Na janvier 2021, Kimvuka ya Bantwadisi zonzilá buku ya malu-mulu Sepela na luzingu ya ntangu nyonso! yina basiká samu na kulonga Biblia. a Yinki ya salá nge na ntima ntangu nge kuwá nsangu yayi? Matthew, mpangi mosi yina ke vandá na Canada me zonza: “Mu vandá na kilengi ya kulutila! Mpe kilengi vandá kuma dyaka mingi ntangu mu vandá kuwa ba discours mpe kutala bavideo yina vandá zonzila samu na yinki ba me sala buku yayi, mpe yinki ba me sala samu na kutala kana ya ke simba. Ntima vandá suka munu samu mu vandá sosa kutala yawu mpe kusadila yawu na mbangu.”

 Buku Sepela na luzingu ya ntangu nyonso! ke sadilá faso ya malu-mulu ya kulonga Biblia. Kasi kaka ni yina ve ke salá ti ya vanda ve faso mosi na babuku ya nkaka yina beto vandá sadilá samu na kulongoka Biblia na bantu. Kana nge me sadila buku Sepela na luzingu ya ntangu nyonso! ya papier, ntangu ya nkaka nge me tala ti ya ke ve faso mosi na babuku ya nkaka ntangu nge simbak’ yawu. Na kuzaba samu na yinki, beto tala mutindu ba yidikak’ yawu.

 Papier ya kilo. Samu na yinki ya vandá mfunu? Buku Sepela na luzingu ya ntangu nyonso! ke na bizizi ya couleur kuluta 600. Ya me lutila mingi na bizizi yina ke na buku Yinki biblia ke longa beto? Mpe bapaje ya yawu, ke na bisika ya nene yina ke ve na bisoni to bizizi. Kasi bima zole yayi lenda sala mwa mindondo: na papier ya pete-pete, kizizi ke talaná mwa ndambu na manima ya paje. Samu na kuyidika mambu yayi, bampangi ya Biro yina ke tadilá mambu ya kubasisa mikanda, yina ke na Wallkill, na New York, na États-Unis, meká mitindu ya ba papier 4 yina beto ke sadilá na bisika yina beto ke basisá mikanda. Comité ya rédaction, mosi ya ba comité ya Kimvuka ya Bantwadisi, talá konso papier, mpe soolá papier yina me lutila kilo. Ata ti papier yayi ke ntalu mingi kulutila ba papier yina beto ke sadilá na mikanda ya beto, ya ke sadisá balongoki ya Biblia na kutanga buku Sepela na luzingu ya ntangu nyonso! mpe kubika ve bizizi yina ke na paje ya manima sala ti makanisi ya bawu vanda ve na mambu yina ba ke na tangaka.

 Mpusu ya mutindu ya nkaka. Mpusu ya buku ya malu-malu yayi kele ve mutindu bampusu ya babuku yina beto me basisaka, samu ya kele ya kuvukana na bima mingi yina ke bumbak’ yawu. Samu beto sadilaka ve bima yina beto ke vukisá mingi na kuyidika bampusu ya babuku ya nkaka, buku yayi ke na mpusu yina ke salá ti kizizi talana mbote-mbote. Mutindu ba me sala mpusu yayi ke sala ti ya beba ve na mbangu ata ba me sadila yawu bambala mingi. Mpusu ya buku Sepela na luzingu ya ntangu nyonso! ke ntalu bambala tanu (5) kulutila bampusu yina beto me sadilaka. Na yawu bafiliale mingi salá kintwadi samu na kuzwa bima yina beto sadilá samu na buku yayi na ntalu ya kulunga.

 Samu na yinki ba soolá kusumba bima ya ntalu mutindu yayi? Mpangi mosi ya bakala yina ke salá na Biro yina ke tadilá mambu ya kubasisa mikanda na ntoto nyonso me zonza: “Beto talá ti bantu ke sadila mingi buku yayi. Na yawu beto zola ti ya vanda kaka propre ata ti muntu sadila yawu mingi.” Eduardo, yina ke salá na Biro yina ke tadilá mambu ya kubasisa mikanda, na Béthel ya Brésil me zonza: “Beto ke na kilengi mingi na kutala faso dibuundu ya Yehova me sadila bima ya mbote samu na kusala buku yayi. Ya ke kitoko, ya ke beba ve na mbangu, mpe ya ke mbote na kusimba. Kasi na kusala yawu ba sadilá mbote mbongo ya makabu.”

