1-2. a) Wa’ faso Yehova ke talaka ba yina me sala disumu ya ngolo mpe yina me balula ve ntima? b) Wapi kivuvu Yehova ke na yawu samu na ba yina me sala disumu ya ngolo?

 YEHOVA ke ndimaka ve mitindu nyonso ya mavanga. Yandi ke yiinaka disumu. (Nku. 5:4-6) Yehova ke na vingilaka ti beto tumama na misiku ya yandi yina ke na kati ya Biblia. Ntembe ve, Yehova ke vingilaka ve ti bantu ya masumu sala bamambu na faso ya kulunga. (Nku. 130:3, 4) Kasi, yandi ke pesaka ve nzila na bantu ya yimbi na ‘kubalula nsangu ya bumbote ya Nzambi samu ti bawu kuzwa nzila ya kuzinga na kindumba.’ (Yude 4) Dyaka, Biblia ke zonzaka na beto ti na mvita ya Armagedoni, Nzambi ke kufwa “bantu yina ke zitisaka ve yandi.”​—2 Pi. 3:7; Luz. 16:16.

² Kasi, Yehova zola ve ti ata muntu mosi kufwa. Mutindu beto me tala na masolo yina me luta, Biblia ke zonzaka pwelele ti Yehova zola ti “bantu nyonso kubalula ntima.” (2 Pi. 3:9, NWT) Bakuluntu ke landaka kifwani ya Yehova, ntangu ba ke lakisaka ntima ya yinda, ke salaka bangolo ya kusadisa muntu yina me sala disumu ya ngolo na kusoba ndyatulu ya yandi mpe na kuvutuka na Yehova. Kasi, ni bantu nyonso ve yina ke salaka disumu ya ngolo, ke balulaka ntima. (Iza. 6:9) Ba ya nkaka ke tatamanaka na kusala bamambu ya yimbi ata bangolo yina bakuluntu ke na salaka samu na kunata bawu na kubalula ntima. Kana mambu ya faso yayi me salama, yinki bakuluntu me fwana kusala?

 “BENO ME FWANA KUKATULA MUNTU YA YIMBI”

3. a) Yinki Biblia ke zonzaka na kusala kana muntu me manga kubalula ntima? b) Samu na yinki beto lenda zonza ti ni muntu yango yandi mosi me soola ti ba katula yandi na kimvuka?

³ Ntangu muntu me sala disumu ya ngolo mpe me balula ve ntima, bakuluntu me fwana kulanda mambu yina ke na 1 Bakorinto 5:13 (NWT) yina ke zonzaka: “Beno me fwana kukatula muntu ya yimbi na kati ya beno.” Muntu yina me sala disumu ya ngolo zaba ti kana yandi balula ve ntima, ba ke basisa yandi na kati ya kimvuka. Beto lenda zonza ti ni yandi mosi me soola ba katula yandi na kimvuka. Yandi me kuzwa bambuma ya bima yina yandi me kunda. (Gal. 6:7) Samu na yinki beto ke na zonzaka yawu? Bakuluntu me sosa kusadisa yandi bambala mingi, kasi yandi me ndima ve kubalula ntima. (2 Mf. 17:12-15) Bamambu yina yandi ke na salaka ke na lakisaka ti yandi me soola kutumama ve na misiku ya Yehova.​—Kul. 30:19, 20.

4. Samu na yinki ba ke zonzaka na kimvuka nyonso ti ba me katula muntu yayi yina me balula ve ntima na kimvuka?

⁴ Ntangu ba ke katulaka muntu yina me sala disumu ya ngolo na kimvuka, ba ke zonzaka na kimvuka nyonso ti muntu yango ke dyaka ve mbangi ya Yehova. Ba ke salaka ve yawu samu na kutalisa muntu yango nsoni. Kasi ya ke samu ti, bampangi ya kimvuka landa misiku ya Biblia na “kuvanda ve kintwadi” na muntu yango mpe “kudya ata fioti ve na” yandi. (1 Ko. 5:9-11, NWT) Samu na yinki Yehova me pesa misiku yayi? Ntumwa Polo sonikaka: “Mwa disumu ya fioti ke mutindu levire yina lenda mwangana na kati ya pate nyonso.” (1 Ko. 5:6, NWT) Kana ba me katula ve na kati ya kimvuka muntu yina me sala disumu ya ngolo mpe yina me balula ve ntima, ba ya nkaka lenda tala ti ba ke ve na nsatu ya kutumama na misiku ya Yehova.​—Bin. 13:20; 1 Ko. 15:33.

