Na ngonda ya juin 2022, mfumu ya Groupe de la Banque mondiale me zonza: “Mambu ya mbongo me beba dyaka na yinza. Ntangu yayi, bima ke na kumá kaka ntalu, mpe ya me kuma mpasi na bantu na kuzwa mbongo.”

 Fonds Monétaire International me zonza: “Madya, gasoil, essence mpe bima ya nkaka ya mutindu yina ke na kumá ntalu mingi. Ya me sala ti luzingu kuma dyaka mpasi na babwala yina ke ve na mbongo mingi.”

 Biblia ke sadisá beto na kuzaba samu na yinki mambu ya mbongo ke na bebá kaka. Dyaka, ya ke lakisá yinki beto lenda samu na mambu yayi, mpe ya ke pesá kivuvu ti bamambu ke bonga.

•   Biblia ke bokilá ntangu ya beto “bilumbu ya nsuka.”—2 Timote 3:1.

•   Yesu zonzá ti “mambu yina ke pesaka bantu boma mingi,” ke salama na ntangu yayi. (Luke 21:11) Ntangu bima ke kumá kaka ntalu, ya ke pesá bantu boma. Ba ke kanisá na bilumbu yina ke kwiza, mpe ba zaba ve kana ba ke lenda kudikisa makanda ya bawu.

•   Buku ya Luzabusu zonzá ti madya ke kuma ntalu na ntangu ya beto. “Mu kuwaka ndinga yina tubaka: ‘Kilo mosi ya faline samu na mbongo yina ba ke futá na kilumbu mosi ya kisalu, mpe bakilo tatu ya oloze samu na mbongo yina ba ke futá na kilumbu mosi ya kisalu.’”—Luzabusu 6:6.

 Samu na kuzaba dyaka mingi na “bilumbu ya nsuka” mpe mbikudulu yina ke na buku ya Luzabusu, tala video Na 1914 yinza sobaka, mpe tanga “Les cavaliers de l’Apocalyse : qui sont-ils ?”

•   ‘Bawu ke tunga bayinzo mpe ke zinga kuna, ba ke kunda bilanga ya vinu mpe ke kudya mbuma ya yawu. Bawu ke tunga ve samu muntu ya nkaka vanda kuna, ba ke kunda mpe ve samu bantu ya nkaka kudya.’—Izaya 65:21, 22.

•   ‘Mbuma ke vanda mingi tsyeleka na ntoto; ya ke fuluka na nsongi ya bamongo.’—Nkunga 72:16.

•   ‘“Samu bawu ke nyokolaka bantu yina ke talaka mpasi, samu na kudila ya mputu (to muntu yina ke ve na mbongo), munu ke telama samu na kusala dyambu,” Yehova muntu me tuba.’—Nkunga 12:5. a

 Na mwa ntangu fioti, Nzambi ke katuka bamambu nyonso yina ke salá ti ba ya nkaka vanda ve na bima yina ba ke na yawu nsatu. Yandi ke sala yawu kaka na bwala mosi ve, kasi na yinza nyonso. Na kuzaba faso yandi ke sala yawu, tanga “Yinza ke vanda kwandi ntangu nyonso na bamvwama mpe ba yina ke ve na mbongo?”

 Kasi bubu yayi, Biblia lenda sadisa nge na kuzaba yinki ya kusala ntangu bima ke kumá ntalu. Ya ke pesá beto malongi samu na kuzaba kusadila mbongo na mayela. (Bingana 23:4, 5; Longi 7:12) Na kuzaba dyaka mingi, tanga “Protégez vos moyens de subsistance” mpe “Wa’ faso ya kuzinga na mbongo ndambu?.”