Na rapport numero 6 ya Kimvuka ya Bantwadisi ya 2020, mpangi Geoffrey Jackson zonzaka: “Kaka bamvula yayi me luta, beto vandá kanisa ve ti beto lenda kuzwa madya ya kimpeve na nzila ya ba-téléphone to ya ba-tablette.” Ntangu ya nkaka nge mpe vandá kanisa ti ya lenda salama ve. Mpangi Jackson bwelaka: “Ntangu ya nkaka bubu yayi beto ke na yufulá: ‘Kana beto vandá ve na bima mutindu JW Library, wa’ faso beto zolá sala na kimbevo yayi ya COVID-19?’ Ntembe ve Yehova me sadisá beto na kati ya bamvula na kuyidama samu na bantangu ya bampasi ya mutindu yayi.”

 Wa’ faso Yehova sadisá beto na kuyidama? Wapi kisalu ya me lomba na kuyidika application JW Library? Mpe yinki ya ke lombá na kubongisa yawu mpe na kusala ti ya simba ntangu nyonso?

 Na ngonda ya mai 2013, Kimvuka ya Bantwadisi lombá na département mosi ya siège mondial na nkumbu ya programmation MEPS, na kuyidika application mosi. Na kati ya application yango ba zolá tula Biblia Traduction du monde nouveau ya malu-malu ya anglais. Paul Willies yina ke salá na département yina me zonza: “Na ntangu yina, beto vandá na ata application na kisika yina ba ke kuzwá ba-application na téléphone. Beto vukisá mwa bantu, beto biká bisalu ya nkaka mpe beto salá kintwadi na ba-département ya nkaka samu na kukanisa na faso application ke vanda, kuyidika yawu mpe kuyidika bima yina ke vanda na kati. Beto sambilá bambala mingi Yehova samu na yawu. Mpe kaka na manima ya bangonda 5, application JW Library basiká na réunion annuelle!”

 Kima ya nkaka yina vandá mpasi ni ya kusala ti application yayi vanda na mikanda mingi, na bandinga mingi. Na janvier 2015, mingi ya mikanda ya beto na anglais vandá na kati ya application. Mpe kaka bangonda 6 na manima, bantu lendá kuzwa mikanda yina na bandinga mingi.

 Kubanda ntangu yina, bampangi ya beto me sala kisalu ya ngolo samu na kubongisa application JW library. Ba me bwela bavideo. Ba me vukisa mikanda, babuku na bavideo yina ke luta na balukutakanu kisika mosi. Dyaka, ba me sala ti ntangu nge ke nyema na zulu ya verse ya Biblia, ya nata nge na Guide de recherche samu na kuzaba mingi na verse yina.

 Bilumbu nyonso, bantu ke fungulá application JW Library na ba-appareil 8 million. Bangonda nyonso ba ke fungulá yawu na ba-appareil 15 million. Yinki ya ke lombá samu application yayi tambula na faso ya mbote na ba-appareil yina? Mpangi Willies me zonza: “Kisalu ke suká ve kaka na kuyidika application. Samu ya sadisa bantu mpe ya vanda ve mpasi na kusadila yawu, beto me bonga kubongisa yawu ntangu nyonso. Ba-kompani yina ke basisá ba-appareil ke bongisá ntangu nyonso bima yina ke salá ti ya simba (mises à jour). Ni na yina, beto mpe ke kubongisá ntangu nyonso application JW Library samu ya simba na ba-appareil. Dyaka, beto ke na nsatu ya kubongisa yawu ntangu nyonso samu mikanda, bavideo mpe ba-audio ke na kumá kaka mingi. Bubu yayi si beto tanga lutangu ya mikanda ya bandinga nyonso yina ke na JW Library, ya ke sala 200 000. Mpe bavideo na ba-audio na bandinga nyonso me luta 600 000.

 Samu na kusala kisalu nyonso yayi, beto ke ve kaka na nsatu ya ba-ordinateur. Beto ke mpe na nsatu ya kufuta mbongo samu beto kuzwa nzila ya kusadila ba-programme yina ke tambulá kintwadi na ba-ordinateur. Samu na kuzwa nzila ya kusadila kaka programme mosi, beto ke futá 1 500 dollars (pene-pene na 876 000 F CFA) na mvula mosi. Dyaka, samu na kuzaba si JW library ke simba na ba-ordinateur, ba-tablette, mpe ba-téléphone yina me basika malu-malu, département ya programmation MEPS ke basisá bamvula nyonso 10 000 dollar (pene-pene na 5 800 000 F CFA) samu na kusumba yawu.

