1. Yinki Yehova me pesa na mosi na mosi ya bisadi ya yandi?

NA LUZOLO nyonso, Yehova me pesa mosi na mosi ya bisadi ya yandi, plase na kati ya kimvuka. Beto ke salá ve kisalu mosi na kati ya kimvuka, kasi beto nyonso ke na valere na meso ya Yehova, mpe beto nyonso ke na nsatu ya bampangi. Apotre Paul ke na sadisá beto na kuzaba leson ya mbote yayi. Wa’ faso?

2. Faso Baefeze 4:16 me zonza yawu, samu na yinki beto ke na nsatu ya kupesa bampangi valere mpe kusala na bawu?

² Na verse teme ya artikle yayi, Paul me lakisa ti, ata muntu na kati ya beto lenda zonza na kisadi ya nkaka ya Yehova: “Mu ke ve na nsatu ya nge.” (1 Ko. 12:21) Si beto zola kizunu vanda na kati ya kimvuka, beto zolá pesa bampangi valere mpe kusala na bawu. (Tanga Baefeze 4:16.) Ntangu beto ke salá na bumosi na bampangi, kimvuka ke kwendá na mantwala mpe beto ke kulisá luzolo.

3. Yinki beto ke zonzila na artikle yayi?

³ Wa’ faso beto lenda lakisa buzitu samu na bakristo ya nkaka na kati ya kimvuka? Na artikle yayi, beto ke tala wa’ faso bakuluntu lenda pesa buzitu na bakuluntu ya nkaka. Mpe beto ke zonzila wa’ faso beto lenda lakisa ti beto ke pesá bampangi ya beto yina ke ve ya kukwela valere. Mpe na kumanisa, beto ke longoka wa’ faso beto lenda lakisa buzitu samu na ba yina zaba ve kuzonza mbote-mbote ndinga ya beto.

4. Wapi konseye Paul pesá na Baroma 12:10 yina bakuluntu zolá landa?

⁴ Yehova ke sadilá mpeve ya santu na kusola bakuluntu nyonso ya kimvuka. Kasi bawu nyonso ve ke na mayela mpe ngolo mosi. (1 Ko. 12:17, 18) Ba yina me kuma bakuluntu ntama mingi ve, zaba ve bamambu mingi faso ba yina kumá bakuluntu avant bawu. Ba ya nkaka lenda vanda ve na ngolo ya kusala mingi, samu ba ke na maladi to ba me nuna. Kasi, ata kuluntu mosi zolá kanisa ti, bakuluntu ya nkaka ke ve na valere. Na yawu, bakuluntu nyonso zolá landa konseye yina Paul pesá na Baroma 12:10.—Tanga.

5. Samu na yinki bakuluntu zolá lakisa ti ba ke na buzitu samu na bakuluntu ya nkaka, mpe samu na yinki ya ke mbote ba sala yawu?

⁵ Bakuluntu ke lakisá ti ba ke na buzitu na bakuluntu ya nkaka, ntangu ba ke baká ntangu ya kuwa bawu. Mingi-mingi, ntangu ba ke vukaná samu na kuyidika mambu ya ngolo na kati ya kimvuka. Samu na yinki? Tala yina ke zonzá Yinzo ya Kengidi ya 1 Octobre 1988 (na Français): “Bakuluntu zolá zaba ti, Yesu lenda sadila mpeve ya santu, samu na kusadisa bakuluntu nyonso ya kimvuka na kukanisa na konseye ya Biblia, yina lenda sadisa bawu na kuzaba yinki ba lenda sala samu na kuyidika bamambu, mpe na kubaka badesizion ya mbote. (Bis. 15:6-15) Kuluntu mosi ve zolá kanisa ti yandi ke zwá mpeve ya santu kulutila bampangi.”

