Na yinza nyonso, bantu mingi yina ke zonzá ti ba ke landá Yesu Kristo ke na kati ya bamambu ya politike. Bantu ya nkaka ke kotilá bantu ya politike to bimvuka ya politike samu ba ke sosá kutula na mantwala malongi ya dibuundu ya bawu to makanisi ya bawu na yina me tadila mambu ya mbote to ya yimbi. Mpe bambala mingi, bantu ya politike ke sadilá bamambu yina ke kwamisá bantu samu ba zaba ti na kuzonzilak’ yawu, bantu ke landa bawu. Mpe na babwala ya nkaka, ya ke na mabuundu ya bakristo yina ke kumá mabuundu ya luyalu.

 Yinki nge ke na kanisaka? Ba yina ke landá Yesu Kristo lendá kota kwandi na bamambu ya politike? Na kuzwa mvutu, beto tala kifwani ya Yesu. Yandi zonzaka: “Mu me lakisa beno mutindu ya kusala, samu ti beno mpe, beno sala yawu.” (Yoane 13:15) Wapi kifwani Yesu biká na yina me tadila mambu ya politike?

 Ve. Yesu kotá ve na bamambu ya politike.

 Yesu sosá ve kuvanda mfumu na yinza yayi. Ntangu Satan sosá kupesa yandi ‘bimfumu nyonso ya yinza,’ Yesu mangá kuzwa lutumu na zulu ya bimfumu ya bantu. (Matayi 4:8-10) a Kilumbu ya nkaka, bantu yina vandá tala ti Yesu zolá vanda mfumu ya mbote, sosá kunata yandi na kusala politike. Biblia ke zonzá mambu yina salamaka: “Mutindu Yesu zabaka ti bantu zolaka kwiza kubaka yandi na ngolo samu na kusala yandi ntinu [to mfumu], yandi kabukaka dyaka na bawu, mpe kwendaka yandi mosi na mongo.” (Yoane 6:15) Yesu ndimá ve kusala bamambu yina bantu vandá sosa yandi sala. Yandi mangá kukota na bamambu ya politike.

 Na bamambu ya politike, Yesu kotilá ata muntu. Na kifwani, na ntangu ya Yesu, ba juifs vandá zolá ve kufuta mpaku na luyalu ya Baroma, mpe ba vandá tala ti ya vandá kilo yina ba lungá ve kufuta. Ntangu ba sosá kunata Yesu na kusoola nani yandi vandá kotila, yandi kotisá ve yinwa na kuzonza kana Baroma me lunga to ve na kulomba ti ba juifs futa bawu mpaku. Yandi zonzá na ba juifs: “Beno pesa na ntinu Sezale bima yina kele ya Sezale, mpe na Nzambi bima yina kele ya Nzambi.” (Marke 12:13-17) Yandi kotilá ata muntu na mambu yayi. Kasi yandi lakisá ti ya lungá ba futa mpaku na luyalu ya Baroma, yina vandá sala samu na mfumu ya nene Sezale. Na bamambu yina yandi zonzá kilumbu yina, Yesu lakisá mpe ti bantu me lunga ve kusala bamambu nyonso yina luyalu ke lombá na bawu na kusala. Muntu fwana pesa ve na luyalu kukangama ya yandi mpe lusambu ya yandi. Bamambu yayi, kaka Nzambi me lunga kuzwa yawu.—Matayi 4:10; 22:37, 38.

 Yesu kotilá Kimfumu ya Nzambi, Kimfumu yina ke na zulu, mpe yandi longak’ yawu na bantu. (Luke 4:43) Yesu kotá ve na bamambu ya politike samu yandi zabá ti ni Kimfumu ya Nzambi lendá lungisa luzolo ya Nzambi awa na ntoto, kasi bimfumu ya bantu ve. (Matayi 6:10) Yandi zabá ti Kimfumu ya Nzambi ke sala ve kintwadi na bimfumu ya bantu, kasi ya ke baka kisika ya bawu.—Danyele 2:44.

 Ve. Bilandi ya Yesu tumamá na musiku yina yandi pesá na kuvanda “ve bantu ya yinza.” (Yoane 15:19) Ba landá kifwani ya Yesu mpe ba kotá ve na bamambu ya politike. (Yoane 17:16; 18:36) Kasi ba salá kisalu yina Yesu tumisá bawu na kusala: kusamuna mpe kulonga bantu bamambu na yina me tadila Kimfumu ya Nzambi.—Matayi 28:18-20; Bisalu 10:42.

 Bakristo ya siècle ya ntete vandá tumamá ntete na Nzambi. Kasi, ba zabá mpe ti ya me bonga ba zitisa luyalu. (Bisalu 5:29; 1 Piere 2:13, 17) Ba vandá tumama na misiku ya luyalu mpe ba vandá futá mpaku. (Baroma 13:1, 7) Ata ti ba vandá kotá ve na bamambu ya politike, ba vandá sadila misiku ya luyalu samu na kunwanina nzutu ya bawu. Mpe ba vandá sadilá bima ya nkaka yina luyalu vandá pesaka.—Bisalu 25:10, 11; Bafilipi 1:7.

 Biblia ke lakisá pwelele ti Yesu na bilandi ya yandi ya ntete kotá ve na bamambu ya politike. Na yawu, Bambangi ya Yehova na yinza nyonso ke kotá ve na bamambu ya politike. Mutindu bakristo ya ntete, ba ke salá kisalu yina Yesu tumisá bawu na kusala. Ba ke samuná “Nsangu ya Mbote [...] ya Kimfumu.”—Matayi 24:14.