5. Wa’ faso beto me lunga kubakila muntu yina ba katulaka na kimvuka mpe samu na yinki?

⁵ Wa’ faso beto me bonga kubakila muntu yina ba me katula na kimvuka? Ata ti beto ke na lutisaka dyaka ve ntangu na yandi, beto zimbana ve ti yandi ke mutindu dimeme yina me zimbana. Ya zola zonza ti, yandi lenda vutuka. Beto zimbana ve ti, yandi kukipesaka na Yehova. Mambu ya kyadi ke ti, yandi ke na tulaka luzingu ya yandi na mpasi samu ti yandi ke na zitisaka ve nsilulu yina yandi salaka na Yehova. (Ezek. 18:31) Kasi, samu Yehova ke na nsatu ya kulakisa yandi ntima ya kyadi, beto ke na kivuvu ti yandi lenda soba. Wapi mutindu bakuluntu lenda lakisa ti ba ke na kivuvu ti muntu yina ba katulaka na kimvuka lenda vutuka?

MUTINDU BAKULUNTU LENDA SADISA BA YINA BA ME KATULA NA KIMVUKA

6. Yinki bakuluntu ke sala samu na kusadisa muntu yina ba me katula na kimvuka?

⁶ Ntangu ba ke basisaka muntu na kimvuka, ya zola zonza kwandi ti bakuluntu ke sosa dyaka ve kusadisa yandi? Ata fioti ve! Ntangu ba ke zonzaka na muntu ti, ba ke basisa yandi na kimvuka, bakuluntu ke zonzaka mpe na yandi yinki ya kusala samu na kuvutuka na kimvuka. Kasi ba ke sukaka ve kaka kuna. Ba ke zonzaka na muntu yina me sala disumu ya ngolo ti, ba ke kwiza tala yandi na mwa bangonda na kutala kana yandi me soba faso ya yandi ya kukanisa. Kana muntu yango me ndima kukutana dyaka na bawu, ba ke kindisa dyaka yandi na kubalula ntima mpe na kuvutuka. Ata ti muntu yango ke ntete ve ya kubongama samu na kubalula ntima, bakuluntu ke sosa kukutana dyaka na yandi na manima ya mwa ntangu samu na kusadisa yandi.

7. Ntangu ba ke katulaka muntu na kati ya kimvuka, wa’ faso bakuluntu lenda landa ntima ya kyadi ya Yehova? (Yeremia 3:12)

⁷ Bakuluntu ke landaka ntima ya kyadi ya Yehova, ntangu ba ke sadisaka ba yina ba me katula na kimvuka. Na kifwani, na ntangu ya ntama, Yehova vanda vingila ve ti, bana ya Izraele balula ntima samu yandi sadisa bawu. Tekila ba balula  ntima, Yehova vanda filisa bambikudi ya yandi samu na kusadisa bawu. Na disolo ya kulongoka ya zole ya Yinzo ya Kengidi yayi, beto talaka mutindu Yehova lakisaka ntima ya kyadi. Na kifwani, Yehova lombaka na mbikudi Oze na kulemvokila kento ya yandi mpe na kuvutuka na yandi ata ti yandi vanda sala ntete kinsuza. (Oze 3:1; Mal. 3:7) Samu na kulanda kifwani ya Yehova, na ntima ya bawu nyonso, bakuluntu me lunga kusala nyonso yina ba ke na ngolo ya kusala samu na kusadisa muntu yina me sala disumu ya ngolo na kubalula ntima. Ba ke sala ve ti ya vanda mpasi na mpangi yango na kuvutuka. Yeremia 3:12 (NWT) ke zonzaka: “Kwenda na nzila ya nordi mpe zabisa mambu yayi: ‘Vutuka, O ndumba ya Izraele,’ Yehova muntu me zonza. ‘Mu ke dasukila dyaka ve beno, samu mu ke ya kukwikama,’ Yehova muntu me zonza. ‘Mu ke bumba ve nkele ya munu bantangu nyonso.’ “