6. Yinki ke sadisá bakuluntu na kusala na bumosi, mpe wapi bambote ya ke natiná kimvuka?

⁶ Kuluntu yina ke na buzitu samu na bampangi bakuluntu, ke vandá ve ntangu nyonso muntu ya ntete na kuzonza ntangu ba ke vukaná na bakuluntu ya nkaka. Kaka ni yandi ve ke zonzá, mpe yandi ke kanisá ve ti kaka ni dikanisi ya yandi me lutila mbote. Kasi na kukuluka nyonso, yandi ke zonzá yina yandi ke na kanisaka. Yandi ke wá mbote-mbote yina bampangi ke zonzá. Yina me lutila nyonso, yandi ke zonzilá bakonseye ya Biblia mpe ke landá mambu yina “muumbu ya mayela mpe ya kukwikama” ke zonzaka. (Mat. 24:45-47) Si ba kuluntu ke lakisá buzitu na bampangi ntangu ba ke yidiká  bamambu, mpeve ya Nzambi ke vanda na bawu mpe ya ke sadisa bawu na kubaka badesizion yina ke pesa kimvuka ngolo.—Zaki 3:17, 18.

7. Wa’ faso Yesu vandá bakilá baselibatere?

⁷ Na kati ya kimvuka, ya ke na bakuple mpe bafamiye. Ya ke mpe na bampangi mingi ya bakala na ya kento yina ke ve ya kukwela. Wa’ faso beto zolá bakila ba yina ke ve ya kukwela? Beto tala faso Yesu vandá bakilá bawu. Ntangu yandi vandá awa na ntoto, Yesu kwelá ve. Yandi vandá selibatere luzingu ya yandi nyonso. Yandi lutisá ntangu mpe tulá bangolo ya yandi nyonso na kisalu ya predikasion. Samu na Yesu, mukristo lenda sola kuvanda selibatere to kukwela. Kasi, yandi zonzá ti bakristo ya nkaka ke baka desizion ya kuvanda baselibatere. (Mat. 19:11, 12) Yesu pesá buzitu na ba yina vandá ya kukwela. Yandi kanisá ve ti, bantu ya kukwela me lutila baselibatere, to ya ke na kima yina baselibatere ke ve na yawu na luzingu samu ba ke ve ya kukwela.

8. Faso 1 Bakorinto 7:7-9 ke zonzá, Yinki Paul natá Bakristo na kuzaba?

⁸ Faso Yesu, apotre Paul vandá kaka selibatere ntangu nyonso yina yandi lutisá na kisalu ya predikasion. Apotre Paul zonzá ve ti ya ke vanda yimbi na mukristo na kukwela. Yandi zabá ti ya ke desizion ya muntu yandi mosi. Kasi, apotre Paul natá bakristo na kutala si ba lenda sadila Yehova faso baselibatere. (Tanga 1 Bakorinto 7:7-9.) Yandi kanisá ve ti bakristo ya kukwela lutilá baselibatere na valere. Yandi baká Timote yina vandá selibatere, samu na kusala bisalu ya nene na kisalu ya Yehova. * (Flp. 2:19-22) Na yawu, ya ke vandá ve mbote na kukanisa ti, mpangi ke na mayela mingi to fioti, samu yandi ke ya kukwela to samu yandi ke selibatere.—1 Ko. 7:32-35, 38.

9. Yinki beto lenda zonza na yina me tadila makwela to buselibatere?

⁹ Ya vanda Yesu to Paul, ata mosi na bawu zole zonzá ti, bakristo zolá kwela to ba zolá vanda baselibatere. Na yawu, yinki beto lenda zonza na yina me tadila dikwela to buselibatere? Yinzo ya Kengidi ya 1 Octobre 2012 (na Français), pesá reponse ya mbote na kestion yayi. Ya zonzá: “Ntembe ve, ya vanda [makwela to buselibatere], nyonso zole ke dikabu ya Nzambi. [. . .] Yehova ke kanisá ve ti baselibatere zolá vanda na nsoni to na basusi samu ba ke ve ya kukwela.”  Na yawu, na kati ya kimvuka, beto zolá pesa buzitu na bampangi yina ke ve ya kukwela.

