1. Yinki ke pesá beto kilengi?

YA ke okazion ya nene yina beto ke na yawu ya kuvanda na kati ya kimvuka ya Yehova! Beto ke na kati ya paradis ya kimpeve, kisika yina ke na kizunu mpe bantu ya mbote. Wapi yina ke plase ya nge na kati ya kimvuka?

2. Wapi kifwani apotre Paul sadilá mingi na kati ya mikanda ya yandi?

² Beto lenda longoka mambu mingi na kifwani yina apotre Paul zonzilá bambala mingi na kati ya mikanda ya yandi. Na kati ya mosi na mosi ya mikanda yango, Paul zonzá ti kimvuka ke faso nzutu ya muntu. Yandi zonzá mpe ti bantu na kati ya kimvuka ke faso binama ya nzutu—Rom. 12:4-8; 1 Ko. 12:12-27; Ef. 4:16.

3. Wapi baleson tatu beto ke benda na artikle yayi?

³ Na artikle yayi, beto ke tala yinki beto lenda longoka na kifwani yina Paul pesaka. Ya ntete, beto ke longoka ti, mosi na mosi na kati ya beto ke na plase * ya yandi na kati ya kimvuka ya Yehova. Ya zole, beto ke zonzila yinki nge lenda sala, si nge ke na talá nete nge ke ve na plase na kati ya kimvuka. Ya tatu, beto ke tala faso nge lenda kangama kaka na kusala kisalu yina Nzambi me pesa nge na kati ya kimvuka.

4. Yinki Baroma 12:4, 5 ke na longá beto?

⁴ Leson ya ntete yina beto lenda longoka na kifwani yina Paul pesá, ni yayi: Mosi na mosi na beto ke na plase ya yandi na kati ya famiye ya Yehova. Paul bandá ekzample ya yandi na mambu yayi: “Samu faso nzutu mosi ke na binama mingi, kasi binama nyonso ke salá ve kaka kisalu mosi, faso mosi mpe, ata beto ke mingi, beto ke nzutu kaka mosi na bumosi na Kristo, kasi mosi na mosi na beto ke binama ya nzutu yina ke ya kuvukana na ba ya nkaka.” (Rom. 12:4, 5) Yinki Paul zolá zonza? Beto nyonso ke salá ve kisalu mosi na kati ya kimvuka, kasi mosi na mosi na kati ya beto ke na valere.

5. Wapi “bakado” Yehova me pesa na kati ya kimvuka?

⁵ Ntangu nge ke kanisá na ba yina ke na plase na kimvuka, nge lenda banda kutala ba yina ke twadisá beto. (1 Tes. 5:12; Ebr. 13:17) Ye ke vrai, na nzila ya Yesu, Yehova pesá “bantu faso [bakado]” na kimvuka ya yandi. (Ef. 4:8) Na kati ya “bakado” yango, beto lenda zonzila bampangi ya Kimvuka ya Bantwadisi (Collège central) na ba yina ke sadisá bawu, bampangi ya komite ya filiale na bantwadisi ya sirkonskripsion, ba yina ke longá na balekole biblik ya organizasion, bakuluntu ya kimvuka na ba yina ke sadisá bawu (assistants). Ni mpeve ya santu solá bampangi nyonso yayi samu ba kipe mameme ya Yehova mpe ba kumisa kimvuka ngolo.—1 Pi. 5:2, 3.

6. Faso me zonza 1 Batesalonika 2:6-8, wapi bangolo bampangi yina mpeve ya santu solá ke salaka?

⁶ Bampangi yina mpeve ya santu solá, ke salá bisalu mingi. Binama ya nzutu faso maboko na makulu ke salá samu na kilengi ya nzutu nyonso, faso mosi mpe bampangi yina mpeve ya santu solá, ke salá mingi samu na bambote ya kimvuka nyonso. Ba ke sosá ve bantu ya nkaka pesa bawu nkembo. Kasi ba ke salá nyonso na kutunga kiminu ya bampangi ya kimvuka. (Tanga 1 Batesalonika 2:6-8.) Beto ke pesá mersi na Yehova samu na bampangi ya ntima ya mbote yayi, yina zaba kutula bansatu ya bampangi avant bansatu ya bawu mosi!

7. Wapi bambote ba yina ke pesá ntangu ya bawu nyonso na kisalu ya Yehova ke zwaka?

⁷ Bampangi ya nkaka na kati ya kimvuka ke bamisionere, bapionier spesial, to bapionier ya ntangu nyonso. Na yawu, bampangi ya nkaka na yinza nyonso, me baká desizion na luzingu ya bawu, ya kupesa ntangu ya bawu nyonso na kisalu ya predikasion. Samu ba baká desizion yayi, ba ke sadisá bantu mingi na kukuma bilandi ya Yesu. Ata ba ke ve na bima to mbongo mingi na luzingu ya bawu, Yehova ke pesá bawu bima mingi ya mbote. (Mrk. 10:29, 30) Ba ke zolá bampangi ya bawu bakristo, mpe ba ke sepelá na plase yina ba ke na yawu na kati ya kimvuka!