8. Wa’ faso kifwani ya mwana yina zimbanaka lenda sadisa beto na kulanda ntima ya kyadi ya Yehova? (Luke 15:7)

⁸ Beto ke na zabaka dyaka kifwani ya Yesu ya mwana yina zimbanaka yina beto zonzilaka na disolo ya kulongoka ya zole ya mukanda yayi. Yandi vandaka ntete mwa ntama na yinzo ntangu tata ya yandi talaka yandi. Kasi, tata ya yandi “kimaka mbangu, yambaka yandi mpe pesaka yandi babizu na luzolo nyonso.” (Luke 15:20, NWT) Tata vingilaka ve ti mwana bondila yandi samu na kulemvokila yandi. Kasi, yandi kimaka samu na kuyamba yandi samu ti yandi ke zolaka yandi. Ni mutindu yina Yehova ke talaka ba yina me bika yandi mpe bakuluntu me fwana kulanda kifwani ya yandi. Ba ke na nsatu ti dimeme yina me zimbana “vutuka na yinzo,” mpe ba ke salaka nyonso samu na kusadisa yandi. (Luke 15:22-24, 32) Nsayi ke vandaka mingi na zulu mpe na kati ya kimvuka ntangu musumuki mosi ke balulaka ntima.​—Tanga Luke 15:7.

9. Yinki Yehova zola ti ba yina me sala disumu ya ngolo sala?

⁹ Beto me longoka ti Yehova zola ve ti bantu yina me sala masumu ya ngolo mpe me balula ve ntima bikana na kati ya kimvuka. Kasi ata faso yina, yandi ke bikaka ve kusadisa bawu. Yandi ke na nsatu ti ba vutuka. Oze 14:4 ke lakisaka dikanisi ya Yehova na yina me tadila bantu yina me ndima kubalula ntima. Ya ke zonzaka: ‘Mu ke belusa kifu ya bawu ya kukondwa kukwikama. Mu ke zola yandi na ntima mosi, samu ti mu ke dyaka ve na nkele na yandi.’ Samu ti ba zaba dikanisi ya Yehova, bakuluntu ke sosa nyonso yina ke na lakisaka ti faso ya muntu ya kukanisa me banda kusoba. Bamambu yayi, yina Yehova me zonza ke na pesaka ngolo na ba yina me bika yandi. Ya ke na lakisaka bawu ti, yandi ke zolaka bawu mpe ke na nsatu ba vutuka na yandi.

10-11. Yinki bakuluntu ke salaka samu na kusadisa ba yina ba katulaka na kimvuka na ntama?

¹⁰ Wa’ faso bakuluntu lenda sadisa ba yina ba katulaka na kimvuka banda ntama? Ya lenda vanda ti bamvula mingi me luta to ti ba ke na salaka dyaka ve disumu ya ngolo yina salaka ti ba katula bawu na kati ya kimvuka. Ya ba nkaka zaba dyaka ve samu na yinki ba basisaka bawu na kati ya kimvuka. Samu na bantu nyonso yayi, bakuluntu ke sosa kisika yina ba kele mpe ke kwenda tala bawu. Bakuluntu ke sambila na bawu mpe ke bondila bawu na kuvutuka na kati ya kimvuka. Ntembe ve, muntu yina me sala bamvula mingi na ngaanda ke na nsatu ya kuzaba dyaka Yehova mpe matsyeleka. Kana muntu yango me lakisa ti yandi zola kuvutuka, bakuluntu ke yidika bamambu samu mpangi mosi banda kulongoka na yandi Biblia, ata ti nabunu ba vutula yandi na kimvuka. Kaka ni bakuluntu ke soola muntu yina ke longoka Biblia na muntu ba basisaka na kimvuka.