10. Wa’ faso beto zolá lakisa buzitu na bampangi yina ke ve ya kukwela?

¹⁰ Wa’ faso beto lenda bakila bampangi yina ke baselibatere? Ya ke vanda mbote si beto zimbana ve ti, ya ke na barezon mingi yina ke salá ti bampangi kwela ve. Na kifwani, bakristo ya nkaka ke na nsatu ya kukwela kasi, nabunu ba kuzwa muntu ya mbote samu na bawu. Samu na ba ya nkaka, ya lenda vanda samu ba fwidilá kento to bakala. Na kutala barezon yina beto me zonzila, ya ke kwandi mbote na bampangi ya kimvuka na kuyufula na bampangi yina ke baselibatere, samu na yinki ba ke na kwelá ve to na kusosila bawu mwa kento to mwa bakala? Ya vrai, baselibatere ya nkaka lenda vanda na nsatu ba sadisa bawu. Kasi si yandi me lomba ve ba sadisa yandi, yinki ya ke sala yandi si muntu sosila yandi mwa kento to mwa bakala? (1 Tes. 4:11; 1 Tim. 5:13) Beto zonzila ntete mwa bakomantere yina salá baselibatere yina ke ya kukangama na Yehova.

11-12. Wa’ faso bamambu yina beto ke zonzá mpe ke salá lenda manisa baselibatere ngolo?

¹¹ Ntwadisi mosi ya sirkonskripsion ya selibatere yina ke salá bien kisalu ya yandi, me kanisa ti ya ke na bambote mingi na kuvanda selibatere. Kasi, yandi zonzá ti, ya lenda manisa selibatere ngolo, si bampangi ya kento na ya bakala yina ke na makanisi ya mbote banda kufula yandi: “Yinki nge ke na vingilá na kukwela?” Mpangi mosi ya selibatere yina ke salá na Béthel zonzá: “Bantangu ya nkaka, bampangi ke natá munu na kukanisa ti, kuvanda selibatere ke kima ya kyadi. Ya lenda nata muntu na kutala ti, kuvanda ve ya kukwela ke mambu ya mpasi, kasi ya ke ve dikabu.”

¹² Mpangi mosi ya kento ya selibatere yina ke salá na Béthel zonzá: “Baproklamatere ya nkaka ke kanisá ti, baselibatere nyonso ke sosá muntu ya kukwela, to ntangu baselibatere ke kutaná na bantu ya nkaka, ya ke vandá okazion ya kusosa muntu ya kukwela. Ntangu mu kwendá na voyage na kote ya nkaka ya bwala samu na kisalu ya Béthel, mu kumá kuna na nkokila ya lukutakanu. Mpangi ya kento yina yambá munu na yinzo ya yandi, zonzá na munu ti ya ke na bampangi zole ya babakala na kati ya kimvuka yina ke na bamvula mosi na munu. Yandi zonzá na munu ti, yandi ke na sosá ve kuzwidila munu bakala. Kasi ntangu beto kotá na salle du Royaume, yandi natá munu kote bampangi yango vandá samu mu kutana na bawu. Ya vandá mambu ya nsoni samu na munu mpe samu na bampangi zole yina.”

13. Wapi ba-ekzample pesá ngolo na mpangi mosi ya selibatere?

¹³ Mpangi ya nkaka ya kento ya selibatere yina ke salá na Béthel me zonza: “Mu zaba bapionier ya kukula ya baselibatere yina ke zolá mpe ke talá kilengi na servise ya bawu, yina ke salá basakrifice, mpe yina ke salá mingi na kati ya kimvuka. Ba ke vandá na makanisi ya mbote samu na luzingu yina ba ke na nataka. Ba ke kanisá ve ti ba lutila bampangi samu ba ke ba selibatere, to ba lenda vanda ve na kilengi samu ba ke ve ya kukwela, to samu ba ke ve na bana.” Na yawu, ya ke kilengi mingi na kuvanda na kati ya kimvuka yina ba ke pesá muntu nyonso buzitu mpe valere. Samu nge me zaba ti bampangi ya nge lenda talisa ve nge nsoni to kusala nge kimbanda, ba lenda manga ve kukipe nge to lenda kanisa ve ti luzingu ya nge me lutila ya bawu. Zaba ti ba zola nge.

