Na kilumbu ya lundi 10 octobre 2022, bantu ya Russie kubulá ba missiles na bisika ya nkaka ya bwala ya Ukraine. Ba salak’ yawu samu na kilumbu ya 8 octobre, bantu ya Ukraine kubulá minduki yina mwangisá pont yina ke vukisá bwala ya Crimée na bwala ya Russie. Mwa bilumbu tekila bamambu yayi salama, bamfumu ya nkaka ya yinza zonzá ti Armagedoni lenda vanda dyaka ve ntama.

•   Na kilumbu ya 6 octobre 2022, Joe Biden, mfumu ya bwala ya États-Unis zonzaka: “Banda ntangu yina Kennedy kuzwá mambu na bantu ya URSS na ba missiles yina ba tulá na bwala ya Cuba samu na kukubula bwala ya États-Unis, ya ke mbala ya ntete beto me kuma dyaka pene-pene na Armagedoni. [. . .] Mu kanisa ti kana bantu sadila minduki ya ngolo, Armagedoni lenda banda.”

•   Na kilumbu ya 8 octobre 2022, BBC News yufulá Volodymyr Zelensky, mfumu ya bwala ya Ukraine, yinki lenda salama kana Russie kubula minduki ya ngolo na bwala ya Ukraine. Yandi zonzaka: “Mu kanisa ti ya lenda nata na Armagedoni, mpe ya lenda vanda mambu ya mpasi samu na yinza nyonso.”

 Kusadila minduki ya ngolo lenda nata kwandi na Armagedoni? Yinki Biblia ke zonzaka?

 Ve. Ba ke zonzilá “Armagedoni” kaka mbala mosi na Biblia, na buku ya Luzabusu 16:16. Armagedoni ke ve mvita yina ke salama na kati ya bamfumu ya makanda. Kasi ya kele mvita yina ke salama na kati-kati ya Nzambi na ‘bamfumu nyonso ya yinza.’ (Luzabusu 16:14) Na Armagedoni, Nzambi ke manisa luyalu ya bantu awa na ntoto.—Danyele 2:44.

 Samu na kuzaba dyaka mingi yinki Armagedoni ka nata na ntoto, tanga disolo Yinki kele mvita ya Armagedoni?

 Ve. Ata ti na bilumbu yina ke kwiza bamfumu ya yinza sadila minduki ya ngolo, Nzambi ke bika ve ba mwangisa ntoto. Biblia ke zonzaka:

•   ‘Ntoto ke bikanaka ntangu nyonso.’—Longi 1:4.

•   ‘Bantu ya lunungu ke baka ntoto mpe ba ke zinga ntangu nyonso na zulu ya yawu.’—Nkunga 37:29.

 Kasi, bambikudulu ya Biblia mpe bamambu yina ke na salamá bubu yayi ke na lakisá ti beto ke na kwendá na ntangu yina bamambu ke soba mingi awa na ntoto. (Matayi 24:3-7; 2 Timote 3:1-5) Nge lenda zaba yinki Biblia ke zonzá na yina me tadila bilumbu yina ke kwiza na nzila ya masolo samu na kuzaba Biblia ya mpamba.