Bambangi ya Yehova ke zolá mingi bampangi ya bawu ya kento na ya bakala. (1 Piere 2:17) Mingi na kati ya beto ke kabulá dikanisi ya Tannis, mpangi mosi ya kento yina ke vandá na Kenya. Yandi me zonza: “Mu ke zolá kuzaba bamambu yina ke kuminá bampangi ya munu ya yinza nyonso.” Wapi mutindu Tannis na ba-million ya nkaka ya Bambangi ya Yehova ke kuzwá bansangu ya bampangi ya bawu? Kubanda 2013, beto lenda kuzwa yawu na site internet ya beto jw.org na kisika yina ba ke bokilá Bansangu ya malu-malu.

 Bansangu ya malu-malu ke zonzilá bamambu yina Bambangi ya Yehova ke salá, mutindu kubasika Biblia na bandinga ya malu-malu, kusadisa ba yina ke kutaná na bampasi, kutunga bayinzo, mpe bamambu ya nkaka ya mfunu. Ya ke pesá beto bansangu ya bampangi ya kento na ya bakala yina ke na boloko samu na kiminu ya bawu. Ya ke zonzilá bamambu ya kitoko yina kuzwá bampangi na manima ya kukwenda samuna na bisika ya nkaka. Mpe ya ke zonzilá bansangu na yina me tadila kilumbu ya kubambukila moyo lufwa ya Yesu. Nani ke sosá bamambu yina ke vanda na kati ya bansangu, mpe wapi mutindu ba ke bongisak’ yawu?

 Na siège mondial ya Bambangi ya Yehova, ya ke na département mosi yina ba ke bokilá Service des relations publiques (SRP). Ni bawu ke kipeke Bansangu ya malu-malu. Ni Comité des coordinateurs ya Kimvuka ya Bantwadisi yina ke twadisá kisalu ya SRP. Bampangi ya kento na ya bakala kuluta 100 ke salá samu na SRP. Mingi na kati ya bawu ke vandá na babwala ya nkaka. Ba ke salá kisalu ya kusonika, ya kusosa, ya kubangula (traduction), mpe ya kusala bafoto na bavideo. Ba ya nkaka ke na kisalu ya kusolola na bantu ya guvernema, bantu ya ba-université, mpe bantu ya radio mpe ya tele. SRP ke salá kintwadi na ba BRP (Bureau des relations publiques) kuluta 80 yina ke vandá na bafiliale ya babwala ya nkaka.

 Samu na kubongisa mambu yina ba ke tula na Bansangu ya malu-malu, SRP ke salá kintwadi na ba BRP. Ntangu ba ke zabá disolo yina ba ke zonzila, ba ke sosá mbote-mbote faso bamambu me lutila. Na kusala yawu, ba ke sololá na bantu yina zaba mambu yango mbote-mbote, mpe ba ke yufula bawu byuvu. Na manima ya kuzaba faso mambu lutá, ba ke sonika yawu, ba ke bongisa yawu, ba ke tanga yawu samu na kuzaba bamambu ya nkaka ya kubongisa, mpe ba ke tula bafoto yina ke kwelaná na disolo yina. Mpe ba ke filisa yawu na Comité des coordinateurs samu ba ndima ba tula yawu na Bansangu ya malu-malu.

 Wa’ faso bampangi ya beto ke tadilá Bansangu ya malu-malu? Cheryl, mpangi mosi ya kento yina ke vandá na bwala ya Philippines me zonza: “Mu ke zolá kubanda kilumbu ya munu na kutanga bansangu ya kimvuka ya Yehova mpe ya bisadi ya yandi.”

 Bantu mingi ke zonzá ti bansangu yina ba ke kuzwá na jw.org ke ve faso mosi na bansangu yina ba ke kuzwá na bisika ya nkaka. Tatiana yina ke vandá na Kazakhstan me zonza: “Mu ke sepelá na yina mu lenda tula ntima na bansangu yina ke basiká na jw.org. Ya ke vuná ve, mpe ya ke zonzá bamambu mutindu ya me salama.” Alma mpangi mosi ya kento yina ke vandá na Mexique me zonza: “Na bisika ya nkaka, beto ke kuzwá bansangu yina ke lembisaka. Kasi, na Bansangu ya malu-malu na jw.org, beto ke kuzwá bansangu yina ke pesá ngolo.”

 Bamambu yina ke na Bansangu ya malu-malu ke ve kaka bamambu ya tsyeleka. Ya ke mpe bamambu yina ke kindisá kiminu ya beto. Bernard yina ke vandá na Kenya me zonza: “Bansangu ya malu-malu me sadisa munu na kutala ti, kisika ni kisaka ba kele, bampangi ya kento na ya bakala ya yinza nyonso kele dikanda ya munu. Na balusambu ya munu, mu lenda zonzila bankumbu ya bawu, mpe bamambu yina ba ke kutaná na yawu.” Bybron, mpangi mosi ya kento yina ke vandá mpe na Kenya me zonza: “Mu ke fuluká na kilengi ntangu nyonso mu ke tangá masolo yina ke zonzá ti ba me basisa Biblia na ndinga ya malu-malu. Masolo yina, ke lakisá munu ti Nzambi ke talá bantu nyonso mutindu mosi.”

 Ata masolo ya bampangi yina ba ke na kwamisá lenda pesa beto ngolo. Jackline yina ke vandá na Kenya me zonza: “Ntangu mu ke kanisá na bukindi ya bawu, ya ke kumisá kiminu ya munu ngolo. Ntangu nyonso, mu ke sosá kutala yinki ke na sadisá bawu na kukanga ntima. Mu me longoka ti, ata bima yina beto lenda tala ti ya ke fioti, mutindu kusambila, kutanga Biblia mpe kuyimba ke mfunu samu bampangi ya beto bumba kiminu ya bawu ngolo.”

 Beatriz mpangi mosi ya kento yina ke vandá na Costa Rica ke sepelá na kuzwa bansangu yina ke tadilá mipepe ya ngolo, kuningana ya ntoto mpe bamambu ya nkaka ya mutindu yina. Yandi me zonza: “Bansangu ya malu-malu ke sadisá munu na kutala mutindu kimvuka ya Yehova ke kipeke bansatu ya bampangi ya beto na mbangu, na faso ya mbote mpe na luzolo nyonso. Ya ke sadisá munu na kundima ti yayi ke dibuundu ya Yehova.”

 Beto ke sepelá mingi na kuzwa ntangu nyonso bansangu ya malu-malu ya bampangi ya beto na yinza nyonso. Ni makabu yina beno ke pesá samu na kisalu ya Kimfumu na yinza nyonso, ke salá ti beto lenda kuzwa yawu. Mingi ya makabu yina, beto ke kuzwak’ yawu na nzila ya donate.pr418.com. Matondo mingi na makabu yina beno ke pesá na ntima mosi.