, ya ke lunga ve . . . Ntoto ya beto ke kaka na mpasi.”

•   Mary Robinson, mfumu ya ntama ya Irlande mpe mfumu ya ntama ya kimvuka ya ONU yina ke nwaninaka bamambu yina me tadila luzingu ya bantu (Haut-Commissaire aux droits de l’homme) zonzá mambu yayi na kilumbu ya 20 novembre 2022: “Ya tsyeleka, kilima ya ntoto ke ve ntama na kubeba mpe ya lenda natila bantu nyonso bampasi.”

 Bantwenya ke na kati ya bantu yina ke na boma mingi samu na ntoto. Kasi, bamfumu ya baluyalu ke lenda kwandi kulungisa mukanu yina ba me baka, to nsilulu yina ba me pesa ya kuyidika mambu ya kilima yina ke na bebisá ntoto? Yinki Biblia ke zonzaka?

 Biblia ke lakisá ti ata bangolo mingi yina bamfumu ya yinza me sala, nyonso yina ba lenda sala ke yidika ve mambu ya kilima. Ya ke na bamambu zole yina ke na natá beto na kuzonza yawu:

•   ‘Kima yina ke ya kutengama, ba lenda yidika ve yawu’.—Longi 1:15.

   Yinki ya zola zonza: Bamfumu ya baluyalu ke lenda ve kusala mambu nyonso yina ba ke na kanisá kusala, samu Nzambi salá ve bantu samu na kutwadisa luzingu ya bawu, bawu mosi. (Yeremia 10:23) Ata bamfumu ya baluyalu ya ntoto nyonso vukana mpe ba sala bangolo ya bawu nyonso, ba ke lenda ve kumanisa bampasi nyonso ya bantu.

•   “Bantu ke vwanda na munimi, bawu ke zola mbongo, . . . ke tala ve bantu kyadi.”—2 Timote 3:2, 3.

   Yinki ya zola zonza: Biblia zonzá pwelele ti na bilumbu ya beto bantu ke sosa kaka bambote ya bawu mosi, mpe ba ke zole ve kuwisana samu na kusala bamambu yina ke natina bantu ya nkaka bambote.

 Kuyidama ya ntoto, ke katuka ve na bamambu yina bamfumu ya baluyalu ke sala to ke zonza bubu yayi. Nzambi me soola Mfumu yina me lunga samu na kuyala ntoto, Mfumu yango ni Yesu Kristo. Biblia ke zonzá mambu yayi samu na Yesu:

•    ‘Luyalu ya kimfumu ke vanda na zulu ya mapeka ya yandi. Ba ke bokila yandi Mulongi ya Mayela, Nzambi ya Ngolo, Tata yina ke ve na Nsuka, Mfumu ya Kizunu.’—Izaya 9:6,

 Yesu ke Mfumu ya Kimfumu ya Nzambi yina ke na mazulu. (Matayi 6:10) Yandi ke na ngolo, mayela mpe nsatu ya kukipe ntoto na bantu yina ke zinga na zulu ya yawu. (Nkunga 72:12, 16) Na lutumu ya yandi, kimfumu ya mazulu ke kufwa bantu yina “ke bebisaka ntoto” mpe ya ke yidika mambu nyonso yina ke ya kubeba na ntoto.—Luzabusu 11:18; Izaya 35:1, 7.

 Samu na kuzaba dyaka mingi na yina me tadila mambu yina ke sala ti kilima yidama, tanga “Yinki Biblia ke zonzá samu na kusoba ya kilima mpe bilumbu yina ke na kwizaka.”