Kuvanda dyaka ve na kisalu lenda nata bamambu mingi ya mpasi na dikanda, mutindu kukondwa mbongo mpe bimbevo yina manyongi ke nataka. Beto tala mwa malongi ya Biblia yina ke simbá kaka na ba yina ke sadilak’ yawu.

•   Zonza na bampangi mambu yina ke na nge na ntima.

   Biblia ke zonzaka: ‘Ndiku ya tsyeleka ke zolaka konso ntangu.’—Bingana 17:17.

   Ntangu beto ke vandá dyaka ve na kisalu, beto lenda vanda na manyongi, nkele, kuzaba dyaka ve yinki ya kusala to kutala ti beto ke dyaka ve mfunu. Kana nge zonza na dikanda ya nge to na bandiku ya nge mambu yina ke na nge na ntima, ba lenda sadisa nge. Ba lenda pesa nge mwa malongi ya bamambu yina nge lenda sala.

•   Kuvanda ve na manyongi mingi.

   Biblia ke zonzaka: “Beno tala ntima mpasi ve samu na mambu yina ke salama mbasi samu ti mbasi ke vwanda na mambu ya yandi.”—Matayi 6:34.

   Biblia ke zonzá na beto na kubongama na bamambu yina lenda kumina beto. (Bingana 21:5) Kasi ya ke zonzá mpe na beto na kutatikisa ve yintu samu na bilumbu yina ke kwiza. Ya tsyeleka, mingi ya bamambu yina beto ke tatikisá yintu ke salamaka ya yawu ve. Ya ke mbote na kukanisa kaka na yina beto lenda sala bubu yayi.

   Biblia ke pesá beto malongi ya nkaka samu na kutatikisa ve mingi yintu na mantwala ya bankwamusu. Samu na kuzaba dyaka mingi, tanga “ Comment gérer le stress. ”

•   Soba mwa bamambu samu na kusadila mbongo na faso ya mbote.

   Biblia ke zonzaka: ‘Mu zaba kuzinga na kati ya bimvwama to na kati ya bansatu.’—Bafilipi 4:12.

   Sosa kusepela na luzingu ya nge ya malu-malu. Ya zola zonza kuzinga na yina nge ke na yawu, mpe kusoba mutindu ya nge ya kusadila mbongo. Sala nyonso na kukota ve bamfuka kidi-kidi.—Bingana 22:7.

   Disolo “Wa’ faso ya kuzinga na mbongo ndambu?” ke pesa dyaka nge malongi ya nkaka samu na kubongisa faso ya kusadila mbongo yina nge ke na kuzwaka.

•   Sadila ntangu ya nge na faso ya mbote.

   Biblia ke zonzaka: ‘Beno fwana kudyatila na ndwenga nyonso. Beno fwana kusadila ntangu.’—Bakolose 4:5.

   Ata ti nge ke na kwendá dyaka ve na kisalu, yidika faso ya nge ya kulutisa ntangu. Ya ke sadisa nge na kusala bamambu na mutindu ya mbote, na kuvanda ve muntu ya kidi-kidi mpe na kutala ve ti nge ke dyaka ve mfunu.

•   Ndima kusala kima ni kima.

   Biblia ke zonzaka: ‘Difuta ke vandaka na konso kisalu ya ngolo.’—Bingana 14:23.

   Ndima kusala kisalu ya nkaka. Kuzonza ve ti nge ke sala ve kisalu mosi samu ya ke ve mfunu to mbongo yina ba ke na futa nge ke kaka fioti na yina ba vandá futa nge na ntama.

•   Tatamana.

   Biblia ke zonzaka: ‘Kunda mbuma ya nge na suka mpe kubika ve diboko ya nge kupema tii na nkokila samu nge zaba ve yinki ke mena.’—Longi 11:6.

   Kulemba ve. Zonza na bantu ti nge ke na sosá kisalu. Zonzila yawu na dikanda ya nge, na bantu yina zaba nge, na ba yina vandá salá na nge, mpe na bantu yina ke vandá kisika mosi na nge. Sosa mpe bisika nyonso yina ba ke na sosá bantu yina ke sala, mutindu na internet, to mikanda yina ba ke tulá na banzila. Filisa mikanda ya nge na bakompani, mpe vanda ya kubongama samu na kusolola na bamfumu ya bakompani yango.