8. Samu na yinki baproklamatere nyonso ke na valere na meso ya Yehova?

⁸ Ya ke kaka bampangi yina ke na baresponsabilite na ba yina ke pesá ntangu ya bawu nyonso na kisalu ya Yehova, ke na plase na kimvuka? Ve! Baproklamatere nyonso ke na valere na meso ya Nzambi mpe samu na kimvuka. (Rom. 10:15; 1 Ko. 3:6-9) Ya ke vrai, samu ti, mosi ya bisalu ya nene yina Yehova pesá na kimvuka, ni ya kukumisa bantu bilandi ya Mfumu ya beto, Yesu. (Mat. 28:19, 20; 1 Tim. 2:4) Ba yina nyonso ke precheke, ya vanda ba yina kuzwá bateme to ba yina me kuzwá ntete ve yawu, bawu nyonso ke tulá kisalu ya predikasion na plase ya ntete na luzingu ya bawu.—Mat. 24:14.

9. Samu na yinki beto ke zolá kisalu yina ke salá bampangi ya beto ya kento?

 ⁹ Yehova lakisá ti, yandi ke pesá bampangi ya beto ya kento valere. Na yina, yandi pesá bawu kisalu ya kusala na kati ya kimvuka. Yehova ke pesá valere na bakento ya kukwela, bamama, ba yina fwidilá bakala, mpe baselibatere yina ke sadilak’ yandi na ntima mosi. Biblia ke zonzilá mingi bakento ya ntima ya mbote yina sepelisá Nzambi. Ba ke bifwani ya mbote samu ba lakisá mayela, kiminu, tiya na kisalu ya Yehova, kuraje, kifu ya kukabulá, mpe ngolo na kisalu. (Luke 8:2, 3; Bis. 16:14, 15; Rom. 16:3, 6; Flp. 4:3; Ebr. 11:11, 31, 35) Beto ke pesá mersi mingi na Yehova samu na bampangi ya beto ya kento na kati ya kimvuka, yina ke lakisá bifu ya mbote yayi!

10. Samu na yinki beto zolá pesa valere na bampangi ya beto yina me nuna?

¹⁰ Beto ke mpe na kilengi ya kuvanda na bampangi yina me nuna na kati ya kimvuka. Ba ya nkaka me lutisá luzingu ya bawu nyonso na kusala kisalu ya Yehova. Ba ya nkaka me zwa bateme ntama mingi ve. Samu ba me nuna, mingi na kati ya bawu ke na sante ya yimbi. Na yawu, ba ke dyaka ve na ngolo ya mingi samu na predikasion mpe samu na bisalu ya nkaka ya kimvuka. Ba ke salá nyonso yina ba lenda sala na kisalu ya predikasion, mpe ba ke sadilá bangolo ya bawu samu na kupesa kuraje, mpe formasion na bampangi! Mambu nyonso yina ba zaba na luzingu ke sadisá beto. Ba ke vrai kitoko na meso ya Yehova mpe na meso ya beto.—Bin. [Prov.] 16:31.

11-12. Wa’ faso bantwenya ya kimvuka ya nge me pesá deja nge kuraje?

¹¹ Beto kanisa mpe na bantwenya (jeunes) ya kimvuka ya beto. Ba ke na kutaná na bamambu, samu ba ke na kulá na yinza yina Satan na makanisi ya yandi ya yimbi ke na twadisaka. (1 Yoa. [Jean] 5:19) Beto nyonso ke vandá na kuraje ntangu ba ke pesá bakomantere na balukutakanu, ntangu ba ke salá kisalu ya predikasion, to ntangu beto ke wá ti, ba ke nwaniná kiminu ya bawu na kuraje nyonso. Ya vrai, beno bantwenya, beno ke na plase na kati kimvuka ya Yehova!—Nku. 8:2.

 ¹² Kasi, ya ke mpasi samu na bampangi ya beto ya nkaka na kundima ti, ba ke na valere na kati ya kimvuka. Yinki lenda sadisa beto na kuzaba ti beto ke na plase na kimvuka? Beto zonzila yawu.

13-14. Samu na yinki ba ya nkaka lenda kanisa ti ba ke ve na valere na kati ya kimvuka?

