Yinza ke vanda kwandi ntangu nyonso na bamvwama mpe ba yina ke ve na mbongo?
Na babwala mingi, bantu ke basiká na banzila samu na kulakisa ti ba ke na sepelá ve na yina bantu ya nkaka ke na mbongo mpe ba ya nkaka ke ve na yawu. Bamambu yayi me beba dyaka na kati ya kimbevo ya COVID-19. Kimbevo yayi me sala ti bantu vanda kaka na bayinzo, madya ke mpasi na kuzwa, mpe bantu mingi ke ve na mbongo na kukipe nzutu ya bawu ntangu ba ke na belaka. Nyonso yayi me sala ti bantu me kuma na nkele ya kulutila na kutala ti bantu ya nkaka ke na mbongo mingi, kasi ba ya nkaka ke na ata mbongo.
Ya ke kwandi na kilumbu yina bamambu ya mbongo ke manisa? Ee. Biblia ke lakisá ti Nzambi ke manisa bampasi ya beto.
Bamambu yina Nzambi ke yidika
Mambu: Bantu me lenda ve kusala bamambu samu bantu nyonso vanda na bima yina ba ke na yawu nsatu.
Yina Nzambi ke sala: Nzambi ke katula bimfumu nyonso ya bantu, mpe na kisika ya yawu yandi ke tula Kimfumu ya yandi. Kimfumu yango ke na mazulu mpe ya ke yala na ntoto nyonso.—Danyele 2:44; Matayi 6:10.
Bambote: Samu Kimfumu ya Nzambi ke yala na ntoto ya muvimba, bamambu nyonso ke tambula na mutindu ya kulunga. Bantu nyonso ke vanda na bima ya kulunga samu kuzinga, mpe ba ke vanda dyaka ve na boma samu na mbasi. (Nkunga 9:7-9, 18) Ba ke zwa bambuma ya kisalu ya bawu, mpe ba ke vanda na luzingu ya kitoko na makanda ya bawu. Biblia ke zonzaka: ‘Ba ke tunga bayinzo mpe ke zinga kuna, ba ke kunda bilanga ya vinu mpe ke kudya mbuma ya yawu. Ba ke tunga ve samu muntu ya nkaka vanda kuna, ba ke kunda mpe ve samu bantu ya nkaka kudya.’—Izaya 65:21, 22.
Mambu: Bantu ke ve na ngolo ya kukanga nzila na bamambu yina ke natá bampasi mpe ke salá ti bantu zimbisa bima ya bawu.
Yina Nzambi ke sala: Na nzila ya Kimfumu ya yandi, Nzambi ke katula bamambu nyonso yina ke pesá bantu boma.
Bambote: Ntangu Nzambi ke baka bamambu na maboko ya yandi, bantu ke kutana dyaka ve na bamambu yina ke salá ti ba zimbisa bima yina bawu to makanda ya bawu ke na yawu nsatu. Na kifwani, bamvita, bansatu, mpe bimbevo yina ke mwanganá na yinza nyonso ke vanda dyaka ve. (Nkunga 46:9; 72:16; Izaya 33:24) Nzambi zonzaka: ‘Bantu ya munu ke zinga na kisika ya ngemba, na bisika ya kuzinga ya lukengolo mpe na bisika ya kupema yina ke swi.’—Izaya 32:18.
Mambu: Bantu ke sadilá bampangi samu na kilengi ya bawu mosi mpe samu na kuzwa ya kulutila.
Yina Nzambi ke sala: Bantu yina Kimfumu ya Nzambi ke yala ke longoka na kuzola bampangi kulutila bawu mosi.—Matayi 22:37-39.
Bambote: Ntangu Kimfumu ya Nzambi ke yala, bantu nyonso ke landa kifwani ya Nzambi mpe ke lakisa luzolo yina ‘ke sosaka ve bambote ya yawu mosi.’ (1 Bakorinto 13:4, 5) Biblia ke zonzaka: ‘Ba ke sala ata yimbi mosi ve mpe ke bebisa ata kima mosi ve na mongo ya munu nyonso ya santu, samu ya tsyeleka ntoto ke fuluka na nzayilu ya Yehova a mutindu bamaza ke fulusaka nzadi ya mungwa.’—Izaya 11:9.
Biblia ke lakisá ti beto ke na zingá na bilumbu ya nsuka ya yinza yayi, mpe ti na mwa ntangu fioti Nzambi ke lungisa nsilulu yina yandi pesá ya kusala ti bantu nyonso vanda na bima ya kulunga na luzingu. b (Nkunga 12:5) Tekila ntangu yina kuma, misiku ya Biblia lenda sadisa nge bubu yayi samu na bamambu ya mbongo. Na kifwani, tanga “Comment vivre avec moins” mpe “L’argent et vous.”
a Yehova ke nkumbu ya Nzambi na Biblia.—Nkunga 83:18.
b Na kuzaba samu na yinki nge lenda vanda na kiminu na Biblia, tanga “La Bible : une source de vérités fiable.”
