Na suka-suka ya kilumbu ya 24 février 2022, basoda ya bwala ya Russie kotá na bwala ya Ukraine samu na kunwanisa bawu. Ba me sala yawu ata bangolo yina bamfumu ya yinza salá samu mvita salama ve. Wapi bamambu mvita yayi lenda nata? Mfumu ya Organisation des Nations Unies (ONU), António Guterres zonzá mambu yayi bilumbu yina me luta: “Beto lenda kanisa ata fioti ve na bampasi yina mvita yayi ke natina bantu, bima nyonso yina ya ke mwangisa mpe mutindu ya ke bebisa kizunu na babwala mingi ya Europe mpe ya yinza.”

•   Yesu Kristo zonzá ti ya ke vanda na ntangu yina ‘yinsi mosi ke nwanisa yinsi ya nkaka mpe kimfumu mosi ke nwanisa kimfumu ya nkaka.’ (Matayi 24:7) Tanga “Yinki ke kidimbu ya ‘bilumbu ya nsuka,’ to ‘nsuka ya yinza’?” samu na kutala mutindu bamvita yina ke na salamá bubu yayi ke na lungisá mbikudulu yina Yesu zonzaka.

•   Buku ya Biblia yina ba ke bokilá Luzabusu ke na zonzilá mvita mutindu muntu yina ke natá “mpunda ya [. . .] mbwaki mutindu tiya” mpe yina ke ‘katulaka kizunu na ntoto.’ (Luzabusu 6:4) Tanga “Les cavaliers de l’Apocalyse : qui sont-ils?” samu na kutala mutindu bamvita ya bubu yayi ke na lungisá mbikudulu yayi.

•   Buku ya Danyele zonzilá kimbeni yina zolá vanda na kati-kati ya ‘mfumu ya Nord’ na ‘mfumu ya Sud.’ (Danyele 11:25-45) Tala video Kulungana ya mambu yina Biblia zonzaka—Danyele kikapu 11 samu na kuzaba samu na yinki beto lenda zonza ti Russie na babwala yina ke na manima ya yandi kele mfumu ya Nord. a

•   Buku ya Luzabusu ke zonzilá mpe “muzingu na kilumbu ya nene ya Nzambi [ya Ngolo-nyonso].” (Luzabusu 16:14, 16) Kasi na mvita yayi, ni babwala ve ke nwanisa babwala ya nkaka, mutindu beto ke na talak’ yawu bubu yayi. Tanga “Yinki kele mvita ya Armagedoni?” samu na kuzaba mingi na mambu yayi, yina ke salama na bilumbu yina ke kwiza.

•   Biblia ke zonzá ti Nzambi ke ‘sukisa bamvita na ntoto ya muvimba.’ (Nkunga 46:9) Tanga “Kivuvu ya tsyeleka samu na bilumbu ya mbote na mantwala” samu na kuzaba mingi na bamambu yina Nzambi zonzá ti yandi ke sala na bilumbu yina ke kwiza.

•   Yesu longá na bilandi ya yandi na kusambila samu Kimfumu ya Nzambi kwiza. (Matayi 6:9, 10) Kimfumu yayi ke Kimfumu yina ke na zulu mpe yina ke lungisa luzolo ya Nzambi samu na ntoto. Mpe kizunu na ntoto nyonso ke na kati ya bamambu yina Nzambi zola kulungisa. Samu na kuzaba bambote yina Kimfumu ya Nzambi lenda natina nge, tala video Kimfumu ya Nzambi ke yinki?

 Ya ke na Bambangi ya Yehova kuluta 129 000 na Ukraine. Mutindu Bambangi ya Yehova nyonso na yinza, ba ke kotá ve na bamambu ya politike mpe ba ke mangá kunwana bamvita. (Yoane 18:36) Na yinza nyonso, Bambangi ya Yehova ke biká ve kuzonzila “Nsangu ya Mbote [. . .] ya Kimfumu.” Ba ke lakisá na bantu ti kaka Kimfumu yayi ke yidika bamambu ya bantu, mpe ke manisa bamvita. (Matayi 24:14) Nge lenda sonikila beto samu na kuzaba mingi na kivuvu yina Biblia ke pesaka.