Dikanisi ya Yehova ke ti bantu nyonso zaba yandi mpe kuwa nsangu ya Kimfumu ya yandi ya mazulu. (1 Timote 2:3, 4) Ni na yawu Bambangi ya Yehova ke basisá babiblia mpe bima ya nkaka samu bantu nyonso longoka Biblia, ata mpe mababa. Banda ntama, dibuundu ya beto me basisa bavideo mingi, a na bandinga ya mababa kuluta 100. Wa’ faso beto ke basisá mpe ke salá ti bantu kuzwa bavideo yayi? Mpe yinki beto me bongisa na kati ya bamvula?

 Bimvuka ya bantu ke bangulá bavideo na bandinga ya mababa bisika mingi na ntoto. Mosi na mosi ya bimvuka yayi ke kanisá mbote-mbote na mambu yina ba ke bangula. Na manima, ba ke talá faso ya mbote ya kuzonzila yawu na ndinga ya mababa. Na nsuka, ba ke salá video ya mambu yina ba me bangula. Bubu yayi, bimvuka 60 ke salá ntangu nyonso samu na kubangula bima na bandinga ya mababa. Mpe bimvuka 40 ya nkaka ke salá ntangu ba ke pesá bawu kisalu.

 Na ntama, ya vandá ntalu mingi na kubasisa bavideo samu na mababa. Na ntangu yina, bima yina ke sadisá samu na kusala bavideo mutindu ba caméra vandá ntalu mingi. Mpe beto vandá salá bavideo na bayinzo yina beto mosi tungá, to bongisá. Ya vandá lombá lutangu ya 30 000 b dollars (mbongo kuluta 19 millions ya Franc CFA) samu kimvuka mosi ya bampangi yina vandá bangulá bavideo ya mababa kuzwa bima ya kulunga samu na kusala.

 Samu na kusadila mbote-mbote makabu, dibuundu ya beto me sosa bafaso ya kubongisa kisalu ya kubangula. Na yawu, beto me sumba bima yina ba ke na sadilá bubu yayi samu na kusala bavideo, mpe yina ke ve ntalu mingi. Bampangi ke na salá dyaka ve bavideo na studio. Kasi ba lenda tula lele ya vert kisika yina ba ke salá samu na kusala bavideo. Ntangu ba ke salá video yina ke lombá bantu mingi, ba ya nkaka ke salak’ yawu na biro to na yinzo ya bawu. Kusala mutindu yina ke salá ti ba ke dyaka ve na nsatu ya kukwenda na studio.

 Beto me sala mpe ba programmes yina ke tambulá kintwadi na ba ordinateurs samu na kusadisa bampangi yina ke lutá na video. Kusala mutindu yayi me sala ti bampangi yina ke basisá bavideo samu na mababa ke dyaka ve na lutisá ntangu mingi na kubasisa yawu. Mambu ya kilengi samu na bampangi ya mababa. Alexander, mpangi mosi ya bakala me zonza: “Beto ke na kuzwá bavideo mingi na ndinga ya mababa. Ya ke salá munu kilengi mingi. Mu ke talak’ yawu bilumbu nyonso.”

 Bubu yayi, samu na kusumba bima nyonso yina kimvuka mosi ya bampangi yina ke salá bavideo ke na yawu nsatu, mbongo yina beto ke basisá ke kumá ve na lutangu ya 5 000 dollars (pene-pene na 3,2 millions ya Franc FCA). Ya ke na salá ti beto ke na basisá bavideo mingi na bandinga ya mababa.

 Ntangu ba ke manisá kusala video na ndinga ya mababa, ba ke filisá yawu na bantu yina ke na yawu nsatu. Na ntama, beto vandá salá ba vidéocassettes na ba CD. Kasi ya vandá lombá bangolo mingi, ntangu mingi, mpe mbongo mingi. Beto vandá filisá ba vidéocassettes mpe ba CD na bakompani ya nkaka samu na kubasisa yawu mingi. Na manima, beto vandá filisá yawu na bimvuka. Kaka na 2013, beto basisá lutangu ya 2 millions ya ba dollars (mbongo kuluta 1.2 milliards ya Franc CFA) samu na kubasisa ba CD samu na mababa.