¹¹ Bakuluntu ke landaka ntima ya kyadi ya Yehova. Na yawu, na ntima ya bawu nyonso ba ke sala bangolo samu na kusosa ba yina nyonso me bika kusadila Yehova mpe ke bondila bawu na kuvutuka. Ntangu muntu yina me sala disumu ya  ngolo me balula ntima mpe me bika mavanga ya yandi ya yimbi, bakuluntu lenda vutula yandi na kimvuka ata kuvingila.​—2 Ko. 2:6-8.

12. a) Na wapi bamambu bakuluntu me fwana kusala keba? b) Samu na yinki bakuluntu me bonga ve kukanisa ti ya ke na bantu yina Yehova lenda lakisa ve ntima ya kyadi? (Tala mpe noti ya yisi ya paje.)

¹² Ya ke na mwa bamambu yina bakuluntu lenda sala keba tekila ba vutula muntu na kati ya kimvuka. Na kifwani, ba zola sala keba kana muntu salaka bifu ya yimbi na mwana ya fioti, muntu vandaka apostat to yina yidikaka bamambu samu na kufwa makwela. Bakuluntu ke na nsatu ya kuvanda na kundima ti, ya tsyeleka yandi me balula ntima. (Mal. 2:14; 2 Tim. 3:6) Bakuluntu me fwana kubumba bampangi ya kento na ya bakala ya kimvuka. Ata faso yina, ba me bonga ve kuzimbana ti Yehova ke ndimaka muntu  nyonso yina me sala disumu ya ngolo, me balula ntima mpe me bika mavanga ya yandi ya yimbi. Ata ti bakuluntu ke na nsatu ya kusala keba na ba yina me lakisa ntima ya kulutila yimbi na bampangi, ba me bonga ve kukanisa ti ya ke na bantu yina Yehova lenda lakisa ve ntima ya kyadi. a​—1 Pi. 2:10.

YINKI KIMVUKA LENDA SALA?

13. Wapi yina ke luswaswanu na faso ya kubakila muntu yina ba me semba na bakuluntu na muntu yina ba me basisa na kimvuka?

¹³ Na disolo yina me luta beto me tala ti, bantangu ya nkaka ba ke zonzaka na kimvuka ti ba me semba muntu. Kasi beto lenda lutisa ntangu na yandi, samu ti yandi me soba faso ya yandi ya kukanisa mpe ndyatulu ya yandi. (1 Tim. 5:20) Yandi ke ntete na kati ya kimvuka mpe ke na nsatu ti bampangi sadisa yandi na kusala bamambu ya mbote. (Ebr. 10:24, 25) Kasi, ya ke ve faso mosi na muntu yina ba me basisa na kati ya kimvuka. Beto ke ‘vandaka ve kintwadi’ na muntu yango, mpe ke ‘kudyaka ata fioti ve na muntu ya mutindu yayi.’​—1 Ko. 5:11.

14. Wapi mutindu bakristo lenda sadila malongi ya Biblia ntangu muntu yina ba katulaka na kimvuka me kwiza na lukutakanu? (Tala mpe kizizi.)

¹⁴ Malongi yina ke na 1 Bakorinto 5:11 zola zonza kwandi ti beto lenda bokila ve muntu yina ba me katula na kimvuka to kupesa yandi mbote kana yandi me kwiza na balukutakanu? Ve. Beto lenda lutisa dyaka ve ntangu na muntu yina ba me katula na kimvuka. Kasi, bakristo lenda sadila bamambu yina ba longokaka na Biblia samu na kutala kana ba lenda bokila muntu yina ba me basisa na kimvuka na balukutakanu. Ya lenda vanda muntu ya dikanda ya beto to ndiku ya beto ya ntima. Wa’ faso beto lenda bakila yandi, kana yandi me kwiza na balukutakanu? Na ntama, beto vanda pesaka ve muntu ya mutindu yayi mbote. Kasi bubu yayi, ni na konso mukristo na kubaka mukanu na nzila ya mambu yina yandi ke longokaka na Biblia samu na kuzaba kana yandi ke pesa yandi mbote to ve. Ya ba nkaka lenda tala ti ya ke ve yimbi na kupesa mbote na muntu yango mpe kuzonza na yandi kwizulu ya mbote na lukutakanu. Beto ke lutisa dyaka ve ntangu na yandi to kuvanda na masolo ya yinda na yandi.

