Na Mars 2020, ntangu OMS (organisation yina ke talá mambu ya mavimpi na ntoto nyonso) zonzilá kimbevo ya COVID-19, mingi vandá kanisá ve ti maladie yayi zolá mwangana na ntoto ya muvimba na manima ya mvula kaka mosi. Bantu mingi, ata mpe bisadi ya Yehova me kutana na bampasi yina kibemvo yayi me nata: Ba me kuzwa maladie yayi, ba me vanda dyaka ve na mbongo mpe ba me fwidila bantu ya makanda ya bawu. Wapi mutindu Bambangi ya Yehova yidiká bamambu samu na kusadisa bampangi ya bawu?

 Comité des Coordinateurs ya Kimvuka ya Bantwadisi ya Bambangi ya Yehova, pesá nzila samu ba tula ba comité de secours kuluta 950 na yinza nyonso, samu na kubakisa bampangi na mantwala ya maladie ya COVID-19. Na babwala mingi, ba salá nyonso samu na kubakisa bampangi na bima yina ba vandá na yawu nsatu. Mpe na bisika ya nkaka, Bambangi ya Yehova kuzwá lubakusu ya luyalu. Ba comité de secours salá bangolo mingi samu na kusadisa bampangi.

 Beto tala mambu yina salamá na bwala ya Paraguay. Journal mosi zonzá ti samu mbongo ke dyaka ve na tambulá na bwala na kati ya kimbevo yayi, “bantu mingi ya Paraguay ke na fwá nsatu na kati ya bayinzo ya bawu.” Kasi na ntangu yina, comité de secours bandá deza kukabula madya, bima ya kusadila samu na kuvanda na mamvipi ya mbote, mpe manganga. Na bima yina, ba yidiká ba-paquet. Paquet mosi vandá sadisa bantu 4 na kudya na kati ya balumingu zole. Comité de secours basisá 30 dollar (pene-pene na 17 000 F CFA) samu na paquet mosi.

 Wa’ faso bampangi yina vandá kabula bima vandá bumba nzutu ya bawu mpe ya bampangi na mantwala ya COVID-19? Ba vandá lwata masque mpe kuzitisa distanciation physique. Ba vandá tala mbote-mbote si bakompani yina vandá tekisa bawu madya vandá yidika yawu na bisika yina ke ve na mvindu, mpe vandá sala nyonso samu bantu bumba banzutu ya bawu. Ya zola zonza kulwata bilele ya kubumba nzutu, kusala bunkete, kusukula bakaminion ya bawu, mpe kutula ba-paquet na bisika yina ke ve na mvindu. Mpe, bantu nyonso yina vandá kabula bima vandá zitisa distanciation physique na bampangi yina vandá kuzwa yawu.

 Na Janvier 2021, Comité des coordinateurs pesá nzila samu ba sadila mbongo na ntalu ya 25 millions de dollar (pene-pene na 14 milliards Francs CFA) samu na kubakisa bampangi na COVID-19. Bafiliale na ba comité de secours sadilá mbongo yina na mayela nyonso, mpe ba salá ngolo samu na kusumba bima yina bampangi vandá na yawu nsatu na ntalu ya fioti. Na kifwani, na Chili, bampangi ya comité de secours vandá sosa kusumba 750 kilo ya madeso samu na kukabula na bampangi. Kasi na ngonda mosi madeso kumá ntalu! Ata mpili yina, bampangi ndimá kusumba yawu. Ba-heure 2 na manima ya kusolola na kompani yina ke tekisá madeso, bantu ya kompani yango bokilá bampangi ya comité de secours. Ba zonzá na bawu ti muntu mosi yina sumbá madeso na ngonda yina lutá, me vutula yawu. Na yina, ba zonzá ti ba ke tekisa madeso na ntalu ya ntama, na bampangi ya comité de secours.

 Ntangu bampangi ya comité de secours kwendá baka madeso, bantu ya kompani yina mangá kusala mutindu bawu wisaná, samu ba vandá kanisa ti, mutindu bantu ya nkaka, bampangi ya comité de secours ke kabula ve bima na faso ya kulunga: bantu ya nkaka ke kuzwa, ba ya nkaka ke kuzwa ve. Na manima ya lusambu ya nkufi, mosi ya bampangi zonzá na bawu ti beto me sosa kuzaba nani na kati ya bimvuka ya beto ke na nsatu ya madya. Bampangi zabisá bawu ti makanda nyonso yina ke kuzwa bima ke ve na bansatu faso mosi. Ni yawu yina, beto ke pesá bima samu muntu na muntu kuzwa yina yandi ke na yawu nsatu. Na nsuka, bampangi zonzá na bawu ti Bambangi ya Yehova yina pesá mbongo mpe ba yina vandá sala kisalu, ke salak’ yawu ya mpamba. Bantu ya kompani pamukaka. Ba ndimá kutekisa bampangi madeso na mbongo yina ba wisanaka. Ba suká ve kaka kuna. Ntangu bampangi kwizá sumba madeso mbala ya nkaka, ba bwelá bawu 400 kilo ya madeso ya mpamba.

 Lusu mufwidi ya kento, ke vandá na Liberia. Yandi ke ya kununa, mpe yandi ke vandá na bantu 5 ya dikanda ya yandi. Kilumbu mosi, ntangu ba vandá kunwa dute na manima ya kutanga dikanisi ya kilumbu, mutekolo ya Lusu ya bamvula 7 talá ti ba vandá dyaka ve na madya. Yandi yufulaka: “Yinki beto ke kudya?” Lusu zonzá na yandi ti yandi sambilá Yehova na kupesa bawu madya. Mpe yandi vandá na kiminu ti Yehova ke sala yawu. Na manima ya midi, bakuluntu ya kimvuka ya yandi bokilak’ yandi samu yandi kwiza baka madya. Lusu me zonza: “Mutekolo ya munu me zonza ti, awa yandi zaba ti Yehova ke kuwá balusambu mpe yandi ke pesá bamvutu, samu yandi me pesa mvutu na lusambu ya munu.”

 Kento mosi ya bwala ya République Démocratique du Congo ke vandá lupangu mosi na dikanda mosi ya Bambangi ya Yehova. Na manima ya kutala ti dikanda yina kuzwá madya yina katuká na bampangi ya bawu, yandi zonzaka: “Na manima ya COVID-19, beto mpe ke kuma Bambangi ya Yehova, samu ti bawu ke na kipeke bampangi ya bawu na ntangu ya mpasi yayi.” Bakala ya yandi yufulak’ yandi: “Nge ke na zolá kukuma mbangi ya Yehova kaka samu ba pesa nge saki ya loso?” Kento vutulaka: “Kaka ve samu na loso, kasi saki ya loso yina ke na lakisá luzolo ya tsyeleka yina ba ke na yawu.”

 Makabu yina beno ke pesá na ntima mosi me sala ti Bambangi ya Yehova lenda kusadisa na mbangu bampangi ya bawu na ntangu yayi ya COVID-19. Matondo mingi na makabu yina beno ke pesá na banzila yina ke na donate.pr418.com.