 Mababa vandá zolá mingi bima yayi. Kasi ya vandá ve pete na kusadila bima yayi, mingi-mingi ntangu ya bandá kukuma mingi. Ntangu ya nkaka, ya vandá lombá ba CD mingi samu na kuvanda kaka na dibuku mosi ya Biblia. Gilnei mpangi mosi ya bakala yina ke vandá na Brésil me zonza: “Ntangu beto vandá sosá kutanga verse mosi, beto zola sosa ntete CD yina vandá na yawu mpe na manima kusosa verse yango. Ya vandá mpasi.” Mpangi mosi ya kento na nkumbu ya Rafayane vanda sadilá ba CD. Yandi me zonza: “Kulongoka Biblia munu mosi vandá mpasi mpe ya vandá lembisá munu. Kaka na kusosa baverse to bima ya nkaka samu na kulongoka, beto vandá lutisá ntangu mingi.” Mpe na kisalu ya kusamuna, bampangi ya kento na ya bakala vandá natá ba vidéocassettes na ba CD samu na kulakisa yawu na télé ya muntu yina ke longoka na bawu. Bampangi ya nkaka vandá natá ba DVD ya bawu. Kasi ntangu ba ordinateurs ya fioti basiká, bampangi sumbak’ yawu na mbangu. Bobby, yina ke vandá na États Unis me zonza: “Ntangu beto vandá tangilá muntu verse mpe beto vandá na nsatu ya kutangila yandi verse ya nkaka, beto zolá tula dyaka CD ya nkaka. Ya vandá baká ntangu mingi. Na yawu, beto vandá tangilá ve mingi Biblia na masolo yina beto vandá sala na bantu.”

 Na 2013, beto yidiká application JW Library Sign Language (JW Library na bandinga ya mababa). Ya ke sadisá bampangi ya kento na ya bakala na kubaka mpe na kutala bavideo na bandinga ya mababa na téléphone to na tablette. Na kubanda, application yayi vandá simbá kaka na ndinga ya mababa ya Amérique. Kasi na 2017, ba yidikak’ yawu samu ya simba na bandinga nyonso ya mababa. Ya salá kilengi mingi na bampangi ya yinza nyonso. Juscelino, mpangi mosi ya bakala yina ke na Brésil me zonza: “Mu vandá ndima ve! Mu vandá zonza na munu mosi ntangu nyonso ti Kimvuka ya Bantwadisi zola beto, mpe ba zola ti beto mpe kula na kimpeve mutindu bampangi yina ke zonzaka. Kilengi ya munu vandá mingi. Application yayi me pesa munu nsatu ya kulongoka dyaka mingi Biblia.”

 Bubu yayi, beto ke basisá bavideo nyonso samu na mababa na site ya beto mpe na application JW Library samu na mababa. Na yawu, ya ke baká dyaka ve beto bangonda to bamvula, samu na kubangula, kubasisa mpe kukabula bavideo na ndinga ya mababa. Beto ke salak’ yawu kaka na mwa bilumbu. Bavideo mingi ya bandinga ya mababa ke basiká mbala mosi na mikanda ya ba yina ke kuwaka.

 Beto tala mambu yina me zonza bampangi ya nkaka ya mababa. Klízia mpangi mosi ya kento me zonza: “Ya ke ve na kimvuka na yinza nyonso yina ke zolá mababa mutindu kimvuka ya Yehova. Ba ke salá nyonso samu ya vanda ve mpasi na bawu na kuzwa madya ya kimpeve. Ya ve na kima me lutila nyonso yina kimvuka ya Yehova ke salá samu na beto.” Vladimir me bwela: “Bavideo yayi ke lakisá munu ti Yehova ke zolá mababa mutindu yandi ke zolá bantu yina ke kuwaka.”

 Bantangu ya nkaka, bavideo ya beto na bandinga ya mababa ke zonzá mambu yayi: “Mukanda yayi ke ve ya kutekisa. Ya ke samu na kulonga bantu Biblia na yinza nyonso. Mbongo ya kubasisa yawu me katuka na makabu yina bantu ke pesá na luzolo ya bawu mosi.” Beto ke na vutulá beno matondo mingi na makabu yina beno ke pesaka, mingi na donate.pr418.com. Mbongo yayi ke sadisá beto na kubasisa babiblia mingi mpe bima yina ke sadisá na kulongoka Biblia samu na bantu nyonso, mababa mpe na kati.