Ya me sala bamvula kuluta 130 yina Bambangi ya Yehova ke vukanaka konso mvula samu na balukutakanu ya nene. Bubu yayi, na balukutakanu yango, beto ke landaka ba discours kuluta 40 ya mitindu na mitindu, banzimbu, masolo, mpe bavideo. Kima ke salaka ti bantu sepela mpe kuzwa bambote ya yawu, ya ke ni samu ‘ba ke kuwaka mpe ke talaka’ yawu mbote-mbote. (Luke 2:20) Wapi mutindu ba ke na sadilaka makabu ya beno samu ti kisika ni kisika yina beno kele, beno sepela na balukutakanu yayi?

 Ba stades mingi mpe bisika ya nkaka yina beto ke sadilaka samu na kulutisa balukutakanu ya beto ya nene, ke na basono ya bawu mosi. Kasi samu na yinki beto ke sadilaka bima ya beto mosi samu na kulutisa balukutakanu ya beto ya nene? David, yina ke salaka na Biro ya télédiffusion me zonza: “Na bisika yina beto ke futilaka samu na kusala balukutakanu, ba ke vandaka ve na bima yina beto ke vandaka na yawu nsatu samu na kulanda na faso ya mbote, na bangunga kuluta 6, lukutakanu yina ke na ba discours mingi. Na kifwani, na ba stades, sono yina ba ke sadilaka ke samu na kupesa kaka mwa bansangu mpe na kulutisa kaka banzimbu ya nkufi. Na ba écrans ya bawu, ba ke pesaka kaka ba scores, mpe mwa bizizi ya bansaka yina ke na lutaka. Kasi bima ya bawu yayi, lenda simba ve na beto samu, beto ke vandaka na nsatu ya sono yina lenda sadisa beto na kulanda bavideo ya yinda, kuwa mpe kubakula mbote-mbote bamambu nyonso yina ba ke zonzaka na zulu ya estrade.”

 Bisika nyonso yina beto ke futilaka samu na kulutisa balukutakanu ya nene ke ve faso mosi. Na yawu, ba lenda sadila ve sono ya mutindu mosi na konso kisika. Ntangu ba ke soolaka bisika yina beto ke lutisa balukutakamu ya nene, bampangi yina ke kipeke Tele JW na bafiliale ke zonzilaka na kisika yina bantu ke vanda, na kutalaka lutangu ya bantu yina lenda kwiza, mpe lutangu ya bakiti yina kisika yango lenda kota. Na manima, bampangi ke talaka kisika yina ba lenda tula ba haut-parleurs, ba écrans mpe ba ke talaka wapi mutindu ba lenda vukisa basinga mpe bima nyonso yina ba ke na yawu nsatu samu bantu nyonso tala mpe ba kuwa mbote-mbote bamambu yina ke lutaka na lukutakanu.

 Ya ke kumaka mpasi samu na bampangi yina ke salaka na sono ntangu lukutakanu ke lutaka na bandinga mingi. Kana ya ke vanda na bampangi yina ke bangula na ndinga ya nkaka, ba ke vanda na nsatu ba kuwa mpe ba tala yina ke na lutaka mpe na manima, bamambu yina ba ke na zonzaka ke luta na haut-parleur ya nkaka, samu na bantu yina ke kuwaka ndinga yina. Mutindu ya basono yayi, lenda sala ti bavideo luta na mbala mosi samu na bantu nyonso ata na bandinga 8. David me zonza: “Ya ke ve pete na kusala yawu, mpe ya ke lombaka ti ba lakisa mbote-mbote kisalu na bampangi yina ke salaka kisalu yina.”

 Bafiliale mingi ke na bima ya bawu ya sono yina ba ke sadilaka konso mvula. Na yawu, bampangi ke kutikaka mbote-mbote bima ya sono kana lukutakanu me manisa samu ya sadisa dyaka bawu na lukutakanu ya nkaka. Na filiale ya États-Unis, kaka samu na kunata bima ya sono na kisika yina ba ke lutisa lukutakanu mpe kuvutula yawu, filiale ke basisaka mbongo kuluta 122 millions ya ba francs cefa (FCFA) konso mvula. Mutindu ya kusadila yayi ke salaka ti beto basisa ve mbongo mingi samu na kusumba mpe kukutika sono ya nkaka. Steven, yina ke sadisaka na kisalu ya sono ya bwala ya Canada me zonza: “Munu na bampangi yina ke salaka na munu salaka ti bima nyonso yina beto vandaka na yawu nsatu na sono, ata bima ya fioti-fioti, vanda ya kukutama samu ya vanda pete na beto na kusadila dyaka yawu na lukutakanu ya nkaka.”

