Batemwe ya Yehova ke lungisá kisalu ya bawu ya kimpeve, mpe ke sadisá bantu na babwala kuluta 200. Kasi kaka babwala 35 ya babwala yango ke lendá kukanga bawu mosi badepense ya bawu na nzila ya makabu yina me lunga na babwala ya bawu samu na kusala badepense. Kasi wa’ faso babwala ya nkaka yina me bikana ke salá?

 Kimvuka ya Bantwadisi ya Batemwe ya Yehova ke talá mbote-mbote bansatu ya kimpeve mpe bisalu ya Batemwe ya Yehova ya yinza nyonso. Ba ke yidiká mbongo mpe ke sadilak’ yawu na faso ya mbote. Si filiale mosi me kuzwa mbongo mingi kuluta yina ba ke na yawu nsatu samu na kulungisa bansatu ya teritwar ya bawu, ba ke yidiká mbongo yina me bikana na zulu samu na kusadisa bampangi ya babwala yina ke ve na mbongo ya kulunga samu na bansatu ya teritwar ya bawu. Na faso ya kusala yayi, beto ke landá faso ya kusala ya Bakristo ya siekle ya ntete, yina sadisá bampangi samu bawu nyonso vanda faso mosi. (2 Bakorinto 8:14) Ba vandá sadila bima yina ba vandá na yawu ya kulutila, samu na kulungisa bansatu ya Bakristo yina vandá ve na bima mingi.

 Yinki ya salá bampangi ya beto na ntima ntangu ba ke zwá mbongo ke katuká na bafiliale ya nkaka? Na kifwani, na Tanzanie, bwala yina bantu ke sadilá kaka 1 000 fcfa to badolare zole samu na kusala badepense bilumbu nyonso. Mbongo yina bafiliale ya nkaka filisá sadisá bawu na kuyidika salle du Royaume yina kimvuka ya Mafinga ke sadilaka. Bampangi ya kimvuka ya Mafinga soniká mambu yayi: “Depwi ba yidiká salle du Royaume ya beto, bantu mase kwiza mingi na balukutakanu! Beto ke na vutulá matondo mingi na organizasion ya Yehova mpe na bampangi ya kento na ya bakala samu na kifu ya bawu ya kukabula, yina me sadisa beto na kuzwa kisika ya kitoko yayi samu na kusambila Yehova.”

 Bampangi ya beto ya nkaka na Sri Lanka mankeke bima ya kudya samu na maladi ya coronavirus yayi. Imara Fernando na mwana ya yandi ya bakala Enosh, vandá na kati ya bampangi yango. Na nzila ya makabu yina katuká na babwala ya nkaka, ba kuzwá. Ba soniká mambu yayi: “Beto ke na vutulá matondo mingi na bampangi yina me lakisa beto luzolo na kati ya ntangu ya mpasi yayi. Beto ke na kilengi ya kuvanda na kati ya famiye yayi, mpe beto ke na kontinyeke kusambila ti Yehova sadisa bampangi nyonso na kati ya bantangu ya nsuka.”

 Ata kote ni kote ba ke vandá, bampangi ya beto ke vandá na nsatu ya kukabula bima ba ke na yawu na bampangi ya nkaka. Na kifwani, Enosh me yidiká mwa caisse yina yandi ke losá mbongo na kati, samu na kusadisa bafamiye yina ke na nsatu ba sadisa bawu. Mpangi Guadalupe Álvarez lakisá mpe kifu ya faso yayi. Yandi ke vandá na Mexique, na kote yina kaka bantu fioti ke kuzwá salere ya fioti mpe ba ya nkaka ke zwá mbongo ntangu nyonso. Kasi, yandi ke pesá yina yandi ke na ngolo ya kupesa. Yandi me sonika: “Mu ke na vutulá matondo mingi na Yehova samu na ntima ya yandi ya mbote, mpe samu na luzolo ya yandi. Mu zaba ti ba ke bwela makabu ya munu na zulu ya makabu yina bampangi ya nkaka me sala, mpe ba ke sadila yawu samu na kusadisa bampangi yina ke nsatu ba sadisa.”

 Bafiliale yina ke pesá mbongo yina ke bikaná na zulu ya makabu yina ba ke zwá, ke salak’ yawu na kilengi nyonso. Mpangi Anthony Carvalho yina ke mosi ya bampangi ya komite ya filiale ya Brésil me zonza: “Na kati ya bamvula mingi, beto vandá na nsatu babwala ya nkaka sadisa beto. Mpe samu ba sadisá beto, baproklamatere kuma dyaka mingi na bwala ya beto. Bubu yayi awa, mambu yina me tadila mbongo me changeke, mpe beto ke na kilengi ya kusadisa bampangi ya babwala ya nkaka. Bampangi ya beto awa na Brésil ke talá faso kisalu ya predikasion ke na salamá na yinza nyonso, mpe faso ba lenda tula diboko samu na kusadisa bampangi ya yinza nyonso.”

 Wa’ faso Batemwe ya Yehova lenda sadisa bampangi ya bawu yina ke na nsatu ba sadisa bawu? Ya ke ve ti ba ke filisa mbala mosi mbongo na bafiliale ya nkaka, kasi ba ke tulá makabu samu na kisalu yina ke salamá na yinza nyonso. Ba ke tulá makabu na caisse ya makabu yina ba ke ya kusonika “Oeuvre Mondiale” to ba ke salak’ yawu na internet na donate.pr418.com. Beto ke vutulá matondo mingi samu na makabu nyonso yayi ba ke salá.