14. Wapi faso beto lenda lakisa ti beto ke pesá baselibatere buzitu?

¹⁴ Bampangi ya beto ya baselibatere ke vanda na kilengi, si beto pesa bawu valere samu na bifu ya bawu ya mbote, kasi ve samu ba ke baselibatere. Kutala ve kyadi ya bawu samu ba ke baselibatere, kasi budila bawu maboko samu na kiminu ya bawu. Ya ke sala ti, bampangi ya  kento na ya bakala yina ke baselisibatere, kanisa ata fioti ve ti beto ke na zonzá na bawu: “Beto ke ve na nsatu ya beno.” (1 Ko. 12:21) Na yawu, ba ke zaba ti beto ke pesá buzitu mpe valere na plase yina ba ke na yawu na kati ya kimvuka.

15. Wapi bachanjema ba ya nkaka me sala samu na kusala mingi na kisalu ya predikasion?

¹⁵ Na mwa bamvula me luta, baproklamatere mingi baká desizion ya kulongoka ndinga ya nkaka, samu na kusala mingi na kisalu ya predikasion. Ba zolá sala bachanjema samu ba lenda na kusala yawu. Baproklamatere me bika kimvuka yina ke zonzá ndinga ya bawu, samu na kukwenda na kimvuka yina ke zonzá ndinga ya nkaka, mpe yina ke na nsatu ya baproklametere. (Bis. 16:9) Ya ke desizion yina mosi na mosi ya bakristo yayi, ke baká samu kisalu ya predikasion kwenda na mantwala. Ata ya lenda baka bawu bamvula samu na kuzonza bien ndinga ya malu-malu, kasi ba ke sadisá kimvuka na bafaso mingi. Bifu ya bawu ya mbote mpe mayela ya bawu na bima ya kimpeve, ke pesá bampangi na kati ya kimvuka ngolo. Beto ke zolá mingi basakrifise yina ke salá bampangi ya kento na ya bakala yayi!

16. Yinki ke salá ti mpangi ya bakala kuma kuluntu to mosi ya ba yina ke sadisá bakuluntu?

¹⁶ Bakuluntu lenda manga ve ti, mpangi mosi kuma kuluntu to mosi ya ba yina ke sadisá bakuluntu (assistant), samu yandi ke zonzá ve bien ndinga ya kimvuka. Bakuluntu ke sadila Biblia samu na kuzaba si mpangi ya bakala lenda kuzwa baresponsabilite yayi, kasi ya ke ve samu yandi ke zonzá bien ndinga ya kimvuka.—1 Tim. 3:1-10, 12, 13; Tite 1:5-9.

17. Yinki batata na bamama zolá zaba avant na kubaka desizion ya kukwenda na bana ya bawu na bwala ya nkaka?

¹⁷ Bakristo ya nkaka na bana ya bawu, ke kwendá na babwala ya nkaka samu na kukima bampasi ya bwala ya bawu, to samu na kwenda sosa kisalu. Na yawu, bana ya bawu lenda sala lekole na ndinga ya bwala yina ba kele. Batata na bamama mpe lenda sosa kulongoka ndinga yango samu na kuzwa kisalu. Kasi, yinki ba ke sala si na bwala yango, ya ke na kimvuka to grupe yina ke zonzá ndinga ya bwala ya bawu? Na wapi kimvuka ba ke kwenda? Ba ke kwenda na kimvuka yina ke zonzá ndinga ya bwala yina ba kele, to na kimvuka yina ke zonzá ndinga ya bwala ya bawu?