 Kufutila bima ya sono ke lombaka mbongo mingi, mpe ya ke mpasi na kuzwa sono ya mbote. Ni na yawu beto ke sumbaka mingi bima ya beto mosi. Écran mosi ya nene yina ke na bunene ya bametre 3 mpe yinda ya bametre 5 ke mbongo kuluta 14 millions ya ba francs cefa (FCFA) mpe, singa mosi ya micro ya bametre 15 ke 12.250 francs cefa (FCFA). Biro ya télédifusion mpe ya yina ke tadilaka mambu ya kusumba bima, ke salaka kintwandi “samu na kutala mbongo yina ya ke lomba” tekila ba sumba kima ni kima yina ba ke na yawu nsatu samu na sono. (Luke 14:28) Na kifwani, bima yayi ke sadisa bantu yikwa? Beto ke kwandi na nsatu ya kusumba bima ya nkaka ya sono? Beto ke kwandi na kisika yina me lunga samu na kubumba yawu, to bampangi yina me zaba mbote-mbote mutindu ya kukutika yawu?

 Samu ti bima ya sono beba ve na mbangu, mpe beto basisa ve mbongo mingi, beto ke yidikaka yawu ntangu nyonso. Beto ke nataka yawu na ba caisses ya nene samu ya beba ve mpe ke yidikaka ba caisses yango kana ya me beba.

 Ba yina ke ve Bambangi ya Yehova ke sepelaka mingi na basono yina beto ke sadilaka na balukutakanu ya beto ya nene. Na kifwani, muntu mosi yina ke salaka na kompani mosi ya tele yina ke ya kuzabana, kwizaka sepela na mutindu ya basono ya beto. Jonathan yina ke sadisaka na kuyidika sono na balukutakanu ya nene me zonza: “Ya kamwisaka yandi na kutala ti bampangi yina salaka yawu, zabaka ve mingi na kisalu yayi. Yandi zonzaka ti samu na kusala kisalu yina beto me sala na kilumbu mosi na ndambu, ya zola baka bawu bilumbu 5.” Na lukutakanu ya nkaka, muntu yina ke twadisaka kisika yina beto lutisaka lukutakanu zonzaka: “Bantu mingi yina me zaba mbote-mbote kisalu ya sono me lutaka awa. Kasi, nabunu mu tala mutindu ya kitoko ya kusala yayi!”

 Wapi bambote beno ke na zwaka samu na basono yina ba ke na sadilaka na lukutakanu ya nene? Ntangu ya nkaka nge ke na kanisaka mutindu David, yina ke vandaka na Angleterre. Yandi me zonza: “Mu ke na bamvula 88, mpe luzingu ya munu nyonso mu me vandaka na balukutakanu ya nene. Kasi bubu yayi, ya me kuma pete samu na munu na kubakula mbote-mbote bamambu nyonso yina mu ke na talaka mpe ke na waka. Bavideo ke na sadisaka beto na kulanda mbote-mbote lukutakanu mpe na kubakula mbote-mbote mpe na faso ya kulutila mambu yina beto ke na kuwaka.” Micheal, yina ke vandaka na Nigéria me zonza: “Samu ti bampangi ke na kuwaka mbote-mbote ba discours mpe ke na kutalaka mbote bavideo, ya ke na salaka ti ba landa na faso ya mbote lukutakanu mpe ke na kusepelaka na yawu.”

 Na ntangu nge ke na lutisaka lukutakanu ya nene mpe ya spécial ya mvula yayi “Samuna nsangu ya mbote,” baka ntangu samu na kukanisa na yina me sala ti nge kuwa mpe tala mbote-mbote. Beto ke na tondaka beno na makabu yina beno ke na pesaka, ya vanda mpe yina beno ke na salaka na nzila ya donate.pr418.com, yina ke na salaka ti kisalu nyonso yayi salama. Matondo.