15. Ba nani 2 Yoane 9-11 ke zonzilaka? (Tala mpe encadré “ Yoane na Polo vanda zonzila kwandi mambu mosi?”)

¹⁵ 2 Yoane 9-11 ke zonzaka: “Konso muntu  yina kele ve ya kukangama na ndongosolo ya Klisto, kasi ke bwelaka mambu ya nkaka, kele na Nzambi ve. Muntu yina kele ya kukangama na ndongosolo ya Klisto, kele na Tata mpe Mwana. Na yina, kana muntu kwiza na sika ya beno, mpe longisa ve beno ndongosolo yina, beno yamba yandi ve, mpe beno pesa yandi mbote ve. Kana muntu pesa yandi mbote, yandi mpe ke na kukabula mavanga ya yimbi ya muntu yina.” ‘Kupesa mbote na muntu yina ba me katula na kimvuka zola zonza kwandi ti beto ke na kabulaka mavanga ya yandi ya yimbi?’ Ntangu beto ke tangaka mbote-mbote buku nyonso ya 2 Yoane, ya ke na talanaka ti yandi vanda zonzila bantu yina pesaka Yehova na dibuundu yandi mukongo (apostats) to bantu yina ke sosaka kunata bantu ya nkaka na kusala mambu ya yimbi yina Biblia ke niminaka. (Luz. 2:20) Na yawu, kana muntu ke kabulaka malongi ya ba apostats to bamambu ya nkaka ya yimbi yina Biblia ke niminaka, bakuluntu ke kwenda tala ve yandi. Beto ke na kivuvu ti yandi lenda balula ntima. Kana yandi me sala ve yawu, beto ke bokila ve yandi na balukutakanu mpe ke pesa ve yandi mbote.

LANDA KIFWANI YA NTIMA YA KYADI YA YEHOVA

16-17. (a) Yinki Yehova ke na nsatu bantu yina me sala disumu ya ngolo sala? (Ezekiele 18:32) b) Wapi mutindu bakuluntu lenda sala kintwadi na Yehova ntangu ba ke sadisaka muntu yina me sala disumu ya ngolo?

¹⁶ Yinki masolo 5 ya mukanda yayi me longa beto? Yehova zola ve ti ata muntu mosi kufwa. Ezekiele 18:32 (NWT) ke zonzaka: “‘Mu ke ve na kyese ya lufwa ya konso muntu,’ Yehova Mfumu ya Kuluta Ngolo muntu me zonza. ‘Yawu yina, beno vutuka mpe beno zinga.’” Yandi zola kuvutula kindiku na muntu yina me sala disumu ya ngolo. (2 Ko. 5:20) Ni yawu me sala ti kubanda ntama yandi salaka bangolo bambala mingi samu na kunata bisadi ya yandi yina bikaka yandi na kubalula ntima mpe na kuvutuka na yandi. Bakuluntu ke na bweso ya kusala kintwadi na Yehova samu na kusadisa ba yina me sala disumu ya ngolo na kubalula ntima.​—Rom. 2:4; 1 Ko. 3:9.

¹⁷ Kanisa na kilengi yina ke vandaka na zulu ntangu bantu yina ke salaka masumu ya ngolo ke balulaka ntima! Ya ke pesaka Yehova kilengi ya mingi ntangu dimeme mosi yina zimbanaka me vutuka na kimvuka. Kuyindula na ntima ya kyadi mpe na ntima ya kulutila mbote ya Yehova ke kulisaka luzolo ya beto samu na yandi.​—Luke 1:78.