 Beto bandá kubasisa buku Sepela na luzingu ya ntangu nyonso! na mars 2021, na kati ya kimbevo ya COVID-19. Beto kutaná na bamambu ya mpasi. Samu ba Béthel vandá ya kukanga, beto lendá ve kuzwa lubakusu ya bampangi yina ke kwizá tula diboko, to kubokila bampangi na kwiza sala na Béthel. Na yawu, ya vandá ve na bantu mingi samu na kusala na bisika yina beto ke basisá mikanda, mpe ba Béthel ya nkaka vandá mwa ntangu ya kukangama, samu baluyalu tulá misiku ya kulanda na ntangu ya kimbevo ya COVID-19.

 Wa’ faso beto lendá kulungisa kisalu ata bamambu ya mpasi yayi? Ntangu bisika yina beto ke basisá mikanda bandá dyaka kusala, ba bokilá bampangi ya kento na ya bakala yina ke salá bisalu ya nkaka na Béthel na kwiza tula diboko na kisalu yayi. Joel mpangi mosi yina ke salá na Biro yina ke tadilá kisalu ya kubasisa mikanda na ntoto nyonso, me zonza: “Samu ti ba pesá ntima mpe lakisá luzolo ya kulongoka bisalu ya nkaka, ya salá ti beto lungisa kisalu.

 Ata bamambu ya mpasi yayi, tii bubu yayi beto me lenda kubasisa ba millions ya babuku Sepela na luzingu ya ntangu nyonso! Kusala yawu ke lombá bima mingi, bima yina ba ke basisilá mikanda (plaques d’impression), kima ya nkaka (film de pelliculage), papier, encre, mpe colle. Kaka na bangonda 5 ya ntete, lutangu ya mbongo samu na kusumba bima yayi kumá ti na 2,3 millions ya ba dollards (pene-pene na 1,5 milliards ya Franc CFA). Samu na kusadila mbongo na mayela, beto me basisa kaka babuku yina bimvuka ke na yawu nsatu.

 Bampangi yina ke longá Biblia mpe bantu yina ke longoká na bawu me kanisa yinki samu na buku yayi ya malu-malu? Paul, mpangi mosi yina ke vandá na bwala ya Australie me zonza: “Samu ti buku “Sepela na luzingu ya ntangu nyonso! ke kitoko na kusadila, mu ke vandá kaka na nsatu ya kusadila yawu samu na kulonga bantu Biblia. Ya ke kitoko na kutala mpe ya ke sadisá na kusala masolo ya mbote. Ya ke na bima mingi yina ba me vukisa na kati ya buku yango yina ke salá kitoko ya yawu: malongi yina ke pwelele, byuvu yina ke simbá ntima, bavideo, bizizi, bakarti mpe bamambu yina mulongoki lenda sosa kulungisa. Ya ke buku ya kulunga mpe ya ke pesá munu nsatu ya kubongisa faso ya munu ya kulonga.”

 Mulongoki mosi ya Biblia yina ke vandá na États-Unis me zonza: “Mu ke zolá mingi buku ya malu-malu yayi. Bizizi ke sadisá munu na kubakula makanisi ya mfunu yina ke na kati. Bavideo ke simbá ntima ya munu mpe ke pesá munu nsatu ya kusadila bamambu yina mu ke na longokaka.” Muntu yayi ke longoká bambala zole na lumingu, mpe yandi ke kwizá ntangu nyonso na balukutakanu ya kimvuka.

 Ya ke ntete na ba millions ya babuku Sepela na luzingu ya ntangu nyonso! ya kubasisa na bandinga mingi. Tii bubu yayi, Kimvuka ya Bantwadisi me pesa nzila ya kubasisa buku yayi na bandinga 710. Ya me luta buku Yinki Biblia ke longa beto? na bandinga 340.

 Wapi kisika beto ke kuzwá mbongo ya kubasisa buku yayi? Mbongo yayi ke katuká na makabu yina bantu ke salá na ntima mosi na yinza nyonso. Mingi ya makabu yayi ke salamá na donate.pr418.com. Matondo mingi na makabu yina beno ke salá na ntima ya mbote, mpe yina ke na sadisá na kubasisa babuku samu na bantu yina ke na nsatu ya kuzaba Yehova mpe kuzwa ‘luzingu ya ntangu nyonso.’—Nkunga 22:26.