¹³ Leson ya zole yina beto lenda longoka na ekzample yina Paul pesá, ke na natá beto na kukanisa na bamambu yina bampangi mingi ke na yawu bubu yayi. Ya ke mpasi samu na ba ya nkaka na kundima ti ba ke na valere na kati ya kimvuka. Paul soniká: “Si dikulu zonza: ‘Mu ke ve diboko. Na yina, mu ke ve kinama ya nzutu,’ ya ke bika kuvanda kinama ya nzutu? Si dikutu zonza: ‘Mu ke ve disu. Na yina, mu ke ve kinama ya nzutu,’ ya ke bika ve kuvanda kinama ya nzutu.” (1 Ko. 12:15, 16) Yinki Paul ke na sosá kulonga beto?

¹⁴ Si nge banda kutala kaka yina bampangi ke salá, nge lenda banda kukanisa ti nge ke ve na plase na kati ya kimvuka. Bampangi ya nkaka na kimvuka lenda zaba mbote-mbote kulonga, kuyidika bamambu na faso ya mbote, to ke bakuluntu ya mbote. Ntangu ya nkaka, nge lenda kanisa ti nge ke lenda ve kuvanda faso bawu. Ya ke na lakisá ti nge ke ya kukuluka. (Flp. 2:3) Kasi sala keba. Si ntangu nyonso nge ke talá kaka yina ke salá bampangi yina me lutila nge, nge ke nyonga. Nge lenda kanisa mpe ti nge ke ata fioti ve na plase na kimvuka, faso Paul zonzak’ yawu. Yinki lenda sadisa nge samu nge kubwa ve na makanisi ya faso yayi?

15. Faso ke zonzá 1 Bakorinto 12:4-11, yinki beto ke na nsatu ya kuzaba na bamambu nyonso yina beto ke na ngolo ya kusala?

¹⁵ Tala mambu yayi: Yehova pesá na ndambu ya bakristo ya siekle ya ntete makabu ya nene ya mpeve ya santu, kasi ba bakristo nyonso kuzwá ve makabu mosi. (Tanga 1 Bakorinto 12:4-11.) Yehova pesá ve bawu nyonso makabu faso mosi. Kasi mukristo nyonso vandá na valere. Bubu yayi, beto lenda sala ve bamirakle faso bawu. Beto nyonso ke ve na mayela  mpe bangolo mosi. Kasi beto nyonso ke na valere na meso ya Yehova.

16. Wapi konseye ya apotre Paul beto zolá sadila?

¹⁶ Na kisika ya kutala kaka yina bakristo ya nkaka ke salá, beto zolá sadila konseye yina Yehova pesá na nzila ya Paul: “Muntu nyonso me bonga kutadila mambu yina yandi mosi ke salá, na yawu, yandi ke vanda na kima ya kutala kilengi samu na yandi mosi, kasi ve na [kutala kaka bima yina ke salá] muntu ya nkaka.”—Gal. 6:4.

17. Wapi bambote beto ke kuzwa si beto landa konseye ya Paul?

¹⁷ Si beto landa konseye yina Paul pesá, mpe kutadila mambu yina beto mosi ke salá, beto lenda banda kutala ti beto ke na mwa mayela to ngolo yina bampangi ke ve na yawu. Na kifwani, kuluntu mosi lenda vanda ve ngolo na kusala badiskur, kasi yandi ke ngolo na kukumisa bantu bilandi ya Yesu. To yandi ke ve na organizasion ya mbote faso bakuluntu ya nkaka na kimvuka, kasi yandi ke kuluntu mosi ya ntima ya mbote mpe ya luzolo yina bampangi ya kimvuka ke vandá ve na nsoni ya kulomba bakonseye ya Biblia. To yandi lenda vanda ya kuzabana na kifu ya kuyamba banzenza. (Ebr. 13:2, 16) Ntangu beto ke talá bangolo ya beto, beto ke vandá na rezon ya kutala kilengi samu na yina beto ke salá samu na kimvuka. Mpe, beto ke sala ve bampangi kimbanda samu beto ke ve na mayela to ngolo mosi.

18. Wa’ faso beto lenda bongisa faso ya beto ya kulonga?

¹⁸ Ata baresponsabilite yina ke na beto na kati ya kimvuka, beto nyonso zolá bongisa faso ya beto ya kulonga, mpe kukulisa mayela ya beto na kisalu ya predikasion. Samu na kusadisa beto, Yehova ke pesá beto formasion ya mbote na nzila ya organizasion ya yandi. Na kifwani, na balukutakanu ya beto ya semaine, beto ke longoká faso ya kubongisa dyaka kisalu ya beto ya predikasion. Nge ke na sosá kwandi kusadila formasion yina nge ke kuzwá na balukutakanu?