 JW Library me sala ti beto basisa dyaka ve mbongo mingi na kubasisa mikanda na papier mpe na kufilisa yawu. Na kifwani, na mvula 2013 beto vandá basisá mukanda Examinons les écritures chaque jour na papier na lutangu ya 12 millions. Kasi, na mvula 2020 beto basisá kaka 5 millions ya mikanda Examinons les écritures chaque jour na papier, ata ti lutangu ya Bambangi ya Yehova ya 2020 me luta na 700 000 lutangu ya Bambangi ya Yehova ya 2013 na yinza ya muvimba. Samu na yinki bamambu me soba mutindu yina? Samu ti bampangi mingi bubu yayi, ke tangá dikanisi ya kilumbu na JW Library. a

 JW Library ke sadisá na bafaso mingi ba yina ke sadilá yawu. Geneviève yina ke vandá na Canada ke talá ti application JW Library me sadisa yandi na kulongoka bambala mingi. Yandi me zonza: “Kana ba zonzá na munu na kutula kisika mosi babuku mingi samu na kulongoka, mu zaba ti mu zolá longoka ve bilumbu nyonso. Kasi na application JW Library na tablette ya munu, mu ke na nyonso yina mu ke na yawu nsatu. Kulongoka ntangu nyonso me kumisa kiminu ya munu ngolo, mpe me kulisa kindiku ya munu na Yehova.”

 Application JW Library me sadisa beto mingi na kati ya kimbevo yayi ya COVID-19. Charlyn yina ke vandá na États-Unis me zonza: “Samu maladie ya COVID-19 me mwangana na yinza nyonso, mu me lenda ve kuzwa mikanda ya malu-malu ya papier na kati ya bangonda yayi. Kasi JW Library ke na sadisá beto na kubumba kiminu ya beto ngolo. Matondo mingi na Yehova samu na application yayi. Ya ke na lakisá luzolo ya yandi.”

 Mingi na kati ya beto ke kabulá dikanisi mosi na Faye, yina ke vandá na Philippines. Yandi me zonza: “Application yayi ke sadisá munu na kuvanda pene-pene na Yehova. Na suka, ni kima ya ntete mu ke fungulá samu na kutanga. Ntangu mu ke salá bisalu ya yinzo, mu ke kuwá ba-audio yina ke na kati. Mu ke sadilá yawu samu na kuyidama na balukutakanu, mpe kubongisa bamambu yina mu ke longa na ba yina ke longoká Biblia na munu. Mu ke talá mpe bavideo na yawu. Ntangu mu ke vingilá na mulonga samu na kusumba kima, mu ke tangá Biblia to bima ya nkaka na kati. Ya ke ntalu mingi samu na munu.”

 JW Library ke sadisá mingi na kisalu ya kusamuna. Kilumbu mosi, na kisalu ya kusamuna, mpangi mosi ya kento yina ke vandá na Cameroun vandá sosa verse mosi yina mpangi ya nkaka ya kento sadilá balumingu yina lutaka. Kasi yandi vandá zaba dyaka ve kisika yina verse yango vandaka. Yandi me zonza: “Mu vandá zaba ntete mwa bamambu yina verse yango ke zonzilaka. Mu fungulá Biblia na JW Library mpe mu kwendá kisika yina ba me sonika recherche. Mpe mu soniká bamambu yina mu zabá na verse yina. Na mbala mosi, mu kuzwá verse yango. Kusadila JW Library ke sadisá munu na kuzwa baverse mingi ntangu mu ke zabá dyaka ve kisika yina ya kele.”

 Makabu yina beno ke pesá na ntima mosi na banzila nyonso yina ke na donate.pr418.com me sadisa beto na kuyidika, kubongisa, mpe kusala ti application JW Library simba ntangu nyonso. Ya ke sadisá mingi bampangi ya beto ya kento na ya bakala na yinza ya muvimba. Matondo mingi na kifu ya beno ya kukabulaka.

1. Octobre 2013—Kubasika ya application JW Library kintwadi na Biblia Traduction du monde nouveau ya malu-malu na anglais

2. Janvier 2015—Ba me bwela mikanda ya anglais na application JW Library mpe na manima ya bandinga mingi ya nkaka

3. Novembre 2015—Beto lenda tula kidimdu na mikanda (surligner)

4. Mai 2016—Ba me vukisa kisika mosi bima yina beto ke sadilá na balukutakanu

5. Mai 2017—Beto lenda sonika ba-commentaire

6. Décembre 2017—Ba me bwela Biblia ya kulongoka (Bible d’étude)

7. Mars 2019—Beto lenda télécharger ba-audio yina ke na kati ya JW library mpe kutala na mbala mosi bavideo, mpe kutala bima yina ke na Guide de recherche

8. Janvier 2021—Ba me bwela bima yina ke sadisá na kusadila buku Sepela na luzingu ya ntangu nyonso!