Ntumwa Polo sonikaka na Bakristo ya Batesalonika: “Kana muntu ke na tumamaka ve na bamambu yina beto me sonika na mukanda yayi, beno tala mbote-mbote ya kele nani.” (2 Tes. 3:14, NWT) Na ntama, beto vanda talaka ti kana muntu ke na kuwaka ve malongi ya Biblia ata ti ba me vutukila kupesa yandi malongi yango mbala na mbala, bakuluntu lenda sala diskure samu na kukebisa kimvuka. Na manima ya diskure yayi, bampangi ya kimvuka lenda kusolola na yandi na balukutakanu, kusamuna na yandi, kasi kulutisa ve ntangu na yandi na bamambu ya nkaka.

Kasi bamambu me soba. Beto me kwiza bakula ti Polo pesaka malongi yayi na mosi na mosi ya bakristo na kati ya kimvuka samu na kuzaba mukanu ya kubaka. Na yawu, ya zola vanda ve mfunu na bakuluntu na kusala diskure samu na kukebisa kimvuka. Samu na yinki bansobolo yayi? Beto tala yina ntumwa Polo vanda zonzila ntangu yandi pesaka malongi yayi.

Polo talaka ti na kati ya kimvuka, ya vandaka na bantu yina vanda “tambula na mutindu ya kidi-kidi.” Yandi vanda pesa bawu malongi ya mambu ya Nzambi, kasi ba vanda manga kutumama. Na yawu, ntangu yandi kwizaka tala bawu, yandi zonzaka na bawu: “Kana muntu zola ve kusala, yandi kudya mpe ve.” Ba ya nkaka vanda zola ve kusala samu na kukipe bansatu ya bawu, ata ti ba vandaka na ngolo ya kusala. Kisalu ya bawu vandaka kaka kukota na bamambu ya ngana. Wa’ faso bakristo ya nkaka zola bakila bawu?​—2 Tes. 3:6, 10-12, NWT.

Polo zonzaka: “Beno tala mbote-mbote ya kele nani.” Nzonzolo ya Greke yayi zola kuzonza kusosa kuzaba muntu yango mpe kusala keba samu yandi lenda nata nge na kusala mambu ya yimbi. Ya ke ve kaka samu na bakuluntu kasi samu na kimvuka nyonso. (2 Tes. 1:1; 3:6) Na yawu, mosi na mosi ya bakristo lenda tala ti mpangi ya nkaka ke na tumamaka dyaka ve na malongi ya Biblia mpe kusoola “kuvukana ve kintwadi na yandi.”

Beto zola bakila kwandi muntu ya mutindu yina, mutindu muntu yina ba me katula na kimvuka? Ve. Polo bwelaka: “Beno tatamana na kukebisa yandi mutindu mpangi.” Na yawu, konso mukristo lenda vanda na yandi na balukutakanu, na kisalu ya kusamuna kasi ba lenda soola kulutisa ve ntangu na yandi na bamambu ya nkaka. Samu na yinki? Mutindu ntumwa Polo zonzaka: “Samu yandi kufwa nsoni.’’ Na nsoni, mpangi yina lenda soba ndyatulu ya yandi.​—2 Tes. 3:14, 15, NWT.

Wa’ faso beto lenda sadila malongi yayi bubu yayi? Ya ntete, ya zola talana pwelele na meso ya beto ti, mpangi yango ke na “tambulaka na mutindu ya kidi-kidi,” mutindu zonzaka yawu ntumwa Polo. Beto lenda zonza kwandi ti muntu ke “tambulaka na mutindu ya kidi-kidi” samu yandi ke talaka ve bamambu faso mosi na beto? To ti yandi ke zolaka ve bamambu faso mosi na beto? To ndinga yina ke zonzaka na kati ya ntima ya yandi ke ve faso mosi na ya beto? Ni yawu ve. Ya zola mpe ve kuzonza ti kana mpangi me lwalisa ntima ya beto, beto zola bakila yandi mutindu yina. Awa ntumwa Polo ke na zonzilaka ba yina ke mangaka kutumama na mambu ya Nzambi na nko, ata ntangu ba me pesa bawu malongi mingi.

Bubu yayi, kana mukristo mosi me tala ti mpangi mosi ke na zolaka ve kutumama na mambu ya Nzambi, a yandi lenda baka mukanu yandi mosi na kulutisa dyaka ve ntangu na mpangi yango. Samu ya ke mukanu yina muntu lenda baka yandi mosi, beto lenda solola ve na yawu na muntu yina ke vandaka ve yinzo mosi na beto mpe beto lenda vanda na mpangi yina kintwadi na balukutakanu mpe kusamuna na yandi. Kana yandi me soba ndyatulu ya yandi, beto lenda vutukila kulutisa ntangu na yandi.