19. Wa’ faso nge lenda lungisa dikanisi ya nge ya kusala lekole ya E.E.R?

¹⁹ Kima ya nkaka ya mbote, ni formasion ya E.E.R (École pour évangélisateurs du Royaume). Ba yina lenda sala lekole yayi, ni bapionier yina ke na bamvula 23 tii 65. Nge lenda kanisa ti, nge ke ata fioti ve na ngolo ya kulungisa dikanisi ya nge yayi. Kusonika ve bamambu yina ke sala ti nge lungisa ve dikanisi ya nge, kasi sonika bamambu yina nge ke na yawu nsatu samu na kulungisa yawu. Mpe sala programe yina ke sadisa nge na kuzaba bamambu yina nge ke sala. Nge lenda vanda na ngolo ya kusala kima yina ke na talaná mpasi, si Yehova sadisa nge, mpe si nge sala yina nge ke na ngolo ya kusala.

20. Yinki beto lenda longoka na Baroma 12:6-8?

²⁰ Leson ya tatu yina beto lenda longoka na ekzample yina Paul pesá, ke na Baroma 12:6-8. (Tanga.) Awa Paul ke na lakisá dyaka ti, bantu nyonso na kati ya kimvuka ke ve na mayela mpe bangolo mosi. Yandi ke na zonzá ti, beto zolá sadila mayela mpe bangolo ya beto, samu na kutunga mpe kupesa kimvuka ngolo.

21-22. Wapi leson beto lenda longoka na ekzample ya Robert na Felice?

²¹ Kanisa na yina kuminá mpangi yina beto ke bokila Robert. Na manima ya kusadila Yehova na bwala ya nzenza, ba bokilak’ yandi na kwiza sala na Béthel na bwala ya yandi mosi. Ata bampangi zonzá na yandi ti, yandi salá ata kima ya yimbi samu ba chanje yandi kisalu, yandi zonzá: “Bangonda mingi lutá yina mu vandá ve na kilengi, samu mu vandá tala ti mu lungisá ve kisalu ya munu na bwala ya nzenza kote mu vandá, ni na yina ba bokilá munu na  Béthel. Bantangu ya nkaka mu vandá dyaka ve na nsatu ya kusala na Béthel.” Wa’ faso yandi salá samu na kuzwa dyaka kilengi ya yandi? Kuluntu mosi zonzá na yandi ti, Yehova ke sadilá bisalu ya kimpeve yina yandi pesá beto na ntama samu na kuforme beto samu beto lenda kusala bisalu ya beto ya malu-malu. Robert kwizá ndima ti, yandi vandá na nsatu ya kubika kukanisa na yina lutá, mpe kubanda kukanisa na yina yandi lenda sala bubu yayi.

²² Mpangi Felice Episcopo kutaná mpe na mambu ya faso yayi. Yandi na kento ya yandi salá lekole ya Galaad na 1956, mpe vandá ntwadisi ya sirkonskripsion na Bolivie. Na 1964 ba butá mwana ya bakala. Felice zonzá: “Ya vandá mpasi na beto na kubika kisalu yina beto vandá zolaka. Mu me ndima ti, mu lutisá mvula ya muvimba yina mu vandá ve na kuraje. Kasi Yehova pesá mu ngolo ya kuchange faso ya munu ya kutadila bamambu, mpe mu baká responsabilite ya munu faso papa.” Nge mpe ke kanisá faso Robert na Felice? Nge ke ya kulemba samu nge ke dyaka ve na baresponsabilite yina vandá na nge na ntama? Si ya ke faso yina, nge ke vanda na kilengi ya kulutila si nge chanje faso ya nge ya kutadila bamambu, mpe nge tala kaka yina nge lenda sala bubu yayi, samu na kusadila Yehova na bampangi ya kimvuka. Sala mingi na kisalu ya Yehova, sadila mayela mpe bangolo ya nge na kusadisa bampangi. Mpe nge ke vanda na kilengi ya kutunga kimpeve ya bampangi.

23. Yinki beto zolá baka ntangu ya kusala, mpe yinki beto ke zonzila na artikle yina ke landa?

²³ Mosi na mosi na beto ke na valere na meso ya Yehova. Yandi zola beto vanda na kati ya famiye ya yandi. Si beto baka ntangu ya kukanisa mbote-mbote na yina beto lenda sala samu na kutunga kiminu ya bampangi, mpe kusala bangolo samu na kusala yawu, beto ke kanisa ve ti, beto ke ve na plase na kati ya kimvuka! Kasi, wa’ faso beto ke bakilá bampangi na kati ya kimvuka? Wa’ faso beto lenda lakisa ti beto ke zolá mpe ke pesá bawu buzitu? Beto ke zonzila yawu na artikle yina ke landa.