18. Faso ke zonzá Bagalate 6:5, wa’ faso beto lenda pesa buzitu na badesizion yina chef ya famiye ke baká?

¹⁸ Ni chef ya famiye muntu ke sola na wapi kimvuka famiye ya yandi ke kwenda. Samu ya ke mambu yina me tala yandi, yandi ke tala yinki ke mbote samu na famiye ya yandi. (Tanga Bagalate 6:5.) Beto ke pesa buzitu na desizion ya chef ya famiye. Desizion ni desizion yandi ke baka, beto ndima yawu, beto yamba bawu mpe beto lakisa bawu luzolo.—Rom. 15:7.

19. Na wapi mambu bachef ya famiye zolá kanisa mbote-mbote mpe kusambila na yawu?

 ¹⁹ Batata na bamama lenda baka desizion ya kuvanda na kimvuka yina ke zonzá ndinga ya bwala ya bawu, kasi bana ya bawu lenda vanda na mpasi ya kuzonza bien ndinga yango. Mpe si kimvuka yango ke na kati ya teritware yina ke zonzá ndinga yina bana ke zonzá na lekole, ya lenda vanda mpasi samu na bana na kusimba mambu yina ke lutá na balukutakanu. Mpe ya lenda sala ti ba kula ve na kimpeve. Samu na yinki? Samu ti, bana lenda vanda na lekole yina ba ke zonzá ndinga ya bwala yina ba kele, kasi kimvuka yina ba kele, ke zonzá ndinga ya nkaka. Si ya ke faso yina, bachef ya famiye zolá kanisa mbote-mbote mpe kusambila samu na kuzwa mayela yina ke sadisa bawu, na kuzaba yinki ba lenda sala samu bana ya bawu tunga kindiku ya mbote na Yehova, mpe na bisadi ya yandi. Batata na bamama zolá lakisa bana ya bawu ndinga ya bawu, to kukwenda na kimvuka yina ke zonzá ndinga yina bana ya bawu zaba. Desizion ni desizion chef ya famiye ke baka, kimvuka yina ba ke kwenda zolá pesa yandi, na famiye ya yandi buzitu mpe valere.

20. Wa’ faso beto lenda lakisa ti beto ke pesá buzitu na bampangi ya beto yina ke na longoká ndinga ya malu-malu?

²⁰ Samu na barezon nyonso yina beto me zonzila, na kati ya bimvuka mingi, ya ke na bampangi ya kento na ya bakala yina ke salá bangolo na kulongoka ndinga ya malu-malu. Ya lenda vanda mpasi na bawu na kuzonza mambu yina ba ke na kanisaka. Kasi, si beto kangama ve kaka na kutala faso ya bawu ya kuzonza ndinga ya malu-malu, beto ke tala luzolo ya bawu samu na Yehova mpe nsatu ya bawu ya kusadila yandi. Si beto tala kaka bifu ya bawu ya mbote yayi, beto ke pesa bawu valere mpe buzitu mingi. Beto ke zonza ve, “Mu ke ve na nsatu ya beno,” kaka samu ba ke zonzá ve bien ndinga ya beto.

BETO KE NA VALERE NA MESO YA YEHOVA

21-22. Wapi okazion ya nene beto ke na yawu?

²¹ Yehova me pesa beto okazion ya nene, ya kuvanda na plase na kati ya kimvuka ya yandi. Beto vanda bakento to babakala, baselibatere to ya kukwela, bantwenya to biboba, mpe beto zaba kuzonza bandinga mingi to ve, beto nyonso ke na valere na meso ya Yehova, mpe na meso ya bampangi.—Rom. 12:4, 5; Kol. 3:10, 11.

²² Beto kontinye na kusadila baleson yina beto me longoka na ekzample yina Paul pesá na yina me tadila nzutu ya muntu. Ya ke sadisa beto na kuzaba, yinki beto lenda sala na kupesa bampangi ya beto ya kento na ya bakala kuraje. Ya ke sadisa dyaka beto na kuzola bawu ntangu nyonso mpe na kupesa bawu buzitu.